ជាតិ
គ្មានការលើកលែងពិន័យចំពោះអ្នកគ្មានប័ណ្ណបើកបរ ដូចការផ្សព្វផ្សាយមួយចំនួនឡើយ លោក នេត សាវឿន អគ្គស្នងការនគរបាលជាតិ
× ភ្នំពេញ៖ អគ្គស្នងការនគរបាលជាតិ បានបញ្ជាក់ថា គ្មានការលើកលែង ឬ ពន្យារពេលពិន័យលើករណីគ្មានប័ណ្ណបើកបរ ដូចការផ្សព្វផ្សាយតាមបណ្តាញសង្គមមួយចំនួនឡើយ។ នេះបើតាមសេចក្ដីប្រកាសព័ត៌មានរបស់អគ្គស្នងការនគរបាលជាតិ នៅថ្ងៃទី ១០ ខែ ឧសភា។--
ក្រោយពីមាន ប្រព័ន្ធផ្សព្វផ្សាយសង្គមមួយបានបង្ហោះឃ្លីបសំឡេងរបស់ អគ្គស្នងការនគរបាលជាតិលោក នេត សាវឿន ដែលមានខ្លឹមសារថា « អគ្គស្នងការនគរបាលជាតិ ប្រកាសលើកពេលពិន័យ ឡាន ម៉ូតូ ដែលគ្មានប័ណ្ណបើកបរ»។ អគ្គស្នងការបានបដិសេធ និងបានបកស្រាយថា ខ្លឹមសារនេះជារបស់ លោក នេត សាវឿន ក្នុងកិច្ចប្រជុំផ្សព្វផ្សាយច្បាប់ចរាចរណ៍តាំងពីឆ្នាំ២០១៥ ដែលត្រូវបានគណនីYouTube ឈ្មោះ Ahgogo បានយកមកបង្ហោះឡើងវិញ ។
គណនី Youtub ឈ្មោះ Ahgogo ដែលបានបង្ហោះឃ្លឹបរបស់លោក នេត សាវឿន កាលពីឆ្នាំ២០១៥ ឡើងវិញ។
អគ្គស្នងការនគរបាលជាតិបានបញ្ជាក់ដូច្នេះថា៖«ខ្លឹមសារដែលបានផ្សព្វផ្សាយតាមប្រព័ន្ធទំនាក់ទំនងYouTube គឺជាខ្លឹមសាររបស់លោក នេត សាវឿន ក្នុងកិច្ចប្រជុំផ្សព្វផ្សាយអនុវត្តន៍ច្បាប់ចរាចរណ៍ផ្លូវគោក កាលពីថ្ងៃទី៣១ ខែធ្នូ ឆ្នាំ២០១៥។ ការបង្ហោះផ្សព្វផ្សាយឡើងវិញ អាចធ្វើឱ្យពលរដ្ឋមានការយល់ច្រឡំចំពោះការអនុវត្តន៍ច្បាប់ចរាចរណ៍ផ្លូវគោកថ្មី ហើយក៏អាច មានចេតនាបង្កការរាំងស្ទះដល់ការអនុវត្តច្បាប់របស់សមត្ថកិច្ច »។
តាមសេចក្ដីប្រកាសព័ត៌មានដដែរ កិច្ចប្រតិបត្តិការណ៍រឹតបន្តឹងច្បាប់ចរាចរណ៍ថ្មីនេះ សមត្ថកិច្ចកំពុង រឹតបន្ដឹងការត្រួតពិនិត្យ និងផាកពិន័យ លើប្រភេទអទិភាពបទល្មើស ចំពោះទោចក្រយានយន្ត ត្រីចក្រយានយន្ត ចំនួន៧ចំណុច និងរថយន្តចំនួន៩ចំណុច ដែលក្នុងនោះមានការត្រួតពិនិត្យ និងពិន័យចំពោះករណីគ្មានប័ណ្ណបើកបរយានយន្តផងដែរ៕
© រក្សាសិទ្ធិដោយ thmeythmey.com