ថ្លើម គឺជាប្រព័ន្ធមុខងារដ៏សំខាន់មួយនៃរាងកាយ ហើយវាមានតួនាទីចម្បងក្នុងការកម្ចាត់ជាតិពុល និងសារធាតុគីមីគ្រោះថ្នាក់ផ្សេងៗចេញពីរាងកាយ ក៏ដូចជាសរីរាង្គដទៃទៀត។ដូច្នេះការរក្សាឱ្យបាននូវសុខភាពថ្លើមល្អប្រសើរ គឺចាំបាច់ណាស់! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗទប់ស្កាត់បញ្ហាថ្លើមធ្ងន់ធ្ងរផ្សេងៗ ៖
១. ទទួលទានគ្រឿងស្រវឹងក្នុងកម្រិតមធ្យម
ភាគច្រើននៃពួកយើងសុទ្ធតែដឹងហើយថាការទទួលទានគ្រឿងស្រវឹងច្រើនជ្រុលអាចផលប៉ះពាល់គួរឱ្យព្រួយបារម្ភយ៉ាងណាចំពោះសុខភាពរាងកាយទាំងមូល រួមទាំងថ្លើម។ ដូច្នេះដើម្បីជាការប្រសើរប្រសិនបើមិនអាចផ្ដាច់បាន ចូរទទួលទានក្នុងកម្រិតមធ្យមដោយមិនគួរលើសពី ២ កែវក្នុងមួយថ្ងៃសម្រាប់បុរសនិងច្រើនជាង ១ កែវ ដែរសម្រាប់នារី។
២. រក្សាទម្ងន់ឱ្យបានត្រឹមត្រូវ
ការធាត់ជ្រុល ឬលើសទម្ងន់មិនត្រឹមតែជះឥទ្ធិពលលើសុខភាពបេះដូងប៉ុណ្ណោះទេ ប៉ុន្តែក៏ចំពោះថ្លើមដែរ។ ភាពធាត់ជ្រុលបង្កើនបរិមាណខ្លាញ់ច្រើនលើសក្នុងថ្លើមដែលអាចបង្កជាជំងឺខ្លាញ់រុំថ្លើមបានយ៉ាងងាយ។
៣. ធ្វើលំហាត់ប្រាណជាប្រចាំ
លំហាត់ប្រាណ គឺចាំបាច់ណាស់ដើម្បីរក្សាបាននូវសុខភាពរាងកាយទាំងមូលល្អប្រសើរ។ ការធ្វើលំហាត់ប្រាណជាប្រចាំផ្ដល់អត្ថប្រយោជន៍គួរឱ្យកត់សម្គាល់ដល់សុខភាពថ្លើមទប់ស្កាត់ការខូចខាតដោយសារភាពធាត់ជ្រុល។ អ្នកដែលមានបញ្ហាឡើងខ្លាញ់ច្រើនក្នុងថ្លើមក៏គួរធ្វើលំហាត់ប្រាណជាប្រចាំដើម្បីទប់ស្កាត់បញ្ហាកាន់តែធ្ងន់ធ្ងរ។
៤. បង្កើនការទទួលទានទឹក
ត្រូវប្រាកដថាអ្នកបានទទួលទានទឹកច្រើនគ្រប់គ្រាន់ក្នុងមួយថ្ងៃៗដើម្បីរក្សាបាននូវថ្លើមដែលមានសុខភាពល្អ។ ទឹកជួយកម្ចាត់ជាតិពុលដែលអណ្ដែតពេញក្នុងរាងកាយនិងជួយរក្សាជាតិទឹកក្នុងពេលជាមួយគ្នាផងដែរ។
៥. ប្រើប្រាស់ថ្នាំតាមវេជ្ជបញ្ជាត្រឹមត្រូវ
ដើម្បីរក្សាបាននូវសុខភាពថ្លើមល្អប្រសើរ អ្នកចាំបាច់គួរប្រើប្រាស់ ឬលេបថ្នាំណាមួយទៅតាមការណែនាំត្រឹមត្រូវ ឬវេជ្ជបញ្ជាគ្រូពេទ្យ។ ការលេបថ្នាំច្រើនពេក ឬប្រើប្រាស់ខុសអាចបង្កគ្រោះថ្នាក់គួរឱ្យព្រួយបារម្ភលើសុខភាពថ្លើម.
៦. ឈប់ជក់បារី
ការជក់បារីជាប្រចាំអាចបណ្ដាលឲ្យមានផលប៉ះពាល់ចំពោះសុខភាពថ្លើម ក៏ដូចជាសមត្ថភាពក្នុងការបំពេញមុខងារ។ ការជក់បារីផលិតនូវសារធាតុគីមីគ្រោះថ្នាក់ដែលបំផ្លាញកោសិកាថ្លើម និងពន្យឺតដំណើរការនៃមុខងាររបស់ថ្លើមដែលធ្វើឲ្យថ្លើមប្រែជាគ្មានប្រយោជន៍ ហើយបណ្ដាលឲ្យខ្សោយថ្លើម។ ដូច្នេះចូរព្យាយាមបញ្ឈប់ ឬកែប្រែទម្លាប់នៃការជក់បារីរបស់អ្នក ដើម្បីរក្សាបាននូវសុខភាពល្អ៕
ត្រួតពិនិត្យដោយ www.health.com.kh