COVID-19
ជាតិ
កញ្ញា លឹម សុខហ្គិច កាត់បន្ថយការអផ្សុកតាមរយៈការដាំបន្លែធម្មជាតិនៅផ្ទះ
× ភ្នំពេញ៖ កញ្ញា លឹម សុខហ្គិច ជានិស្សិតឆ្នាំទី១នៅសាកលវិទ្យាល័យភ្នំពេញអន្តរជាតិ។ ទោះមិនបានសិក្សាជំនាញកសិកម្ម ប៉ុន្តែសុខហ្គិចចូលចិត្តការដាំដុះ។ យុវតីរូបនេះយល់ថា ការដាំបន្លែនៅផ្ទះគឺដូចជាការហាត់ប្រាណ ឬជាការកម្សាន្តអាចកាត់បន្ថយការអផ្សុក និងថែមទាំងបានបន្លែធម្មជាតិសម្រាប់បរិភោគទៀតផង។ ស្ថិតក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ផ្ទះរបស់កញ្ញា សុខហ្គិច មានដាំបន្លែ និងដំណាំច្រើនប្រភេទមានដូចជា ក្រូចឆ្មារ, ម្ទេស, ស្លឹកខ្ទឹម, សណ្ដែកកួរ, ក្រសាំងទៀប, ស្ពៃ, ស្លឹកតយ, ជី, ផ្លែទៀប និងស្រកានាគជាដើម។
សូមទស្សនាវីដេអូខាងក្រោមដូចតទៅ៖
យុវតីវ័យ២០ឆ្នាំ លឹម សុខហ្គិច ដាំបន្លែនៅផ្ទះ ក៏ព្រោះតែចង់បានបន្លែបែបធម្មជាតិសម្រាប់គ្រួសារបរិភោគ ដោយមិនបាច់ទៅបន្លែពីផ្សារទាំងស្រុងនោះទេ។ មួយវិញទៀតអាចចែករំលែកទៅដល់អ្នកជិតខាង ដែលរស់នៅក្បែរផ្ទះផងដែរ។ កញ្ញា បានរៀបរាប់យ៉ាងដូច្នេះថា៖«ខ្ញុំដាំបន្លែនៅផ្ទះនេះគឺយូរហើយ។ បន្លែដែលដាំទាំងអស់ហ្នឹង ខ្ញុំដាំជា២កន្លែង មួយកន្លែងដាំយូរហើយ និងមួយកន្លែងទៀត ទើបតែដាំពេលចាប់មានជំងឺកូវីដ-១៩នេះទេ ដូចជាពពួកស្ពៃជាដើម»។
យុវតី សុខហ្គិច ក៏លើកទឹកចិត្តឲ្យបងប្អូនប្រជាពលរដ្ឋ អាចសាកល្បងដាំបន្លែបង្ការផ្សេងៗ នៅក្នុងអំឡុងពេលសម្រាកនៅផ្ទះ ទប់ស្កាត់កូវីដ-១៩ នេះ ព្រោះវាក៏មិនមែនជារឿងដែលពិបាកនោះទេ ហើយក៏ដូចការកម្សាន្តកែអផ្សុក និងទទួលបានបន្លែធម្មជាតិទៀតផង៕
© រក្សាសិទ្ធិដោយ thmeythmey.com