ទីក្រុងបាងកក ថ្ងៃទី២៩ ខែមេសា ឆ្នាំ២០២០៖ ក្រុមហ៊ុន អេសស៊ីជី (SCG) ប្រកាសលទ្ធផលប្រតិបត្តិការអាជីវកម្មរបស់ខ្លួន សម្រាប់ត្រីមាសទី១ ឆ្នាំ២០២០ ដោយបង្ហាញនូវតួលេខប្រាក់ចំណូល ប្រហាក់ប្រហែលគ្នានឹងត្រីមាសមុនដែរ។ ជាមួយគ្នានេះ ក្រុមហ៊ុនបានដាក់ចេញនូវយុទ្ធសាស្ត្រ ដើម្បីដឹកនាំសង្គម ដៃគូ និងក្រុមហ៊ុននានា ឆ្លងកាត់វិបត្តិកូវីដ-១៩ ដែលរួមមាន ផែនការគ្រប់គ្រងនិរន្តរភាពអាជីវកម្មរឹងមាំ និងមានលក្ខណៈសកម្មមុន គួបផ្សំនឹងការគោរពប្រតិបត្តិខ្ជាប់ខ្ជួន តាមការណែនាំរបស់រដ្ឋាភិបាល។ ក្រុមហ៊ុន ក៏បានប្រើប្រាស់បច្ចេកវិទ្យាឌីជីថល ដើម្បីបម្រើដល់ការលក់ផលិតផល សេវាកម្ម និងដំណោះស្រាយនានា ដែលបង្កភាពងាយស្រួល និងមានសុវត្ថិភាពដល់អតិថិជនផងដែរ។ ទន្ទឹមនឹងនេះ ក្រុមហ៊ុនក៏បានដាក់ឲ្យអនុវត្ត នូវផែនការត្រៀមលក្ខណៈជាយុទ្ធសាស្ត្រ ដើម្បីសម្រាលផលរំខាន ពីវិបត្តិកូវីដ-១៩ និងដើម្បីចាប់យកឱកាសថ្មីឲ្យបានលឿន ខណៈដែលមានតម្រូវការកើនឡើង។ ដោយមានស្ថានភាពហិរញ្ញវត្ថុរឹងមាំ ក្រុមហ៊ុន អេសស៊ីជី បានត្រៀមខ្លួនរួចរាល់ ដើម្បីដោះស្រាយភាពប្រឈ មដែលនឹងកើតមាននៅពេលខាងមុខនេះ។
លោក Roongrote Rangsiyopash ប្រធាន និងជាអគ្គនាយកប្រតិបត្តិ ក្រុមហ៊ុន អេសស៊ីជី បានបង្ហាញឲ្យដឹងថា៖ លទ្ធផលប្រតិបត្តិការរបស់ក្រុមហ៊ុន សម្រាប់ត្រីមាសទី១ ឆ្នាំ២០២០ កត់ត្រាចំណូលពីការលក់សរុបបាន ១៣.៧៣៨ប៊ីលានរៀល (៣.៣៧៩លានដុល្លារអាមេរិក) ដែលធ្លាក់ចុះ ៦% បើធៀបនឹងត្រីមាសទី១ នៃឆ្នាំ២០១៩។ មូលហេតុសំខាន់នៃការថមថយចំណូលនេះ គឺបណ្ដាលមកពីតម្លៃផលិតផលគីមីធ្លាក់ចុះ ដោយសារតម្រូវការសាកលថយចុះ។ ប៉ុន្តែទោះជាយ៉ាងនេះក្ដី តួលេខចំណូលនេះ គឺប្រហាក់ប្រហែលគ្នានឹងត្រីមាសមុន ដោយចំណូលកើនឡើង ពីអាជីវកម្មស៊ីម៉ងត៍ និងសម្ភារសំណង់ និងអាជីវកម្មវេចខ្ចប់ ទូទាត់គ្នាជាមួយនឹងចំណូលធ្លាក់ចុះពីអាជីវកម្មផលិតផលគីមី។ ទន្ទឹមនឹងនេះ ប្រាក់ចំណេញសម្រាប់ត្រីមាសទី១ ឆ្នាំ២០២០ សម្រេចបាន ៩០៦ប៊ីលានរៀល (២២៣លានដុល្លារអាមេរិក) ធ្លាក់ចុះ ៤០% បើធៀបនឹងរយៈពេលដូចគ្នា នៃឆ្នាំ២០១៩ និងធ្លាក់ចុះ ២% បើធៀបនឹងត្រីមាសមុន ដែលការធ្លាក់ប្រាក់ចំណេញនេះ គឺបណ្ដាលមកពីលទ្ធផលធ្លាក់ចុះនៃអាជីវកម្មផលិតផលគីមី ពោលគឺប្រាក់ចំណេញពីការលក់ផលិតផលគីមី មានការធ្លាក់ចុះ»។
នៅត្រីមាសទី១ ឆ្នាំ២០២០នេះ ចំណូលរបស់ អេសស៊ីជី ពីការលក់ផលិតផលនិងសេវាកម្មដែលមានតម្លៃបន្ថែមខ្ពស់ (HVA) សម្រេចបាន ៥.៩៩២ ប៊ីលានរៀល (១.៤៧៤លានដុល្លារអាមេរិក) ដែលស្មើនឹង ៤៤% នៃចំណូលសរុបពីការលក់។ ចំណាយសរុបរបស់ក្រុមហ៊ុន ទៅលើការស្រាវជ្រាវ និងអភិវឌ្ឍនវានុវត្តន៍ មានចំនួន ១៧៨ ប៊ីលានរៀល (៤៤លានដុល្លារអាមេរិក) ឬស្មើនឹង ១,៣% នៃចំណូលសរុបពីការលក់ ។
ក្រៅពីនេះ ចំណូលរបស់ អេសស៊ីជី ពីអាជីវកម្មនៅខាងក្រៅប្រទេសថៃ ក្នុងនោះរាប់បញ្ចូលទាំងការនាំចេញពីប្រទេសថៃ សម្រាប់ត្រីមាសទី១ ឆ្នាំ២០២០នេះ សម្រេចបាន ៥.៨០៩ប៊ីលានរៀល (១.៤៣៣លានដុល្លារអាមេរិក) ឬស្មើនឹង៤២% នៃចំណូលសរុបពីការលក់ ដោយកើនឡើង ៣% បើធៀបនឹងរយៈពេលដូចគ្នា នៃឆ្នាំ២០១៩។ ក្នុងចំនួននេះ ចំណូលរបស់ អេសស៊ីជី ពីការនាំចេញពីប្រទេសថៃ មាន ៣.១៦០ ប៊ីលានរៀល (៧៧៧លានដុល្លារអាមេរិក) ឬស្មើនឹង ២៣% នៃចំណូលសរុបពីការលក់ ដោយធ្លាក់ចុះ ៩% បើធៀបនឹងរយៈពេលដូចគ្នានៃឆ្នាំ២០១៩។
អេសស៊ីជី នៅក្នុងអាស៊ាន (ដកប្រទេសថៃចេញ)
ចំពោះប្រតិបត្តិការរបស់ អេសស៊ីជី នៅក្នុងអាស៊ាន(មិនរាប់បញ្ចូលប្រទេសថៃ)វិញ ចំណូលពីការលក់នៅក្នុងត្រីមាសទី១ ឆ្នាំ២០២០ សម្រេចបានកំណើន ៨% បើធៀបនឹងរយៈពេលដូចគ្នានៃឆ្នាំ២០១៩ ដោយមានចំនួន ៣.៧៤២ប៊ីលានរៀល (៩២០លានដុល្លារអាមេរិក) ដែលស្មើនឹង ២៨% នៃចំណូលសរុបពីការលក់របស់ អេសស៊ីជី។ តួលេខនេះ គឺរាប់បញ្ចូលទាំងការលក់ពីប្រតិបត្តិការក្នុងស្រុក នៅក្នុងទីផ្សារអាស៊ាននីមួយៗ និងការនាំចូលពីប្រតិបត្តិការ នៅក្នុងប្រទេសថៃ។
គិតត្រឹមថ្ងៃទី៣១ ខែមីនា ឆ្នាំ២០២០ ទ្រព្យសរុបរបស់ អេសស៊ីជី មានចំនួន ៨៨.១១០ប៊ីលានរៀល (២១.៦៨១លានដុល្លារអាមេរិក) ខណៈដែលទ្រព្យសរុបរបស់ អេសស៊ីជី នៅក្នុងអាស៊ាន (ដកប្រទេសថៃចេញ) មានចំនួន ៣០.៣៣៦ ប៊ីលានរៀល (៧.៤៦៤លានដុល្លារអាមេរិក) ដែលស្មើនឹង ៣៤% នៃទ្រព្យសរុបរួមទាំងអស់របស់ អេសស៊ីជី។
ផ្អែកតាមរបាយការណ៍ ត្រីមាសទី១ ឆ្នាំ២០២០ ក្រុមហ៊ុន អេសស៊ីជី ប្រចាំនៅកម្ពុជា មានទ្រព្យសរុបតម្លៃ ១.៥១៨ ប៊ីលានរៀល (៣៧៣លានដុល្លារអាមេរិក) កើនឡើង ៥% បើធៀបនឹងត្រីមាសទី១ នៃឆ្នាំ២០១៩។ សម្រាប់ត្រីមាសទី១ ឆ្នាំ២០២០ ដដែលនេះ អេសស៊ីជី នៅកម្ពុជា សម្រេចបានចំណូលពីការលក់ ចំនួន ២៧២ ប៊ីលានរៀល (៦៧លានដុល្លារអាមេរិក) កើនឡើង ៧% បើធៀបនឹងរយៈពេលដូចគ្នានៃឆ្នាំកន្លងទៅ។ ចំណូលពីការលក់នេះ គឺរួមបញ្ចូលទាំងការលក់ពីអាជីវកម្មផលិតស៊ីម៉ងត៍ និងពីអាជីវកម្មលក់គ្រឿងសំណង់។
ក្នុងគោលដៅធានាប្រតិបត្តិការ និងផលិតកម្មរបស់ក្រុមហ៊ុន ក្នុងអំឡុងពេលនៃការឆ្លងរាតត្បាតនៃជំងឺកូវីដ-១៩ ក្រុមហ៊ុន អេសស៊ីជី បានដាក់ឲ្យអនុវត្តផែនការគ្រប់គ្រងនិរន្តរភាពអាជីវកម្មគ្រប់ជ្រុងជ្រោយ។ ជាងនេះទៅទៀត ដោយចាត់ទុកការការពារសុខភាព និងសុខុមាលភាពរបស់គ្រប់អ្នកពាក់ព័ន្ធទាំងអស់ ជាអាទិភាពសំខាន់បំផុតរបស់ខ្លួន នៅក្នុងអំឡុងពេលនៃការឆ្លងរាលដាលជំងឺកូវីដ-១៩ អេសស៊ីជី បានអនុវត្តការរក្សាគម្លាតសុវត្ថិភាព និងប្រើប្រាស់ហេដ្ឋារចនាសម្ព័ន្ធបច្ចេកវិទ្យាឌីជីថល ដើម្បីជួយដល់បុគ្គលិករបស់ខ្លួន ខណៈដែលពួកគេធ្វើការពីផ្ទះ ។ ជាមួយគ្នានេះដែរ អេសស៊ីជី ក៏បានបរិច្ចាគបរិក្ខារនិងសម្ភារពេទ្យ ដូចជា ទឹកអនាម័យដៃ ម៉ាស និងប្រអប់សុវត្ថិភាពពេទ្យ ដល់ក្រសួងសុខាភិបាលកម្ពុជា កម្មករសំណង់ អ្នករត់ម៉ូតូឌុប និងរ៉ឺម៉កកង់បី នគរបាល អាជីវករ អ្នកចែកចាយ មេការសំណង់ និងប្រជាជនទូទៅផងដែរ ។
លោក Roongrote មានប្រសាសន៍ដូច្នេះថា៖«នៅក្នុងបរិយាកាសដ៏រំជើបរំជួលនេះ សេដ្ឋកិច្ចពិភពលោក កំពុងរងនូវប៉ះពាល់ពីការឆ្លងរាលដាលនៃជំងឺកូវីដ-១៩ ។ អេសស៊ីជី ក៏ស្ថិតក្នុងចំណោមក្រុមហ៊ុន ដែលបានផ្ដោតកិច្ចខិតខំប្រឹងប្រែងរបស់ខ្លួន ទៅលើការរក្សាលំនឹងលទ្ធផលប្រតិបត្តិការ ក្នុងត្រីមាសទី១ ឆ្នាំ២០២០ ឲ្យសម្រេចបានប្រហាក់ប្រហែលគ្នា នឹងត្រីមាសមុននេះដែរ បើទោះបីជាផលប៉ះពាល់នៃជំងឺកូវីដ-១៩ មកលើអាជីវកម្មនានាបានកើតឡើងនៅក្នុងខែមីនាក្ដី»។
ទន្ទឹមនឹងនេះ អេសស៊ីជី ក៏ផ្តោតលើការជួយសង្គម ដៃគូ បុគ្គលិក និងក្រុមហ៊ុននានា ដើម្បីឆ្លងកាត់ពេលវេលាលំបាកនេះ។ ក្រុមហ៊ុន មានការប្ដេជ្ញាចិត្តរឹងមាំ ក្នុងការចាត់វិធានការសកម្មមុន និងជាបន្ទាន់ ដើម្បីរក្សានិរន្តរភាពអាជីវកម្ម ដោយដាក់ចេញនូវផែនការគ្រប់គ្រងនិរន្តរភាពអាជីវកម្មដ៏រឹងមាំ រួមជាមួយនឹងផែនការឆ្លើយតប នឹងការរំខាន ដោយមានការត្រៀមលក្ខណៈជាមុន គ្រប់ជ្រុងជ្រោយ និងការគោរពខ្ជាប់ខ្ជួន ទៅតាមវិធានការសុខភាពនិងសុវត្ថិភាពរបស់រដ្ឋាភិបាល។ នេះតាមការបញ្ជាក់របសលោកលោក Roongrote ដោយបនាបន្តថា ក្រុមហ៊ុនក៏បានប្រើប្រាស់បច្ចេកវិទ្យាឌីជីថល ដើម្បីជួយដល់ ៩០% នៃបុគ្គលិកទាំងអស់របស់ខ្លួន ដើម្បីពួកគេអាចធ្វើការពីផ្ទះបាន និងជួយសម្រួលដល់ការគ្រប់គ្រងខ្សែសង្វាក់ផ្គត់ផ្គង់ ដើម្បីធានាការផ្ដល់ផលិតផល សេវាកម្ម និងដំណោះស្រាយ ដល់អតិថិជនប្រកបដោយសុវត្ថិភាព និងភាពងាយស្រួល។ ក្រុមហ៊ុនក៏ខិតខំស្វែងរកឱកាសថ្មីៗ ដើម្បីបម្រើដល់តម្រូវការដែលប្រែប្រួល តួយ៉ាងការងាកទៅរកការលក់តាមអនឡាញ ឬការជំរុញការប្រើប្រាស់បច្ចេកវិទ្យា blockchain សម្រាប់ការងារលទ្ធកម្ម ការចេញវិក្កយបត្រ និងការទូទាត់ប្រាក់ជាមួយដៃគូជាដើម។ លើសពីនេះទៀត ក្រុមហ៊ុនបន្តរក្សាបាននូវស្ថានភាពហិរញ្ញវត្ថុរឹងមាំ និងត្រៀមលក្ខណៈរួចរាល់ ដើម្បីដោះស្រាយភាពប្រឈមនានា ប្រសិនបើស្ថានភាពនៅអូសបន្លាយពេលយូរ ។
អាជីវកម្មស៊ីម៉ងត៍-សម្ភារសំណង់ ពន្លឿនការប្រើប្រាស់កម្មវិធីពាណិជ្ជកម្មអនឡាញ សម្រាប់ការលក់រាយ ដោយពង្រឹងនិងកែលម្អសមត្ថភាពលក់យ៉ាងសកម្ម និងគ្រប់មធ្យោបាយ ដូចជា គេហទំព័រ កម្មវីធី App និងបណ្ដាញព័ត៌មានសង្គម ព្រមទាំងផ្ដល់ការដឹកជញ្ជូនដល់ផ្ទះ នៅទូទាំងប្រទេស បន្ថែមពីលើការផ្ដល់សេវាកម្មពិគ្រោះយោបល់អំពីផ្ទះ តាមអនឡាញ។ ជាមួយនឹងកម្មវិធីលក់តាមអនឡាញ អតិថិជន អាចស្វែងរកមើលផលិតផល និងទទួលសេវាកម្ម ដោយមិនចាំបាច់ចេញពីផ្ទះរបស់ខ្លួនឡើយ។ ជាលទ្ធផល ការលក់តាម
អនឡាញ បានកើនឡើងយ៉ាងខ្លាំង បើធៀបនឹងត្រីមាសមុននេះ។ អតិថិជន ក៏នឹងទទួលបានផ្ដាច់មុខ នូវការដំឡើងផលិតផល សេវាកម្មផ្សេងៗ និងការដឹកជញ្ជូន ដែលធានាបាននូវសុវត្ថិភាព និងអនាម័យពីក្រុមហ៊ុន។
ជាងនេះទៅទៀត សេវាផ្នែកឡូជីស្ទីក អេសស៊ីជី ក៏បានដាក់ចេញនូវវិធានការម៉ឺងម៉ាត់ជាច្រើនផងដែរ ដោយរាប់តាំងពីការប្រគល់ទំនិញ ការរៀបចំទុកដាក់ក្នុងឃ្លាំង រហូតដល់ការការប្រគល់ផលិតផល ដើម្បីធានាសុវត្ថិភាព រួមជាមួយនឹងសេវាបន្ថែមនៃការដឹកជញ្ជូនទំនិញឧបភោគបរិភោគស្រស់ៗ ដូចជា បន្លែ និងផ្លែឈើជាដើម ដែលកំពុងមានតម្រូវការខ្ពស់ ។ ក្រុមហ៊ុនក៏ចែករំលែកចំណេះដឹង និងការអនុវត្តល្អៗផងដែរ ដើម្បីកាត់បន្ថយហានិភ័យ នៃការឆ្លងជំងឺកូវីដ១៩ ដល់ដៃគូរបស់ខ្លួន នៅក្នុងវិស័យសំណង់ ក្នុងនោះ រាប់ទាំង អ្នកអភិវឌ្ឍគម្រោង មេការសំណង់ អ្នកបច្ចេកទេស និងអ្នកចែកចាយ ដើម្បីជួយដល់គ្រប់ភាគីទាំងអស់ ឲ្យមានលទ្ធភាពជម្នះវិបត្តិនេះទាំងអស់គ្នា ៕
(អត្ថបទពាណិជ្ជកម្ម)