ជាតិ
តំបន់ខ្លះនៅកម្ពុជា នឹងមានភ្លៀងធ្លាក់ ពីថ្ងៃទី៦ ដល់ថ្ងៃទី១២ ខែឧសភា
× ភ្នំពេញ៖ ស្ថានភាពអាកាសធាតុ ជ្រលងសម្ពាធទាបខ្សោយគ្របដណ្ដប់លើកម្ពុជា នៅតាមតំបន់មួយដូចជា តាមបណ្ដាខេត្តនៅតំបន់វាលទំនាបកណ្ដាល តាមបណ្ដាខេត្តនៅតំបន់ជួរភ្នំដងរែក និងខ្ពង់រាបឦសាន និងតាមបណ្ដាខេត្តនៅតំបន់មាត់សមុទ្រ ចាប់ពីថ្ងៃទី៦ ដល់ថ្ងៃទី១២ ខែឧសភា ឆ្នាំ២០២០។
ការព្យាករអាកាសធាតុ របស់ក្រសួងធនធានទឹក និងឧតុនិយម បានឲ្យដឹងថា នៅតាមបណ្ដាខេត្ត នៅតំបន់វាលទំនាបកណ្ដាល សីតុណ្ហភាពជាអប្បបរមា មានពី២៥-២៧អង្សា និងសីតុណ្ហភាពអតិបរមា មានពី៣៥-៤១អង្សា។ ក្នុងនោះតំបន់មួយចំនួននៃបណ្ដាខេត្តនៅភាគពាយ័ព្យ នឹងអាចមានភ្លៀងធ្លាក់រាយប៉ាយ នៅក្នុងកម្រិតតិចទៅបង្គួរ ហើយខេត្តដទៃទៀត អាចនឹងមានភ្លៀងធ្លាក់ខ្សោយនៅតំបន់ខ្លះ។
ចំណែក បណ្ដាខេត្តនៅតំបន់ជួរភ្នំដងរែក និងខ្ពង់រាបឦសាន នឹងមានសីតុណ្ហភាពអប្បបរមា ពី២៤-២៦អង្សា ហើយសីតុណ្ហភាពអតិបរមា មានពី៣៤-៣៧អង្សា និងបណ្ដាខេត្តខ្លះទៀតអាចមានភ្លៀងធ្លាក់ខ្សោយ។ សម្រាប់បណ្ដាខេត្តនៅតំបន់មាត់សមុទ្រ សីតុណ្ហភាពអប្បបរមា មានពី២៥-២៧អង្សា និងសីតុណ្ហភាពអតិបរមា មានពី៣៤-៣៦អង្សា ហើយអាចនឹងមានភ្លៀងធ្លាក់រាយប៉ាយពីតិចទៅបង្គួរទៀតផង។
ក្រសួង ប្រាប់ឲ្យប្រជាពលរដ្ឋ ប្រុងប្រយ័ត្នចំពោះបាតុភូតផ្គរ រន្ទះ ខ្យល់កន្ត្រាក់ និងការកើនឡើងនូវសីតុណ្ហភាពអប្បបរមា និងអតិបរមា នៅបណ្ដាខេត្តភាគពាយព្យរហូតទៅដល់៤០-៤១អង្សា នាថ្ងៃទី៨ ដល់ថ្ងៃទី១០ ខែឧសភា ឆ្នាំ២០២០៕
© រក្សាសិទ្ធិដោយ thmeythmey.com