COVID-19
អន្តរជាតិ
ខុសពីលោក ត្រាំ, ប្រមុខកងទ័ពអាមេរិកថា មិនដឹង COVID-19 ចេញពីណាឡើយ នាយសេនាធិការកងទ័ពអាមេរិក Mark Milley ។ រូបភាព Xinhua
× មន្ត្រីយោធាកំពូលរបស់អាមេរិក ឧត្តមសេនីយ៍ Mark Milley អះអាងនៅថ្ងៃទី៥ ខែឧសភា ថា មិនដឹងពីប្រភពជំងឺ COVID-19 ឡើយ។ ការអះអាងបែបនេះ គឺផ្ទុយពីការលើកឡើងរបស់ប្រធានាធិបតី ដូណាល់ ត្រាំ និងរដ្ឋមន្ត្រីការបរទេស ម៉ៃ ប៉ុមប៉េអូ ដែលចោទថា មានភ័ស្តុតាងបង្ហាញពីប្រភព COVID-19 ចេញពីមន្ទីរពិសោធន៍នៅវូហាន ដែលជាកន្លែងផ្ទុះករណីឆ្លងមុនគេនៅខែធ្នូ ឆ្នាំ២០១៩ ។ លោក Milley មិនមែនជាមន្ត្រីទីមួយដែលអះអាងផ្ទុយពីប្រធានាធិបតីអាមេរិកឡើយ។
បន្ថែមពីលើមន្ត្រីចារកម្ម និងអ្នកជំនាញជំងឺឆ្លង ពេលនេះសូម្បីមន្ត្រីយោធាជាន់ខ្ពស់របស់កងទ័ពអាមេរិក ក៏និយាយផ្ទុយពីលោកប្រធានាធិបតី ដូណាល់ ត្រាំ ដែរពីប្រភពជំងឺ COVID-19 ។ នាយសេនាធិការកងទ័ពអាមេរិក នាយឧត្តមសេនីយ៍ Mark Milley បាននិយាយថា យើងមិនដឹងពីប្រភពជំងឺ COVID-19 ឡើយ។
«តើវាចេញពីមន្ទីរពិសោធន៍វីរុសនៅវូហាន, តើវាចេញពីផ្សារសើមនៅវូហាន ឬក៏កើតនៅកន្លែងផ្សេង? ចម្លើយគឺថា យើងមិនដឹងឡើយ។» នេះជាការបញ្ជាក់របស់ឧត្តមសេនីយ៍ Milley ក្នុងសន្និសីទសារព័ត៌មានថ្ងៃទី៥ ខែឧសភា នៅមន្ទីរបញ្ចកោណ។ លោកត្រូវបានសួរពាក់ព័ន្ធប្រភពជំងឺមួយនេះ។
មន្ត្រីយោធារូបនេះបន្ថែមថា ទីភ្នាក់ងារនានារបស់រដ្ឋាភិបាល និងអង្គភាពជំនាញ កំពុងស៊ើបអង្កេតករណីនេះ។ យ៉ាងណា លោក Milley លើកឡើងថា តាមទម្ងន់ភ័ស្តុតាងដែលមាន គឺចង្អុលទៅរកប្រភពធម្មជាតិ ឬក៏វីរុសមិនមែនបង្កើតដោយមនុស្សឡើយ ហើយក៏ប្រហែលជាមិនមែនជារឿងចេតនាទៅទៀត។ លោក Milley មិនបានបញ្ជាក់ឲ្យលម្អិតពីការលើកឡើងបែបនេះឡើយ។
កន្លងទៅ ប្រធានាធិបតី ដូណាល់ ត្រាំ អះអាងថា លោកមានរបាយការណ៍ដែលបញ្ជាក់ថា ជំងឺ COVID-19 នេះ មានប្រភពពីចិន តែលោកមិនបានបញ្ចេញរបាយការណ៍ ឬភ័ស្តុតាងនៅឡើយ។ មន្ត្រីរដ្ឋបាលលោកដទៃទៀត ពិសេសរដ្ឋមន្ត្រីការបរទេស ម៉ៃ ប៉ុមប៉េអូ ក៏បានអះអាងថា មានភ័ស្តុតាងច្រើនបញ្ជាក់ពីប្រភពជំងឺមួយនេះដែរ តែក៏មិនផ្ដល់ព័ត៌មានលម្អិតដែរ។ លោក ត្រាំ ថែមទាំងគំរាមដំឡើងពន្ធលើទំនិញចិនចំពោះការគ្រប់គ្រងជំងឺនេះមិនបានល្អ ដែលធ្វើឲ្យសាយភាយពេញពិភពលោក។
តាមពិតទៅ លោក Milley មិនមែនជាមន្ត្រីថ្នាក់ខ្ពស់ដែលនិយាយមិនស្របគ្នានឹងលោក ត្រាំ ឬលោក ប៉ុមប៉េអូ ឡើយ។ លោក Anthony Fauci អ្នកជំនាញជំងឺឆ្លងដែលកំពុងល្បីឈ្មោះនៅអាមេរិក ក៏តែងនិយាយជារឿយពីប្រភពជំងឺនេះ។ ក្នុងកិច្ចសម្ភាសជាមួយប៉ុស្តិ៍ទូរទស្សន៍ National Geographic នៅដើមសប្ដាហ៍នេះ លោក Fauci អះអាងជាថ្មីថា វីរុស SARS-CoV-2 ដែលបង្កជាជំងឺ COVID-19 មិនអាចផលិតបានទេ៕
Tag:
អាមេរិក
COVID-19
Mark Milley
© រក្សាសិទ្ធិដោយ thmeythmey.com