តម្លៃផ្ទេរកីឡាករនៅអឺរ៉ុបអាចធ្លាក់ចុះពី៧ទៅ១០ពាន់លានដុល្លារ ដោយសារ COVID-19

COVID-19

កីឡាអន្តរជាតិ

អន្តរជាតិ

តម្លៃផ្ទេរកីឡាករនៅអឺរ៉ុបអាចធ្លាក់ចុះពី៧ទៅ១០ពាន់លានដុល្លារ ដោយសារ COVID-19

08, May 2020 , 9:59 pm

រូបភាព

ដោយ: ទេព ពិទូរ្យ

តម្លៃផ្ទេរកីឡាករក្នុងលីគកីឡាបាល់ទាត់កំពូលទាំង១០នៅអឺរ៉ុបអាចធ្លាក់ចុះរហូតដល់ ១០ ពាន់លានអឺរ៉ូ (១០,៨ ពាន់លានដុល្លារអាមេរិក) ដោយសារបញ្ហាសេដ្ឋកិច្ចដែលបង្កដោយវិបត្តិជំងឺ COVID-19។ នេះបើតាមការសិក្សារបស់ក្រុមហ៊ុនគណនេយ្យ KPMG ដែលបានចេញផ្សាយនៅថ្ងៃទី៦ ខែឧសភា។

ការចំណាយលើការផ្ទេរកីឡាករត្រូវបានគេរំពឹងថា នឹងធ្លាក់ចុះយ៉ាងខ្លាំងដោយសារក្លិបនៅទូទាំងទ្វីបអឺរ៉ុបកំពុងប្រឈមនឹងការខាតបង់ដ៏ធំមិនធ្លាប់មានដែលបណ្តាលមកពីការបិទកីឡាបាល់ទាត់។

ក្លិបកំពូលៗ នៅអង់គ្លេស អាល្លឺម៉ង់ អ៊ីតាលី និងអេស្ប៉ាញនៅតែប្តេជ្ញាចិត្តត្រឡប់ទៅកាន់ការប្រកួតឡើងវិញដើម្បីបញ្ចប់រដូវកាល ២០១៩-២០ រៀងខ្លួន ដូច្នេះពួកគេនឹងអាចបំពេញកិច្ចសន្យាជាមួយក្រុមហ៊ុនទូរទស្សន៍ និងអាចកាត់បន្ថយផលប៉ះពាល់ផ្នែកហិរញ្ញវត្ថុរបស់ក្លិបបានមួយចំនួន។

ប៉ុន្តែយ៉ាងណាក៏ដោយ ក្រុមហ៊ុន KPMG ប៉ាន់ស្មានថា លីគកំពូលទាំង៥របស់អឺរ៉ុបរួមទាំងបារាំងដែលបានរំសាយលីគរបស់ខ្លួនដោយសារ COVID-19 អាចនឹងខាតប្រាក់ ៤ ពាន់លានអឺរ៉ូ (៤,៣៣ លានដុល្លារអាមេរិក) ប្រសិនបើលីគមិនអាចបញ្ចប់រដូវកាលបានទេនោះ។

ក្រៅពីលីគកំពូលទាំង៥ខាងលើ ការសិក្សារបស់ KPMG ក៏បានមើលទៅលើលីគកំពូល បែលហ្ស៊ិក ហូឡង់ ព័រទុយហ្កាល់ តួកគី និងលីគទីពីរអង់គ្លេសផងដែរ ដោយលីគទាំងនេះក៏ជាកត្តាជំរុញដ៏សំខាន់នៃទីផ្សារដោះដូរកីឡាករនៅអឺរ៉ុប។

ជាមួយនឹងការចំណាយលើការទិញដូរតិចតួច នោះចំនួនទឹកប្រាក់សម្រាប់ចំណាយជុំវិញការទិញដូរកីឡាករអាចនឹងធ្លាក់ចុះដល់ចំនួន ១០,៨ ពាន់លានដុល្លារអាមេរិក ប្រសិនបើគ្មានការចាប់ផ្តើមការប្រកួតឡើងវិញនៅរដូវកាលនេះទេនោះ។ ហើយទោះលីគអាចបន្ត ក៏ពួកគេនៅតែធ្លាក់តម្លៃដល់ជាង៧ពាន់លានដុល្លារដដែល ដ្បិតត្រូវលេងដោយបិទទ្វារកីឡដ្ឋាន។

KPMG បានបង្ហាញរបាយការណ៍អំពីការសិក្សាចុងក្រោយរបស់ខ្លួន ដោយផ្អែកលើចំនួនកីឡាករបាល់ទាត់ ៤១៨៣នាក់ដែលប្រកបអាជីពក្នុងលីគបាល់ទាត់ទាំង១០នៅអឺរ៉ុប។ ហើយការធ្លាក់ចុះតម្លៃលើការផ្ទេរកីឡាករចំនួន១០ពាន់លាដុល្លារនេះគឺស្មើនឹង ២៦,៥ភាគរយ គិតចាប់ពីខែកុម្ភៈមក៕