ការផ្អាកដំណើរប្រកួតពានរង្វាន់លីគកំពូលកម្ពុជា ដោយសារការរាតត្បាត នៃជំងឺរលាកសួតបង្កឡើងដោយកូរ៉ូណាវីរុស (កូវីដ-១៩) មិនប៉ះពាល់ដល់កិច្ចសន្យារវាងកីឡាករ និងក្លិបនោះទេ។ ប៉ុន្តែការផ្អាកដែលអូសបន្លាយយូរនេះ អាចនាំឱ្យក្លិបជួបបញ្ហាហិរញ្ញវត្ថុ។ គិតមកទល់ពេលនេះ លីគកំពូលបានផ្អាកដំណើរការជាង១ខែហើយ។
ក្លិបធំៗមួយចំនួនរួមមាន បឹងកេត វិសាខា ក្រសួងការពារជាតិ ណាហ្គាវើល អគ្គស្នងការដ្ឋាននគរបាលជាតិ សុទ្ធតែបានអះអាងដូចគ្នាថា ការផ្អាកពានរង្វាន់លីគកំពូល មិនប៉ះពាល់ដល់កិច្ចសន្យារវាងកីឡាករ និងក្លិបនោះទេ។ ដ្បិតទាំងកីឡាករបរទេស និងកម្ពុជាភាគច្រើន សុទ្ធតែបានចុះកិច្ចសន្យាជាមួយក្លិបពេញមួយរដូវកាល ឬច្រើនជាងនេះ។
ក្នុងន័យនេះ ប្រសិនបើការផ្អាកលីគកំពូលបន្តអូសបន្លាយពេលវេលា នោះកិច្ចសន្យារបស់កីឡាករ ក៏អូសបន្លាយតាមនឹងដែរ ហើយក្លិប ក៏គ្មានសិទ្ធិបញ្ចប់កិច្ចសន្យាពួកគេ ពាក់កណ្តាលទីដែរ។ ក្លិបអាចធ្វើដូច្នេះបាន លុះត្រាគណៈកម្មការរៀបចំការប្រកួត សម្រេចលុបលីគកំពូល។
តែយ៉ាងណាក៏ដោយ ក្លិបទាំង៥ខាងលើ សុទ្ធតែបានបង្ហាញក្តីកង្វល់ ចំពោះការអូសបន្លាយពេលវេលានៃការផ្អាកការប្រកួតលីគនេះ ព្រោះវាអាចធ្វើឲ្យការចំណាយរបស់ក្លិប កាន់តែច្រើនជាងមុន។ ក្នុងន័យនេះ ប្រសិនបើលីគកំពូលផ្អាកកាន់តែយូរ គម្រោងបញ្ចប់រដូវកាល ក៏អូសបន្លាយ ដែលធ្វើឲ្យការចំណាយលើប្រាក់ឈ្នួលកីឡាករ មានរយៈពេលច្រើនខែជាងមុន។
ទាំងលោក ហុក សុចិត្រា អ្នកចាត់ការទូទៅក្លិបវិសាខា, លោក ខូវ ឆាយ អគ្គលេខាធិការក្លិបក្រសួងការពារជាតិ និងលោក បែ មករា សុទ្ធតែបានលើកឡើងស្រដៀងគ្នាថា បើការផ្អាកអូសបន្លាយយូរ ក្លិបអាចជួបវិបត្តិហិរញ្ញវត្ថុ ដោយសារដៃគូសហការកាត់បន្ថយ ឬដកការឧបត្ថម្ភ។
«ជាទូទៅ យើងធ្វើកិច្ចសន្យាជាមួយកីឡាករបរទេស គឺយើងធ្វើមួយរដូវកាល ហើយកីឡាករខ្មែរមួយចំនួន ក៏បែបនេះដែរ។ ប៉ុន្តែដល់ពេលផ្អាក(លីគ) វាធ្វើឲ្យប៉ះពាល់ដល់បញ្ហាថវិកាសម្រាប់ដំណើរការក្លិប ព្រោះថវិកាមួយចំនួន យើងបានពីដៃគូឧបត្ថម្ភ។ តែដោយសារយើងគ្មានសកម្មភាព Sponsor មួយចំនួនបានដកចេញ ដែលធ្វើប៉ះពាល់ដល់វិបត្តិប្រាក់ចំណូល»។ នេះជាការលើកឡើងរបស់ លោក ខូវ ឆាយ ដែលអះអាងថា បើសិនលីគកំពូលឆ្នាំនេះ ត្រូវបានលុបចោល ក្រសួងការពារជាតិ នឹងបញ្ចប់កិច្ចសន្យាកីឡាករមួយចំនួនពាក់កណ្តាលទី ដើម្បីដោះស្រាយវិបត្តិហិរញ្ញវត្ថុ។
សម្រាប់លោក ហុក សុចិត្រា យល់ឃើញថា ដោយសារការផ្អាកលីគកំពូលនេះ កើតឡើងជាចៃដន្យ ដូច្នេះក្លិបវិសាខា ត្រូវសម្របខ្លួនទៅតាមស្ថានការណ៍ នៃការអូសបន្លាយពេលវេលា។ ក្នុងន័យនេះ លោក ចង់បញ្ជាក់ថា ក្លិបត្រូវតែបន្តផ្តល់ប្រាក់ឈ្នួលដល់កីឡាករ ទោះបីការផ្អាកពន្យាពេលដល់ណាក៏ដោយ ដ្បិតក្លិបធ្វើកិច្ចសន្យាជាមួយកីឡាករភាគច្រើន មួយរដូវកាល។ កត្តានេះហើយ ដែលជាបញ្ហាប្រឈមសម្រាប់ក្លិបនីមួយៗ ព្រោះក្លិបពុំមានសិទ្ធិបញ្ចប់កិច្ចសន្យា កីឡាករពាក់កណ្តាលទីនោះទេ។
«តាំងពីដើមទីមកយើង មិនបានដឹងថា មានបញ្ហាកូវីដ-១៩នោះទេ។ នេះជាបញ្ហាចោទ។ អ៊ីចឹងទាំងអស់ហ្នឹង យើងត្រូវមានលក្ខខណ្ឌមួយ ក្នុងកុងត្រារបស់កីឡាករ ពាក់ព័ន្ធនឹងរដូវកាល។ ឧទាហរណ៍យើងកុងត្រាជាមួយកីឡាករ ពីខែ១ ដល់ខែ១២ តែចៃដន្យ លេងទៅពន្យារពេលរហូតដល់ខែ១ ទៅខែ២ ដូច្នេះយើងត្រូវតែបន្តផ្តល់ប្រាក់ខែឲ្យគាត់»។ នេះជាការលើកឡើងរបស់លោក ហុក សុចិត្រា។
ពាក់ព័ន្ធនឹងការលើកពេលសម្រាកលីគកំពូល អ្នកចាត់ការទូទៅរូបនេះ ធ្លាប់ស្នើទៅកាន់គណៈកម្មការប្រកួតបាល់ទាត់ជាតិកម្ពុជា ឲ្យកំណត់កម្មវិធីប្រកួតឲ្យបានច្បាស់លាស់ម្តងរួចមកហើយ។ ការស្នើរបស់ លោក គឺដើម្បីឲ្យក្លិបរៀបចំផែនការចំណាយ ឲ្យបានច្បាស់លាស់ ដើម្បីកាត់បន្ថយវិបត្តិហិរញ្ញវត្ថុ។
«យើងធ្លាប់ស្នើទៅ CNCC ពីមុនមកថា ពាក់ព័ន្ធការលើកពេលលីគ គឺ CNCC ត្រូវរៀបចំកាលវិភាគប្រកួតឲ្យបានច្បាស់លាស់។ ដូចយើងដឹងហើយថា នៅកម្ពុជាយើងមានបញ្ហាហិរញ្ញវត្ថុច្រើន។ ឧទាហរណ៍កម្មវិធីលីគ គេកំណត់រយៈពេល៦ខែ ដូច្នេះយើងធ្វើកិច្ចសន្យាជាមួយកីឡាករតែ៦ខែទេ។ ប៉ុន្តែពេលប្រកួតជាក់ស្តែង CNCC គាត់បានលើកពេល ដោយសារជាប់ប្រកួតជម្រើសជាតិ ឬជាប់អីផ្សេងៗ ដូច្នេះការពន្យាថពេល១ ទៅ២ខែ អាចធ្វើឲ្យក្លិបជួបបញ្ហាថវិកា»។
ជាមួយគ្នានេះ លោក ប្រាក់ សុវណ្ណារ៉ា អ្នកចាត់ការក្រុមអគ្គស្នងការដ្ឋាននគរបាលជាតិបាននិយាយថា ប៉ូលិសកំពុងពិចារណា ពាក់ព័ន្ធនឹងកិច្ចសន្យា និងការកាត់បន្ថយប្រាក់ខែរបស់កីឡាករ ដ្បិតមិនដឹងថាការផ្អាកលីគកំពូល ត្រូវអូសបន្លាយដល់ពេលណា។ «កាលណាយើងអត់មានការប្រកួត អ្នកឧបត្តម្ភក៏ពិបាក ថ្នាក់ដឹកនាំក្លិបក៏ពិបាក។ ដូច្នេះខ្ញុំចង់ឲ្យកីឡាករ យល់ពីស្ថានភាពលំបាកមួយនេះ។ ប៉ុន្តែបើរឿងកាត់ប្រាក់ខែកីឡាករប៉ុន្មានភាគរយ ថ្នាក់ដឹកនាំជាអ្នកសម្រេច ហើយគាត់កំពុងពិចារណា»។ នេះជាការលើកឡើងរបស់លោក ប្រាក់ សុវណ្ណារ៉ា។
ទោះបីបច្ចុប្បន្ន គ្មានការប្រកួត ហើយកីឡាករតាមក្លិបនីមួយៗ បានរំសាយការប្រមូលផ្តុំ ទៅហ្វឹកហាត់តាមផ្ទះក៏ដោយ តែពួកគេទទួលបានប្រាក់ឈ្នួលដូចធម្មតា។ តែមានកីឡាករខ្លះ ត្រូវបានក្លិបកាត់ប្រាក់ខែ ចន្លោះពី៣០ ទៅ៥០ភាគរយ។ ការកាត់ប្រាក់ខែនេះ គឺដើម្បីរួមចំណែកជួយទ្រទ្រង់ប្រតិបត្តិការរបស់ក្លិប ក្នុងអំឡុងពេលជួបវិបត្តិហិរញ្ញវត្ថុ ដោយសារការរាតត្បាតនៃជំងឺកូវីដ-១៩។ ដ្បិតម្ចាស់ក្លិបភាគច្រើន សុទ្ធតែជាអ្នកជំនួញ។
មកទល់ពេលនេះ មានក្លិបចំនួនពីរ គឺបឹងកេត និងក្រសួងការពារជាតិ ដែលបានបង្ហាញព័ត៌មានជាសាធារណៈ ពីការកាត់ប្រាក់ខែមន្ត្រី បុគ្គលិក គ្រូបង្វឹក និងកីឡាករ។ ក្នុងនោះ បឹងកេត បានកាត់ប្រាក់ខែចន្លោះពី៣០ ទៅ៥០ភាគរយ តាមទំហំប្រាក់ខែដែលពួកគេទទួលបាន ខណៈក្រសួងការពារជាតិ កាត់៥០ភាគរយ។ ក្លិបបាល់ទាត់ណាហ្គាវើល កំពុងពិចារណា រឿងកាត់ប្រាក់ខែនេះដែរ៕