ជាតិ
ក្រសួងសងថវិកាអ្នកជំងឺវិញ ក្រោយពេទ្យមួយនៅបែកចានទារថ្លៃព្យាបាលច្រើនហួសហេតុ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល
× លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានយកថវិកា១លាន៨សែនរៀល ទៅសងអ្នកជំងឺពីរនាក់ដែលរងគ្រោះថ្នាក់ចរាចរណ៍វិញ បន្ទាប់ពីពួកគាត់ ត្រូវបានមន្ទីរពេទ្យឯកជនមួយនៅឃុំបែកចាន ស្រុកអង្គស្នួល ខេត្តកណ្តាល ទារថ្លៃព្យាបាលលើសប្រក្រតី។ កាលពីថ្ងៃទី៨ ខែឧសភា ម្សិលមិញនេះ លោកស្រី ឱ វណ្ឌឌីន ក៏បានចេញលិខិតព្រមានដល់ប្រធាន និងម្ចាស់ទុនរបស់មន្ទីរពេទ្យនោះផងដែរ។
ក្រោយការចែករំលែកតៗគ្នាក្នុងបណ្តាញសង្គម ក្រសួងសុខាភិបាល បានស្រាវជ្រាវឃើញភាព មិនប្រក្រតីរបស់មន្ទីរសម្រាកព្យាបាល សុធារិទ្ធបែកចាន លើករណីយករថយន្តសង្គ្រោះទៅដឹកជនរងគ្រោះដោយសារគ្រោះថ្នាក់ចរាចរណ៍កាលពីថ្ងៃទី៦ ខែឧសភា ហើយក្រោយមកបានទារថ្លៃសេវាព្យាបាលច្រើនលើសលុប ដោយមិនមានតារាងច្បាស់លាស់ ឬការជូនដំណឹងជាមុនដល់ជនរងគ្រោះ។
ថ្លែងប្រាប់សារព័ត៌មានថ្មីៗ តាមទូរស័ព្ទ លោកស្រី ឱ វណ្ណឌីន បានបញ្ជាក់ថា ក្រោយពី ចេញលិខិតព្រមានទៅខាងមន្ទីរពេទ្យរួចហើយ ក្រសួងសុខាភិបាលបានសម្រេចយកទឹកប្រាក់ថ្លៃព្យាបាលចំនួន ១,៨០០,០០០រៀល សងទៅភាគីជនរងគ្រោះវិញ។
លោកស្រី ឱ វណ្ណឌិន បានបញ្ជាក់ដូច្នេះថា៖ «គ្លីនីកឯកជន ត្រូវដាក់តារាងតម្លៃព្យាបាលឱ្យបានច្បាស់លាស់ សម្រាប់អតិថិជន ហើយអតិថិជនត្រូវដឹងពីតម្លៃព្យាបាលមុន កុំឱ្យព្យាបាលរួច មានបញ្ហាថ្លៃពេក ឬមានការទាមទារតម្លៃលើស»។
ជនរងគ្រោះដោយសារគ្រោះថ្នាក់ចរាចរណ៍នោះ ជាប្តីប្រពន្ធដែលរស់នៅស្រុកភ្នំក្រវាញ ខេត្តពោធិ៍សាត់ ហើយពួកគាត់ស្នាក់នៅផ្ទះជួលរួមជាមួយប្អូនប្រុសនៅសង្កាត់ក្រាំងពង្រ ខណ្ឌពោធិ៍សែនជ័យ។ គ្រោះថ្នាក់ចរាចរណ៍បានកើតឡើងនៅតាមបណ្តោយផ្លូវជាតិលេខ៥១។
ក្រៅពីលិខិតព្រមានកាលពីថ្ងៃទី៨ ខែឧសភា លោកស្រី ឱ វណ្ណឌីន ជំនួសមុខឲ្យរដ្ឋមន្ត្រីក្រសួងសុខាភិបាល បានសម្រេចផាកពិន័យវេជ្ជបណ្ឌិត គូរ គឹមហៀក ប្រធាន និងវេជ្ជបណ្ឌិត ស្រស់ សុភ័ក្ត្រា ម្ចាស់ទុនមន្ទីរពេទ្យមន្ទីរសម្រាកព្យាបាល សុធារិទ្ធបែកចាន តាមច្បាប់ផងដែរ។
ជាមួយគ្នានេះដែរ ក្រសួងសុខាភិបាលក៏បានអំពាវនាវ ដល់ម្ចាស់គ្លីនិកឯកជនទាំងអស់ ត្រូវមានការចាត់ចែងខ្ពស់ អនុវត្តតាមការណែនាំរបស់ក្រសួងសុខាភិបាល។ គ្លីនិកទាំងអស់ត្រូវមានច្បាស់អនុញ្ញាតត្រឹមត្រូវជៀសវាង បង្កនូវសកម្មភាពអសកម្មផ្សេងៗ ដែលជះឥទ្ធិពលដល់សេវាសុខាភិបាល៕
© រក្សាសិទ្ធិដោយ thmeythmey.com