ជាតិ
សង្គមជាតិ
រដ្ឋាភិបាល មានគម្រោងសង់ព្រលានយន្តហោះមួយនៅខេត្តមណ្ឌលគិរី លោក ថោង ខុន រដ្ឋមន្ត្រីក្រសួងទេសចរណ៍ និងលោក ស្វាយ សំអ៊ាង អភិបាលខេត្តមណ្ឌលគីរី នាកិច្ចប្រជុំស្តីពីសិក្សារៀបចំផែនការមេសម្រាប់ការអភិវឌ្ឍវិស័យទេសចរណ៍នៅខេត្តមណ្ឌលគីរី
× ភ្នំពេញ៖ ខេត្តមណ្ឌលគីរី នឹងមានព្រលានយន្តហោះមួយ សម្រាប់ដឹកជញ្ជូនភ្ញៀវទេសចរក្នុងស្រុក ដំនាំកសិផល និងទំនិញនានាក្នុងស្រុក និងទៅបណ្តាប្រទេសមួយចំនួន។នេះបើតាមផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ដែលត្រូវបានបញ្ជាក់ដោយលោក ថោង ខុន រដ្ឋមន្ត្រីក្រសួងទេសចរណ៍។ ដ្បិតវា ស្ថិតនៅក្នុងផែនការ ប៉ុន្តែលោក ថោង ខុន សម្រួលដល់ការដឹកជញ្ជូនភ្ញៀវទេសចរ កសិផល និងទំនិញឆ្លងទៅគ្រប់ខេត្ត និងគ្រប់ប្រទេស
ទាក់ទងនឹងទីតាំង ទំហំដី និងដើមទុន សម្រាប់សាងសង់ គឺកំពុងតែសិក្សា តាមការរៀបចំផែនការមេអភិវឌ្ឍវិស័យទេសចរណ៍ ដែលរាជរដ្ឋាភិបាលប្រគល់ភារកិច្ចនេះ ឲ្យក្រសួងទេសចរណ៍ សហការជាមួយអភិបាលខេត្ត និងអន្តរក្រសួងដទៃទៀត ជាអ្នកចាត់ចែងគម្រោងមួយនេះ។
លោក ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា រាជរដ្ឋាភិបាលបានកំណត់ថានឹងសង់ព្រលានយន្តហោះមួយនៅខេត្តមណ្ឌលគិរី ដើម្បីដឹកជញ្ជូនភ្ញៀវទេសចរណ៍ និងអ្នកដំណើរពីតំបន់ទេសចរណ៍ធំៗដូចជាភ្នំពេញ,សៀមរាប និងតំបន់ឆ្នេរសមុទ្រជាដើម។ លោ ក ថោង ខុន បញ្ជាក់ដូច្នេះ នៅក្នុងកិច្ចប្រជុំគណៈកម្មការអន្តរក្រសួង ដើម្បីសិក្សារៀបចំផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី កាលពីថ្ងៃទី១១ ឧសភាកន្លងទៅ។
បើតាមលោករដ្ឋមន្ត្រីទេសចរណ៍ ដែលជាប្រធានគណៈកម្មការអន្តរក្រសួងផងនោះ បានបន្តថា ទៅអនាគត ព្រលានយន្តហោះខេត្តមណ្ឌលគិរីនេះ អាចត្រូវប្រើប្រាស់ជាព្រលានយន្តហោះក្នុងតំបន់ តភ្ជាប់ខេត្តមណ្ឌលគិរី ទៅគោលដៅទេសចរណ៍នៅប្រទេសជិតខាង ដូចជា ថៃ វៀតណាម និងឡាវ និងទីក្រុងសំខាន់ៗមួយចំនួនទៀតរបស់អាស៊ាន និងហួសទៅដល់ទីក្រុងសំខាន់ៗរបស់ចិនផងដែរ។
ទិដ្ឋភាពនៅខេត្តមណ្ឌលគីរី រូបភាពពីក្រសួងទេសចរណ៍
ដើម្បីឲ្យគម្រោងនេះជោគជ័យ លោក ថោង ខុន បានលើកឡើងថា ក្រសួងនឹងសហការជាមួយក្រសួង និងស្ថាប័នពាក់ព័ន្ធ ដើម្បីរៀបចំហេដ្ឋារចនាសម្ព័ន្ធនៅក្នុងខេត្ត ក៏ដូចជាជំរុញលើការកសាងផ្លូវច្រកទ្វារព្រំដែន សម្រាប់សម្រួលដល់ការធ្វើដំណើររបស់ភ្ញៀវទេសចរ និងការដឹកជញ្ជូនកសិផល និងទំនិញរបស់ពលរដ្ឋទៅកាន់ប្រទេសជិតខាង ពិសេសទៅប្រទេសវៀតណាម។
បើតាមក្រសួងទេសចរណ៍ ខេត្តមណ្ឌលគីរី មានតំបន់ទេសចរណ៍សក្តានុពលប្រមាណ៣៩កន្លែង តំបន់ទាំងនោះភាគច្រើន ជាតំបន់ទឹកជ្រោះ ទឹកធ្លាក់ធម្មជាតិ តំបន់វប្បធម៌ជនជាតិដើមភាគតិច ដែនជម្រកសត្វព្រៃ តំបន់ការពារធម្មជាតិ រមណីយដ្ឋានទេសចរណ៍កែច្នៃ ជ្រលងដងអូរ ភ្នំធម្មជាតិ។ ក្រៅពីវិស័យទេសចរណ៍ ខេត្តមណ្ឌលគិរី ក៏មានវិស័យសក្តានុពលខ្ពស់ ផ្នែកសិកម្មផងដែរ ពិសេសការដាំដុះបន្លែសរីរាង្គ៕
Tag:
ព្រលានយន្តហោះ
មណ្ឌលគីរី
ភ្ញៀវទេសចរ
ទំនិញ
កសិផល
មណ្ឌលគិរី
© រក្សាសិទ្ធិដោយ thmeythmey.com