ជាតិ
កសិករវ័យក្មេង នី ប៊ុនថា៖«មាន់ខ្មៅ ស្រួលចិញ្ចឹម និងលក់បានថ្លៃ»
× ភ្នំពេញ៖ ការចិញ្ចឹមមាន់ខ្មៅ មានភាពងាយស្រួល ដូចចិញ្ចឹមមាន់ស្រែដែរ ទាំងការថែទាំ ការឲ្យចំណី និងការរៀបចំទ្រុងរបស់វា។ នេះបើតាមលោក នី ប៊ុនថា ដែលបានជោគជ័យនឹងរបរចិញ្ចឹមមាន់ខ្មៅនេះ ដោយបានបន្តថា មាន់ខ្មៅងាយចិញ្ចឹម និងលក់បានថ្លៃជាងមាន់ស្រែ ដល់ទៅ៣ដងឯណោះ។
សូមអញ្ជើញស្ដាប់ការចែករំលែករបស់លោក នី ប៊ុនថា កសិករចិញ្ចឹមមាន់ខ្មៅ នៅស្រុកស្រែអំបិល ខេត្តកោះកុង ដូចតទៅ៖
ក្រោយទទួលបានជោគជ័យនឹងការចិញ្ចឹមមាន់ខ្មៅ លោក នី ប៊ុនថា ដែលជាកសិករដាំបន្លែ និងចិញ្ចឹមសត្វ នៅស្រុកស្រែអំបិល ខេត្តកោះកុង បានជំរុញឲ្យកសិករដទៃ ងាកមកចិញ្ចឹមមាន់ខ្មៅ ដើម្បីបង្កើនប្រាក់ចំណូល។ បើតាមកសិករវ័យ២៦ឆ្នាំ នី ប៊ុនថា មាន់ខ្មៅមានតម្លៃថ្លៃជាងមាន់ស្រែ ដល់ទៅ៣ដងឯណោះ។ លោក នី ប៊ុនថា ប្រាប់សារព័ត៌មានថ្មីៗ២៥ តាមទូរសព្ទយ៉ាងដូច្នេះ៖«តម្លៃមាន់ខ្មៅ និងមាន់ស្រែ គឺខុសគ្នាគុណនឹង៣។ មាន់ខ្មៅ អាចលក់បានតម្លៃពី ៦-៨ម៉ឺនរៀល ក្នុងមួយគីឡូក្រាម»។
ការថែទាំ ការដាក់ចំណីសម្រាប់មាន់ខ្មៅ មិនមានភាពខុសគ្នាពីការចិញ្ចឹមមាន់ស្រែនោះទេ។ មិនតែប៉ុណ្ណោះ លោក នី ប៊ុនថា អះអាងថា មាន់ខ្មៅលូតលាស់លឿនជាងមាន់ស្រែ ហើយ ជាសត្វស៊ាំនឹងអាកាសធាតុផងដែរ។ បើតាមកសិករ នី ប៊ុនថា មាន់ខ្មៅនេះ អាចលក់បានគឺអាយុពី២ទៅ៣ខែ មានទម្ងន់ពី១គីឡូ២ខាំ ទៅ១គីឡូ៥ខាំ ដែលគេទិញសម្រាប់ធ្វើពូជបន្ត ឬយកទៅបរិភោគ និងចិញ្ចឹមលម្អជាដើម។
កសិកររូបនេះ បន្តថា នៅពេលកូនមាន់ខ្មៅមានអាយុ ២១ថ្ងៃ គឺអាចលក់ក្នុងតម្លៃ ៣ដុល្លារក្នុងមួយក្បាល ខណៈកូនមាន់ស្រែមានតម្លៃត្រឹម ៥-៦ពាន់រៀលប៉ុណ្ណោះ។ រសជាតិឆ្ងាញ់ និងជួយដល់សុខភាព ទើបធ្វើឲ្យមាន់ខ្មៅ មានតម្លៃថ្លៃ។ នេះបើតាមលោក នី ប៊ុនថា៕
រូបភាពពីលោក នី ប៊ុនថា៖
Tag:
កសិកម្ម
មាន់ខ្មៅ
កោះកុង
© រក្សាសិទ្ធិដោយ thmeythmey.com