ជាតិ
ក្រសួងបរិស្ថាន គ្រោងសង់ស្នាក់ការមួយចំនួននៅជុំវិញដែនជម្រកសត្វព្រៃ «ព្រៃឡង់» ដើម្បីពង្រឹងការគ្រប់គ្រងធនធានធម្មជាតិ
រូបភាពពីក្រសួងបរិស្ថាន
×![]()
ភ្នំពេញ៖ ដើម្បីពង្រឹងការគ្រប់គ្រងធនធានធម្មជាតិក្នុងតំបន់ ក្រសួងបរិស្ថាន មានគម្រោងសង់ស្នាក់ការសំខាន់ៗមួយចំនួន នៅជុំវិញដែនជម្រកសត្វព្រៃ «ព្រៃឡង់»។ នេះបើតាមក្រសួងបរិស្ថាន។
កាលពីថ្ងៃទី ៧ ឧសភាកន្លងទៅ លោក សៅ សុភាព រដ្ឋលេខាធិការក្រសួងបរិស្ថាន បានចុះពិនិត្យទីតាំងជុំវិញព្រៃឡង់ ក្នុងភូមិសាស្ត្រខេត្តកំពង់ធំ និងព្រះវិហារ ដើម្បីស្វែងរកទីតាំងសមស្របដើម្បីសង់ស្នាក់ការរួមមួយ ក្នុងការបង្កើនប្រសិទ្ធភាព ការពារ និងអភិរក្សធនធានធម្មជាតិ នៅក្នុងដែនជម្រកសត្វព្រៃ «ព្រៃឡង់»។
រដ្ឋលេខាធិការក្រសួងបរិស្ថានរូបនេះ អះអាងថា ស្នាក់ការនេះ នឹងប្រើប្រាស់ជាកន្លែងប្រមូលផ្ដុំនូវធនធានបច្ចេកទេស ការអនុវត្តច្បាប់ ការគ្រប់គ្រងកម្លាំងការពារល្បាត ប្រចាំការ។ លោក សៅ សុភាព បន្តថា ស្នាក់ការនេះ ក៏មានសារៈសំខាន់ក្នុងការអន្តរាគមន៍លើបទល្មើសធនធានធម្មជាតិ ដែលអាចកើតឡើងនៅក្នុងតំបន់ការពារធម្មជាតិ និងផ្តល់លទ្ធភាពឲ្យមានការចូលរួមពីក្រសួងស្ថាប័ន និងដៃគូសហការផ្សេងទៀត។
សូមបញ្ជាក់ថា ដែនជម្រកសត្វព្រៃ «ព្រៃឡង់» ស្ថិតនៅក្នុងភូមិសាស្ត្រខេត្តចំនួន៤ គឺខេត្តកំពង់ធំ ព្រះវិហារ ក្រចេះ និងខេត្តស្ទឹងត្រែង ដែលមានផ្ទៃដីសរុប៤៣១ ៦៨៣ហិកតា។ ជាមួយគ្នានេះ តំបន់ការពារធម្មជាតិចំនួន១៩កន្លែងនៅដែនជម្រកសត្វព្រៃ «ព្រៃឡង់» ត្រូវបានដាក់បញ្ចូលជាតំបន់ការពារ និងអភិរក្ស កាលពីឆ្នាំ២០១៩៕
Tag:
បរិស្ថាន
ព្រៃឡង់
ធម្មជាតិ
© រក្សាសិទ្ធិដោយ thmeythmey.com
