COVID-19
អន្តរជាតិ
ចិន បញ្ជូនជំនួយសម្ភារពេទ្យដល់កម្ពុជាបន្ថែមទៀត ដើម្បីប្រយុទ្ធប្រឆាំងជំងឺកូវីដ១៩
× ភ្នំពេញ៖ ដូចការគ្រោងទុក រដ្ឋាភិបាលចិន បានបញ្ជូនសម្ភារពេទ្យមកកម្ពុជាបន្ថែមទៀត ដើម្បីទប់ស្កាត់ និងប្រឆាំងជំងឺកូវីដ១៩ តាមជើងយន្តហោះអាកាសយានដ្ឋានអន្តរជាតិភ្នំពេញ។ ចិនបញ្ជូនសម្ភារពេទ្យទាំងនោះ ចន្លោះពីថ្ងៃទី១១ដល់១៣ ឧសភា។ នេះបើតាមស្ថានទូតចិនប្រចាំកម្ពុជា។
ស្ថានទូតចិន បានបញ្ជាក់ថា សម្ភារពេទ្យដែលរដ្ឋាភិបាលខ្លួនបញ្ជូនមកនេះ មានសារធាតុតេស្តរកជំងឺវីរុសចំនួន៥០,០១៦សម្រាប់ ,សម្លៀកបំពាក់ការពារចំនួន១៨០០០កំផ្លេ, វ៉ែនតាការពារចំនួន៣០០០០ និងប្រដាប់វាស់កម្ដៅចំនួន២០០គ្រឿង។ សម្ភារទាំងនេះត្រូវបានទទួលដោយក្រសួងសុខាភិបាលកម្ពុជា។
ស្ថានទូតចិន បានបញ្ជាក់លើហ្វេសប៊ុកដូច្នេះថា៖«ប្រទេសចិននឹងបន្តផ្តល់ជំនួយជាសម្លៀកបំពាក់ការពារ ម៉ាស និងសម្ភារៈផ្សេងទៀតជាបន្តបន្ទាប់ បន្តផ្តល់កម្លាំងគាំទ្រក្នុងកិច្ចទប់ស្កាត់នឹងជំងឺវីរុសមួយនេះនៅក្នុងប្រទេសកម្ពុជា»។
រដ្ឋាភិបាលចិន អះអាងថា ខ្លួននឹងប្រឹងប្រែងជួយកម្ពុជាគ្រប់យ៉ាង ដើម្បីប្រយុទ្ធប្រឆាំង និងទប់ស្កាត់ការរីករាលដាលវីរុសCOVID-19នេះ។ នោះក៏ព្រោះតែកម្ពុជា បានបង្ហាញការគាំទ្រដល់រដ្ឋាភិបាលចិន ក្នុងគ្រាប្រយុទ្ធប្រឆាំងនឹងវីរុសCOVID-19 ដ៏លំបាកកន្លងមក។
លោក Geng Shuang អ្នកនាំពាក្យក្រសួងការបរទេសចិន បានបញ្ជាក់ដូច្នេះថា៖«ឥឡូវនេះកម្ពុជាកំពុងប្រឈមមុខនឹងការទប់ស្កាត់វីរុសCOVID-19 ដ៏កាចសាហាវ ។ ដូច្នេះវាមិនត្រឹមតែអាចនិយាយបានថា ចិននឹងធ្វើអ្វីគ្រប់យ៉ាងដើម្បីជួយកម្ពុជាទេ ហើយក៏មិនគ្រាន់តែជាតំណាងនៃទំនាក់ទំនងទ្វេភាគីពិសេសដែរ ប៉ុន្តែវាពិតជាសាកសមណាស់ សម្រាប់មិត្តភាពដែកថែប នៅក្នុងសហគមន៍វាសនារួមគ្នាតែមួយ។ ចិននឹងបន្តធ្វើការរួមគ្នាជាមួយកម្ពុជា ដើម្បីយកឈ្នះលើការរាតត្បាតនៃវីរុសCOVID-19នេះ ជាពិសេសរួមចំណែកដល់សន្តិសុខសុខភាពសាធារណៈក្នុងតំបន់ទៀតផង»។
គិតត្រឹមថ្ងៃទី១២ ឧសភានេះ កម្ពុជា នៅសល់អ្នកជំងឺកូវីដ១៩ តែ១នាក់ទៀតប៉ុណ្ណោះ ដែលកំពុងសម្រាកព្យាបាលជំងឺកូវីដ១៩ នៅមន្ទីរពេទ្យមិត្តភាពខ្មែរ-សូវៀត ក្រោយពីអ្នកជំងឺ១២១នាក់ បានជាសះស្បើយ៕
© រក្សាសិទ្ធិដោយ thmeythmey.com