របបអាហារប្រចាំថ្ងៃ មានសារៈសំខាន់ខ្លាំងណាស់ ចំពោះការទ្រង់ទ្រង់សុខភាពលោកអ្នកឲ្យល្អ រាងកាយមាំមួន ចៀសឆ្ងាយពីជំងឺនានា។ ក្នុងអំឡុងពេលកម្ពុជា និងពិភពលោក កំពុងជួបប្រឈមនឹងជំងឺរាតត្បាត កូវីដ-១៩ វារឹងរឹតតែធ្វើឲ្យលោកអ្នក យកចិត្តទុកដាក់កាន់តែខ្លាំងក្លាបន្ថែមទៀត ចំពោះការពង្រឹងប្រព័ន្ធភាពស៊ាំនៅក្នុងរាងកាយរបស់យើង។
ដើម្បីជួយពង្រឹងភាពស៊ាំរាងកាយនោះ លោកអ្នកមិនគួរមើលរំលង ពពួកអាហារដែលសម្បូរទៅដោយ វីតាមីន A, C, Dនិង វីតាមីន E នោះទេ។ តើហេតុអ្វីបានជាសារធាតុនេះទាំងនេះ ចាំបាច់សម្រាប់រាងកាយយើង ហើយតើអាហារណាខ្លះ ដែលសម្បូរសារធាតុទាំងនេះ? ខាងក្រោមនេះ គឺជាចម្លើយ៖
វីតាមីនA ជាសារធាតុចិញ្ចឹមដ៏សំខាន់ដែលខ្លួនប្រាណយើងត្រូវការមិនអាចខ្វះបាន តែបញ្ហានៅត្រង់ថា កោសិកាយើងមិនអាចផលិតវាបានឡើយ។ ដូច្នេះវិធីល្អបំផុត គឺយើងត្រូវទទួលទានអាហារ ដែលមានផ្ទុកនូវសារធាតុទាំងនេះ។ អាហារដែលសម្បូរវីតាមីន A រួមមាន ទឹកដោះគោ ស៊ុត ត្រី និងថ្លើមសត្វ គ្រឿងសមុទ្រ ការ៉ុត និងបន្លែបៃតងជាដើម។
វីតាមីន C ជាអង់ទីអ៊ុកស៊ីដង់ដ៏សំខាន់ និងមានប្រយោជន៍សម្រាប់សុខភាព។ វាក៏អាចប្រយុទ្ធប្រឆាំងនឹងភាពចាស់ជរារបស់កោសិកាផងដែរ។ វីតាមីន C នេះ គឺមាននៅគ្រប់បន្លែ និងផ្លែឈើស្រស់ទាំងអស់ ជាពិសេសផ្លែបឺរី ក្រូច និងម្ទេសប្លោក។
វីតាមីន D ត្រូវបានគេចាត់ទុកថាជួយព្យាបាលដល់ជំងឺជាច្រើន។ ការសិក្សាថ្មីៗបង្ហាញ ពីទំនាក់ទំនងរវាងការកង្វះវីតាមីន D និងជំងឺមួយចំនួនដូចជាការធាត់ជ្រុល ជំងឺបេះដូង ជំងឺក្រិនរឹងច្រើនកន្លែង មហារីក និងការបាក់ទឹកចិត្តជាដើម។ អាហារដែលផ្ទុកទៅដោយ វីតាមីន D មានដូចជា ត្រីសម្បូរខ្លាញ់ ស៊ុត ទឹកសណ្តែកសៀង-ល-។
វីតាមីន E គឺជាសមាសធាតុប្រឆាំងអុកស៊ីដកម្មដ៏ខ្លាំងក្លាមួយ ហើយផលប្រយោជន៍របស់វាទៅលើសុខភាពមនុស្សយើងក៏មានច្រើនដែរ ។ វីតាមីន E ជួយថែរក្សាស្បែក និងការពារកាំរស្មីយូវី , ជួយឲ្យសក់មានសុខភាពល្អ និងរឹងមាំ, ជួយពង្រឹងភាពចង់ចាំរបស់ខួរក្បាល, ជួយជំរុញ ដល់ការផលិតកោសិកាឈាម ក្រហម ហើយវីតាមីន Eនេះទៀតសោត ក៏ជួយឱ្យបេះដូង និងសរសៃឈាមកាន់តែរឹងមាំដែរ។ វីតាមីន E មាននៅក្នុងគ្រាប់ធញ្ញជាតិ និងប្រេងបន្លែផ្សេងៗ ផ្លែឈើ បន្លែបៃតង និងការ៉ុតជាដើម។
ក្រៅតែពីរបបអាហារខាងលើនេះ ការហាត់ប្រាណជាប្រចាំ ក៏ជាចំណែកមួយដ៏សំខាន់ផងដែរ ដែលជួយឲ្យលោកអ្នកចៀសឆ្ងាយពីជំងឺផ្សេងៗ ជាពិសេស គឺការជួយពង្រឹងប្រព័ន្ធភាពស៊ាំនៃរាងកាយនេះឯង។ ហើយវាគឺជាអាវុធដ៏មានប្រសិទ្ធភាព ក្នុងការប្រយុទ្ធនឹងជំងឺផ្សេងៗ។ ដូច្នេះកុំភ្លេចហាត់ប្រាណឲ្យទៀងទាត់ផងណា! ៕
(អត្ថបទពាណិជ្ជកម្ម)