កីឡាជាតិ
ជាតិ
ព្រឹត្តិការណ៍រត់ប្រណាំងពាក់កណ្តាលម៉ារ៉ាតុននៅសៀមរាប បន្តទទួលចុះឈ្មោះធម្មតា
× ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិនៅខេត្តសៀមរាប បន្តទទួលចុះឈ្មោះអ្នកចូលរួមធម្មតា ទោះបីបច្ចុប្បន្នដំណើរការនៃការប្រព្រឹត្តស្ថិតក្នុងភាពស្រពេចស្រពិលក៏ដោយ។ មកទល់ពេលនេះ មានព្រឹត្តិការណ៍រត់ប្រណាំងលំដាប់អន្តរជាតិពីរហើយ ត្រូវបានផ្អាកដំណើរការ ដោយសារការរាតត្បាតនៃជំងឺរលាកសួតបង្កឡើងដោយកូរ៉ូណាវីរុសប្រភេទថ្មី(កូវីដ-១៩)។
អគ្គលេខាធិការនៃគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន អះអាងថា មកទល់ពេលនេះមិនទាន់មានការសម្រេចណាមួយពាក់ព័ន្ធនឹងដំណើរការនៃការរៀបចំព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិនៅខេត្តសៀមរាបនោះទេ។ ពោលគឺ គណៈកម្មការរៀបចំព្រឹត្តិការណ៍នេះ នៅបន្តទទួលចុះឈ្មោះអ្នកចូលរួមដូចធម្មតា។
ក្នុងបទសម្ភាសជាមួយសារព័ត៌មាន Thmey Thmey កាលពីពេលថ្មីៗ លោក វ៉ាត់ ចំរើន ដែលជារដ្ឋលេខាធិការក្រសួងទេសចរណ៍ផងដែរនោះ បានបញ្ជាក់ដូច្នេះថា៖«ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិនៅខេត្តសៀមរាប យើងទុកមើលសភាពការសិន នៅក្នុងខែមិថុនា ឬខែកក្កដា យើងនឹងប្រកាសពីការផ្អាក ឬបន្តដំណើររៀបចំនៃព្រឹត្តិការណ៍នេះ»។
ព្រឹត្តិការណ៍នេះ ជាសមិទ្ធផលកីឡាទេសចរណ៍ធំជាងគេនៅកម្ពុជា ដែលអាចទាក់ទាញអ្នករត់ជាតិ និងអន្តរជាតិរាប់ម៉ឺននាក់ឲ្យចូលរួម។ ជាក់ស្តែងនៅឆ្នាំ២០១៩ ព្រឹត្តិការណ៍នេះមានអត្តពលិកចូលរួមចំនួន១០,៥០០នាក់ ដោយពួកគេមកពី៧៨ប្រទេសទូទាំងពិភពលោក។
ក្នុងករណីព្រឹត្តិការណ៍នេះត្រូវបានផ្អាក វាមិនត្រឹមតែធ្វើឲ្យប៉ះពាល់ដល់វិស័យទេសចរណ៍នោះទេ វិស័យសេដ្ឋកិច្ចក៏រងផលប៉ះពាល់ផងដែរ។ ដ្បិតទាំងរដ្ឋ និងប្រជាពលរដ្ឋ ដែលប្រកបអាជីវកម្មនៅខេត្តសៀបរាប ត្រូវប្រឈមបាត់បង់ប្រាក់ចំណូលរបស់ខ្លួន។ អ្នកដែលអាចរងផលប៉ះពាល់ខ្លាំងជាងគេ គឺអ្នកប្រកបអាជីវកម្មផ្នែកសណ្ឋាគារ ផ្ទះសំណាក់ ភោជណីយដ្ឋាន និងសេវាកម្មផ្សេងៗ។
គោលបំណងនៃព្រឹត្តិការណ៍នេះ គឺធ្វើឡើងដើម្បីប្រមូលថវិកាសប្បុរសធម៌ជួយដល់មន្ទីរពេទ្យគន្ធបុប្ផា និងអង្គការនានា និងជួយបំផុសស្មារតីប្រជាពលរដ្ឋឲ្យចេះថែរក្សា ការពារបរិស្ថានបៃតងក្នុងបរិវេណតំបន់ទេសចរណ៍ប្រវត្តិសាស្ត្រអង្គរ។ ការទាក់ទាញភ្ញៀវទេសចរឲ្យមកទស្សនាតំបន់ទេសចរណ៍ក្នុងខេត្តសៀមរាប ក៏ជាគោលបំណងផងដែរ។ បើគ្មានការប្រែប្រួលទេព្រឹត្តិការណ៍នេះនឹងប្រព្រឹត្តទៅនាអំឡុងខែធ្នូ ឆ្នាំ២០២០ នៅបរិវេណតំបន់ទេសចរណ៍ប្រវត្តិសាស្ត្រអង្គរក្នុងខេត្តសៀមរាប។
ដោយសារការរាតត្បាតនៃជំងឺកូវីដ-១៩ កម្ពុជាបានសម្រេចផ្អាករៀបចំព្រឹត្តិការណ៍រត់ប្រណាំងអន្តរជាតិធំៗចំនួនពីររួមមានពាក់កណ្តាលម៉ារ៉ាតុនអន្តរជាតិភ្នំពេញ ដែលគ្រោងធ្វើឡើងនាអំឡុងខែមិថុនា និងម៉ារ៉ាតុនអន្តរជាតិចក្រភពខ្មែរនៅខេត្តសៀមរាបនាអំឡុងខែសីហាឆ្នាំ២០២០៕
Tag:
រត់ប្រណាំង
ពាក់កណ្តាលម៉ារ៉ាតុនអន្តរជាតិ
វ៉ាត់ ចំរើន
© រក្សាសិទ្ធិដោយ thmeythmey.com