អត្ថបទ៖ ស៊ីធី
Keanu Subba កំពុងតែអន្ទះអន្ទែងចង់ជួបអតីតម្ចាស់ខ្សែក្រវាត់ ONE World Champion។ ក្នុងរយៈពេល ១១ ខែមកនេះកីឡាករសញ្ជាតិម៉ាឡេស៊ីស្ថិតនៅក្រៅសង្វៀនដោយសារតែរបួសបាក់ឆ្អឹងស្នងជើង ពេលប៉ះ Ryogo Takahashi កាលខែឧសភាឆ្នាំ ២០១៩។ ឥឡូវនេះកីឡាករវ័យ ២៥ ឆ្នាំជិតជាសះស្បើយវិញ និងសម្លឹងមកឡើងសង្វៀនជាថ្មីដោយចង់ជួបជើងខ្លាំងក្នុងទម្ងន់ featherweight ដែលជាអតីតម្ចាស់ខ្សែក្រវាត់ ONE World Champion ។
Keanu បានថ្លែងបែបនេះ ៖«ខ្ញុំត្រូវតែត្រលប់មកវិញព្រោះជិតមួយឆ្នាំហើយដែលខកខានឡើងសង្វៀន។ Honorio Banario គឺជាកីឡាករល្អឥតខ្ចោះដែលត្រូវប្រឈមមុខដាក់គ្នា។ បន្ទាប់ពីការជួបគេ ខ្ញុំមានកីឡាករច្រើនទៀតដែលត្រូវប្រឈម។ ប៉ុន្តែ Honorio គឺជាអតីតម្ចាស់ខ្សែក្រវាត់ World Champion ដែលជារ៉ាដាកំពូលសម្រាប់ខ្ញុំ»។
VIDEO
គួរដឹងថា Banario ចូលប្រកួតនៅ ONE តាំងពីខែកុម្ភៈ ឆ្នាំ ២០១២ ហើយកីឡាករសញ្ជាតិហ្វីលីពីនរូបនេះបានយកឈ្នះមិត្តរួមជាតិ Eric “The Natural” Kelly ដើម្បីគ្រងក្រវាត់ ONE Featherweight World Title ជាលើកដំបូងត្រឹមតែរយៈពេល១ ឆ្នាំប៉ុណ្ណោះ។ នៅឆ្នាំ២០១៦ កីឡាករមកពីក្លិប Team Lakay រូបនេះបានរំកិលឡើងទៅប្រកួតទម្ងន់ lightweight ហើយគេយកឈ្នះកីឡាករខ្លាំងៗដូចជាង Eddie “The Magician” Ng និង Adrian “The Hunter” Pang ជាដើម។ បែបណាក្ដី កាលខែកុម្ភៈកន្លងទៅ “The Rock” ដែលគេដឹងថាមានជំនាញវូស៊ូ បានរំកិលធ្លាក់មកប្រកួតទម្ងន់ featherweight វិញ និងយកឈ្នះអ្នកលេងគុនចម្រុះរបស់ថៃ Shannon “OneShin” Wiratchai ដោយពិន្ទុមិនឯកច្ឆន្ទ។ ជ័យជម្នះទាំងនេះធ្វើឲ្យ Banario កាន់តែលេចធ្លោដូច្នេះហើយទើប Subba ស្រេកឃ្លាននឹងប្រជែងជាមួយជើងខ្លាំងម្នាក់នេះ។
«Honorio ជាកីឡាករកំពូលម្នាក់។ បទពិសោធន៍របស់គេល្អ។ កន្លងទៅ គេប្រកួតជា Shinya Aoki, Lowen Tynanes, និង Ev Ting ទៀតផង។ គេក៏បានយកឈ្នះសូម្បីប្រកួតនឹងវីរបុរសសិង្ហបុរី Amir Khan កាលខែកញ្ញា ឆ្នាំ ២០១៨។ ដំបូងខ្ញុំគិតថា ចង់ប៉ះ Bruno Pucci ប៉ុន្តែ ពេលស្រាវជ្រាវមើល ខ្ញុំជង់ជួប [Honorio] វិញ។ មានអ្នកថ្មីៗមួយចំនួន ប៉ុន្តែខ្ញុំចង់យកឈ្នះ Honorio សិន ព្រោះគេជាជើងខ្លាំងមួយរូប»។ កីឡាករមកពីម៉ាឡេស៊ីរៀបរាប់បែបនេះ។
ក្នុងប៉ុន្មានឆ្នាំមកនេះ Subba បានប្ដូរពី Bali MMA នៅឥណ្ឌូណេស៊ី និង ក្លិប Monarchy MMA មកកាន់ទឹកដីកំណើតឯ កូឡាឡាំពួរ។ រូបគេហ្វឹកហាត់កាន់តែល្អនិងជោគជ័យនៅសង្វៀន ONE Championship ជាបន្តបន្ទាប់។
តាំងពីបង្ហាញខ្លួននៅខែតុលា ឆ្នាំ ២០១៥ គេយកឈ្នះ៦នាក់ត្រឹមទឹកទី១ ប៉ុណ្ណោះរួមបញ្ចូលទាំងកីឡាករមីយ៉ាន់ម៉ា Phoe “Bushido” Thaw, កីឡាករចិន “White Dragon” Xie Chao, និង កីឡាករប៉ាគីស្ថាន Ahmed “Wolverine” Mujtaba និង Waqar “Psycho” Umar ជាដើម។
ជ័យជម្នះទាំងនេះដែលធ្វើឲ្យគេជឿជាក់យកឈ្នះ Banario។ កីឡាករមកពីកូឡាឡាំពួរ ត្រូវបានគេស្គាល់ថាមានជំនាញវូស៊ូ និងបញ្ចប់ឲ្យគូប្រកួតចុះចាញ់ងាយៗជាជាងផ្ដួលគូប្រកួតឲ្យចុះចាញ់។ គេជឿថា បើជួប Banario នោះការប្រកួតច្បាស់ជាល្អមើលមិនខាន។
កីឡាករវ័យ ២៥ ឆ្នាំពន្យល់ថា៖« Banario មានកម្លាំងខ្លាំង និង ប្រយុទ្ធល្អ ដែលគំរាមកំហែងខ្លាំង។ ប៉ុន្តែ ខ្ញុំអាចដោះស្រាយបាន ទោះវាយក្នុងជំហរដេក។ មានរឿងច្រើនត្រូវធ្វើ។ ខ្ញុំត្រូវធ្វើការងារធ្ងន់មុនពេលប្រកួត»។
មុនត្រលប់មកវិញ Subba ត្រូវតែច្បាស់ខ្លួនឯងថាមិនមានបញ្ហា និងជាមួយរយភាគរយ។ ព្រោះថារូបគេដាក់គោលដៅទៅដណ្ដើមខ្សែក្រវាត់ ONE Featherweight World Title នៅថ្ងៃមុខ។ ជើងខ្លាំងម៉ាឡេស៊ីសង្កត់ធ្ងន់ទៀតថា ៖«ខ្ញុំអត់បានប្រកួតជិត ១ ឆ្នាំ។ តែពីរឬ បីខែទៀតអាចឡាំបានហើយ។ ឬអាចចូលចាប់ ឬ ប្រកួតចំបាប់ក៏បាន។ ខ្ញុំត្រូវធ្វើឲ្យវាត្រលប់មកដូចមុន។ ខ្ញុំចង់ប្រកួតឲ្យបានម្ដងមុនចូលឆ្នាំ២០២១។ ជ័យជម្នះ គឺ សំខាន់ ណាស់។ ហើយគោលដៅយកខ្សែក្រវាត់ World Championនៅ ២ ឆ្នាំបន្ទាប់»៕