ជាតិ
សង្គមជាតិ
នាយករដ្ឋមន្ត្រី ស្របតាមមតិរដ្ឋមន្ត្រីអប់រំ ក្នុងការពន្យារពេលបើកសាលា
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន យល់ស្របតាមលោក ហង់ជួន ណារ៉ុន ក្រសួងអប់រំ យុវជន និងកីឡា ដែលផ្តល់មតិក្នុងការពន្យារពេលបើកសាលារៀនឡើងវិញ ដើម្បីទប់ស្កាត់កុំឲ្យមានរលកទី២ នៃជំងឺកូវីដ-១៩។
នាកិច្ចប្រជុំគណៈរដ្ឋមន្ត្រី នៅព្រឹកថ្ងៃទី១៥ ខែឧសភា ប្រមុខរដ្ឋាភិបាល បង្ហាញក្តីបារម្ភថា៖«ក្រែងលោផ្ទុះឡើងវិញ ហើយទប់ស្កាត់លែងបាន ជាពិសេសការស្នើសុំឲ្យបើកសាលាឡើងវិញ គឺមិនគួរប្រញាប់ប្រញាល់ក្នុងការបើកទេ។ ប្រមុខរដ្ឋាភិបាល បន្តថា៖«ខ្ញុំ បានយល់ព្រមជាមួយនឹងលោក ហង់ជួន ណារ៉ុន ដើម្បីពន្យារការបើកសាលា ធានាឲ្យជីវិតរស់បានគង់វង្សសិន ប្រសិនបើវាចូលក្នុងសាលា គឺវាស្មើនឹងការចូលក្នុងសហគមន៍តែម្តង»។
កាលពីប៉ុន្មានថ្ងៃមុន អន្តរក្រសួងនិងស្ថាប័នអប់រំឯកជននានា បានបើកកិច្ចប្រជុំ ហើយក៏ស្នើឲ្យក្រសួងអប់រំ បើកសាលារៀនទៅទូទាំងប្រទេសឡើងវិញ។ លោក ហង់ជួន ណារ៉ុន បានដាក់លិខិត ជូនទៅសម្តេចនាយករដ្ឋមន្ត្រី ដើម្បីសម្រេចពីសំណើនេះ។
ក្នុងលិខិតនោះ លោក ហង់ជួន ណារ៉ុន បានបង្ហាញការមិនឯកភាពចំពោះការស្នើសុំឲ្យបើកសាលារៀននាពេលនេះ។ លោក បានលើកបទពិសោធនៅសិង្ហបុរី ជម្រាបទៅសម្តេចថា៖«កំហុសមួយនៃប្រទេសសិង្ហបុរី គឺការបណ្តោយឲ្យជំងឺនេះ ឆ្លងចូលសាលារៀន និងអន្តេវាសិកដ្ឋានកម្មករ ដែលធ្វើឲ្យសភាពការណ៍គ្រប់គ្រងលែងបាន»។
យ៉ាងណា ក្នុងលិខិតនោះ លោករដ្ឋមន្ត្រី ជូនដំណឹងទៅសម្តេចថា ក្រសួងអប់រំ នឹងពិចារណាពីការបើកសាលារៀនឡើងវិញ ឲ្យបានមុនថ្ងៃទី១ ខែវិច្ឆិកា ឆ្នាំ២០២០ ដែលជាថ្ងៃបើកបវេសនកាលឆ្នាំសិក្សាថ្មី។
ក្នុងកិច្ចប្រជុំគណៈរដ្ឋមន្ត្រី សម្តេច ហ៊ុន សែន ទទួលស្គាល់ថា កម្ពុជា បានធូរស្បើយពីជំងឺកូវីដ-១៩ ដែលនាំឲ្យប្រជាពលរដ្ឋ និងអាជីវករមួយចំនួន បានវិលមករកសភាពល្អប្រសើរវិញ។ ប៉ុន្តែ សម្តេច នៅតែទទូចឲ្យប្រជាពលរដ្ឋ បន្តប្រុងប្រយ័ត្ននឹងជំងឺនេះ៕
© រក្សាសិទ្ធិដោយ thmeythmey.com