អាជីវកម្មជាច្រើនស្ងាត់ភ្ញៀវ តែសេវាដឹកជញ្ជូនម្ហូបអាហារមមាញឹក ក្នុងរដូវកាលកូវីដ

COVID-19

ជាតិ

បទយកការណ៍ / បទសម្ភាសន៍

អាជីវកម្មជាច្រើនស្ងាត់ភ្ញៀវ តែសេវាដឹកជញ្ជូនម្ហូបអាហារមមាញឹក ក្នុងរដូវកាលកូវីដ

16, May 2020 , 3:37 pm

រូបភាព

ដោយ:

ភ្នំពេញ៖ ក្រុមហ៊ុនដឹកជញ្ជូនខ្នាតតូចចំនួន២ បានអះអាងថា នៅក្នុងអំឡុងពេលកម្ពុជាមានករណីជំងឺកូវីដ១៩ អាជីវកម្មរបស់ពួកគេ មានតម្រូវកាន់តែច្រើន ស្របពេលមនុស្សម្នាមិនហ៊ានចេញក្រៅផ្ទះ និងត្រូវការអាហារ និងទំនិញតាមប្រព័ន្ធអនឡាញ។

ជាបន្តសូមអញ្ជើញស្តាប់បទយកការណ៍ ដែលរៀបចំដោយ លោក រ៉ឹម ភារី ដូចតទៅ៖

ក្រោយពេលកម្ពុជារកឃើញអ្នកជំងឺកូវីដ-១៩លើកដំបូង លើជនជាតិចិនម្នាក់ នៅខេត្តព្រះសីហនុ បានឲ្យធ្វើប្រជាជនកម្ពុជា សម្រុកទៅទិញម៉ាស់ និងអាល់កុល និងចាប់ផ្តើមស្នាក់នៅផ្ទះ ព្រោះបារម្ភពីការឆ្លងរាលដាលជំងឺដ៏សាហាវនេះ។ ទន្ទឹមគ្នានេះ អាជីវកម្មជាច្រើន ទាំងអាហារដ្ឋាន ភោជនីយដ្ឋាន ហាងកាហ្វេ និងរមណីយដ្ឋានមួយចំនួន កាន់តែស្ងាត់ភ្ញៀវទៅៗ ហើយខ្លះត្រូវបង្ខំចិត្តបិទទ្វារផង ព្រោះតែគ្មានចំណូល។

ប៉ុន្តែមិនមែនអាជីវកម្មទាំងអស់ សុទ្ធតែរងផលប៉ះពាល់ពីវីរុសកូរ៉ូណា ឬជំងឺកូវីដ-១៩នោះទេ ក៏មានអាជីវកម្មមួយចំនួនដែរ ដែលនៅតែមានអតិថិជន ជាពិសេស ហាងលក់ដូរម្ហូបអាហារ។ ស្ងាត់ភ្ញៀវអង្គុយទទួលទានក្នុងហាង ប៉ុន្តែហាងទាំងនោះមមាញឹកនឹងការវេចខ្ចប់អាហារដែលភ្ញៀវបញ្ជាទិញតាម App។

ចំណែកសេវាកម្មដឹកជញ្ជូនម្ហូបអាហារ និងសម្ភារដែលបានបញ្ជាទិញតាមអនឡាញ ក៏ទទួលបានប្រជាប្រិយភាព និងទទួលបានការគាំទ្រជាច្រើនពីសំណាក់អតិថិជន។

លោក ចាន់ បូរីម៉ា ស្ថាបនិកសេវាដឹកជញ្ជូនម្ហូបអាហារយីហោ Nham24 ដែលមានហាងចំនួនជាង៣ពាន់ហាងជាដៃគូ កំពុងតែមមាញឹកខ្លាំង ក្នុងការដឹកជញ្ជូនអាហារទៅដល់ផ្ទះ ឬកន្លែងធ្វើការរបស់អតិថិជន។ បើតាមលោក ចាន់ បូរីម៉ា រដូវកាលកូវីដ-១៩នេះ ការដឹកជញ្ជូនម្ហូបអាហាររបស់ក្រុមហ៊ុនលោក មានកំណើនក្រែលដែរ និងបានជ្រើសរើសដៃគូដឹកជញ្ជូនបន្ថែម ដើម្បីបំពេញតម្រូវការរបស់អតិថិជន។

លោក ចាន់ បូរីម៉ា ស្ថាបនិកសេវាដឹកជញ្ជូនម្ហូបអាហារ Nham24

លោក ចាន់ បូរីម៉ា អះអាងថា លោកមានសេវាកម្មដឹកជញ្ជូនម្ហូបអាហាររបស់ខ្លួន មានការកើនឡើងប្រហែលពី២០ ទៅ៣០ភាគរយ នៅក្នុងអំឡុងពេលនៃការផ្ទុះឡើងជំងឺកូវីដ-១៩។ លោកថ្លែងដូច្នេះថា៖ «Order ម្ហូបអាហារហ្នឹងថ្មីៗហ្នឹង ឃើញមានការកើនឡើងមែន ព្រោះមនុស្សគាត់អត់ហ៊ានចេញទៅក្រៅ គាត់អត់ទៅញ៉ាំនៅហាង ព្រោះគាត់ខ្លាច ហើយអ្នកខ្លះគាត់ធ្វើការនៅផ្ទះ។ ប៉ុន្តែសម្រាប់ខ្ញុំ ការកើនឡើងហ្នឹង វាមិនមែនជានិរន្តរទេ វាគ្រាន់តែជាការកើនឡើងមួយរយៈកាលដែលយើងមានបញ្ហា ហើយបន្ទាប់ពីកូវីដមានភាពធូរស្រាលមកវិញ កំណើនហ្នឹងវានឹងធ្លាក់មកវិញដែរ»។

បើតាមស្ថាបនិក Nham24 ដដែល បន្ទាប់ពីមានតម្រូវការដឹកម្ហូបអាហារច្រើន ក្រុមហ៊ុនរបស់លោកក៏បានជ្រើសរើសដៃគូដឹកជញ្ជូនបន្ថែម ដែលកើនរហូតដល់៧០០នាក់ ដើម្បីបំពេញតម្រូវការរបស់អតិថិជន។ លោកបន្តថា អ្នកដឹកជញ្ជូនថ្មីៗទាំងនោះ ភាគច្រើនជាអ្នកបាត់បង់ការងារ និងអ្នករត់ម៉ូតូឌុប និងអ្នករត់រ៉ឺម៉កកង់បី។

លោកបន្តយ៉ាងដូច្នេះថា៖ «សូម្បីអ្នកបើករត់តុកតុក ដែលគាត់រត់លែងបាន គាត់ក៏មកសុំដឹកម្ហូប និងដឹកអីវ៉ាន់ដែរ។ អ៊ីចឹងយើងក៏បើកឲ្យគាត់ដឹកដែរ ដើម្បីទទួលបានចំណូល។ អ្នកមកសុំដឹកម្ហូបច្រើនណាស់ តែយើងក៏មិនទទួលទាំងអស់ដែរ ព្រោះយកច្រើនពេក យើងអត់មានអីឲ្យគេដឹកដដែល»។

ចំណែកក្រុមហ៊ុន ដឹកជញ្ជូនជូនអ្នក Joonaak ដែលជាក្រុមហ៊ុនដឹកសម្ភារខ្នាតតូច ក៏មានកម្មភាពមមាញឹកដែរ នៅក្នុងអំឡុងវិបត្តិកូវីដ-១៩នេះ។

លោក គង់ សុលីយ៉ា ដែលជាសហស្ថានិក បានប្រាប់សារព័ត៌មានថ្មីៗថា ក្នុងអំឡុងពេលកូវីដ-១៩ ផ្ទុះឡើងនៅកម្ពុជា ផលិតផលទូទៅដែលអតិថិជនបញ្ជាទិញមានការធ្លាក់បន្តិច តែមានការកើនឡើងនូវផលិតផលដូចជាម៉ាស់ និងទឹកអាល់កុលជាដើម។ យ៉ាងណា លោកអះអាងថា ការដឹកជញ្ជូនជាទូទៅ បានកើនឡើងខ្លាំងគួរសមដែរ ពោល គឺប្រហែល១៥ភាគរយ។

លោកបញ្ជាក់យ៉ាងដូច្នេះថា៖ «កំណើននៃការដឹក វាកើនឡើង ប៉ុន្តែផលិតផលដែលប្រជាជនយើងសម្រុកទិញតាមប្រព័ន្ធអនឡាញ វាមានការផ្លាស់ប្តូរ។ របស់ប្រើប្រាស់ប្រចាំថ្ងៃ ផលិតផលសម្អាតផ្ទះ ដូចជាកំណាត់ជូនសម្លាប់មេរោគ ទឹកបាញ់សម្លាប់មេរោគ ទឹកអាល់កុលលាងដៃ និងម៉ាស់មានការកើនឡើង។ ដូច្នេះការចាយលុយរបស់អតិថិជន ទៅលើផលិតផលផ្សេងៗដែលមិនសូវចាំបាច់ វាធ្លាក់ចុះមកវិញ។ ប៉ុន្តែសរុបភាគរយជារួម វាកើនឡើងប្រហែល១៥ភាគរយ។ ពីមុនយើងដឹកមួយថ្ងៃប្រហែល៧០០ជើង តែរដូវកូវីដហ្នឹង យើងកើនទៅ៨០០ទៅជិត៩០០ជើង»។

លោក គង់ សុលីយ៉ា ដែលជាសហស្ថានិក Joonaak

លោក គង់ សុលីយ៉ា បន្តថា បច្ចុប្បន្ន ជាមធ្យមប្រចាំខែ លោកមានក្រុមការងារសរុប ប្រហែល១២៥នាក់។ បន្ទាប់ពីមានកំណើនការដឹកជញ្ជូន ក្រុមហ៊ុនរបស់ខ្លួន បានជ្រើសរើសដៃគូដឹកជញ្ជូនបន្ថែមជារៀងរាល់ថ្ងៃ ដើម្បីបំពេញតម្រូវការរបស់អតិថិជន។ លោកបន្ថែមថា៖ «ក្នុងអំឡុងពេលកូវីដនេះ យើងជ្រើសរើសដៃគូរាល់ថ្ងៃ ដោយមូលហេតុពីរ។ ទីមួយ កំណើនភ្ញៀវថ្មីៗ ដែលគាត់ទាក់ទងមកចង់ប្រើសេវាកម្មយើង។ ទីពីរ យើងមានបុគ្គលិក ដែលមានការភ័យខ្លាច ដូច្នេះយើងត្រូវការរកបុគ្គលិក កាន់តែខ្លាំងជាងមុន»។

លោក ទេព ចាន់វិបុល គឺជាអ្នកដឹកម្ហូបដែលភ្ញៀវកម្មង់តាម APP។ លោក វិបុល ប្រាប់សារព័ត៌មានថ្មីៗថា ក្នុងអំឡុងកូវីដ-១៩នេះ ការងារដឹកជញ្ជូនរបស់ខ្លួនមមាញឹកជាងមុន។ ទើបតែបានសម្រាកបន្តិច ក្រោយដឹកម្ហូបទៅឲ្យអតិថិជន លោក ចាន់វិបុល បានឆ្លៀតរៀបរាប់ប្រាប់សារព័ត៌មានថ្មីៗទៀតថា រាល់ថ្ងៃនេះ លោកអាចរកចំណូលបានប្រហែល២០ ទៅ២៥ដុល្លារ។(មុនកូវីដបានប៉ុន្មាន? បើមានបញ្ចូលផង)

ទោះជាយ៉ាងនេះក្តី អ្នកដឹកជញ្ជូនរូបនេះ ក៏រអារឆ្លងជំងឺខ្លះៗដែរ ព្រោះតែខ្លួនត្រូវជួបអតិថិជនផ្សេងៗគ្នាដែលមួយថ្ងៃៗ។ លោកនិយាយដូច្នេះ៖«ចេះតែភ័យៗដែរ តែយើងមានទឹកអាល់កុល និងម៉ាស់ពេលដឹកឲ្យភ្ញៀវ។ ក្រុមហ៊ុនគេចែកទឹកអាល់កុល និងម៉ាស់ឲ្យដែរ។ កាលពីស្ថានភាពកូវីដឡើងខ្លាំង ខ្ញុំឈប់ដែរហ្នឹង តែពេលធូរស្បើយ ទើបត្រឡប់មកដឹកវិញ»។

លោក ប្រាក់ សំអូន អាយុ២៣ឆ្នាំ ជាអតិថិជនម្នាក់ ដែលទើបងាកមកប្រើការកម្ម៉ង់ម្ហូបតាម App អំឡុងពេលជំងឺកូវីដ-១៩រាតត្បាត។ លោកប្រាប់សារព័ត៌មានថ្មីៗថា លោកចូលចិត្តញ៉ាំបាយ និងកាហ្វេនៅក្រៅផ្ទះ ប៉ុន្តែបន្ទាប់ពីកម្ពុជាមានជំងឺដ៏សាហាវនេះ លោកក៏កម្ម៉ង់ម្ហូប តាម App វិញ ដើម្បីគេចពីការជួបជុំនៅតាមហាងកាហ្វេ និងអាហារដ្ឋាន។

មានរាងខ្ពស់ និងសម្បុរសណ្តែកបាយ យុវជនសំអូន បញ្ជាក់ថា៖ «ខ្ញុំចូលចិត្តកម្ម៉ង់អនឡាញ ព្រោះតែខ្ជិលចេញក្រៅ។ ដូចដឹងស្រាប់ថា សម័យកូវីដ-១៩ យើងកាត់បន្ថយទៅក្រៅ ទៅហាងអ៊ីចឹងទៅ។ ចឹងទើប Order តាមអនឡាញ។ សេវាកម្មនេះល្អដែរតើ ហាងនៅជិតលឿនចឹងទៅ ហាងនៅឆ្ងាយយឺតចឹងទៅ»៕