គ្រូ Newcastle៖ ផ្សារទំនើប និងកន្លែងចាក់សាំងមានហានិភ័យឆ្លង COVID-19 ជាងកន្លែងទាត់បាល់

COVID-19

កីឡាអន្តរជាតិ

អន្តរជាតិ

គ្រូ Newcastle៖ ផ្សារទំនើប និងកន្លែងចាក់សាំងមានហានិភ័យឆ្លង COVID-19 ជាងកន្លែងទាត់បាល់

18, May 2020 , 9:19 pm

រូបភាព

ដោយ: ទេព ពិទូរ្យ

លោក Steve Bruce អ្នកចាត់ការទូទៅ Newcastle United យល់ឃើញថាការធ្វើដំណើរក្នុងផ្សារទំនើប ឬស្ថានីយចាក់សាំងរថយន្តអាចបង្កហានិភ័យដល់ការឆ្លងជំងឺ COVID-19 ខ្លាំងជាងការវិលត្រឡប់ទៅកាន់ការប្រកួតកីឡាបាល់ទាត់វិញក្រោមលក្ខខណ្ឌតឹងរ៉ឹងទៅទៀត។

រដ្ឋាភិបាលអង់គ្លេស កំពុងត្រៀមបើកទ្វារសម្រាប់ក្របខណ្ឌលីគកីឡាបាល់ទាត់អាជីពក្នុងប្រទេសអង់គ្លេសនាខែមិថុនាខាងមុខនេះ ក្រោមការប្រកួតបិទទ្វារកីឡដ្ឋាន។ ក្រុមនៅក្របខណ្ឌ Premier League រួមទាំង Newcastle ផងសុទ្ធតែបានផ្អាកការប្រកួតបណ្តោះអាសន្នតាំងពីថ្ងៃទី៧ ខែមីនា ដោយសារវិបត្តិជំងឺ COVID-19។

យ៉ាងណាក៏ដោយ ក្រោយទទួលបានភ្លើងបៃតងនៃការបើកដំណើរការលីគសារជាថ្មី លោក Bruce លើកឡើងថា កីឡាកររបស់លោកនៅមិនទាន់មានភាពល្អប្រសើរក្នុងការវិលត្រឡប់ទៅកាន់ការប្រកួតវិញនោះទេរហូតដល់ចុងខែមិថុនា។

អ្នកចាត់ការសញ្ជាតិអង់គ្លេសរូបនេះបានប្រាប់កាសែត Sunday Telegraph ថា៖«ពួកគេបានសម្រាក ៨ សប្តាហ៍មកហើយ នោះប្រហែលជាការសម្រាកយូរបំផុតដែលកីឡាករបានជួបក្នុងអាជីពរបស់ពួកគេ។ អ្នកចាត់ការទូទៅភាគច្រើនរួមទាំងខ្ញុំ មានការព្រួយបារម្ភដូចគ្នាអំពីកីឡាកររបស់ខ្លួន ដ្បិតគ្មានការប្រកួតកំដៅសាច់ដុំមុនចូលកាប្រកួតផ្លូវការ»។

ក្លិបនៅលីគកំពូលអង់គ្លេសសង្ឃឹមថានឹងវិលត្រឡប់ទៅកាន់ការហ្វឹកហាត់ជាក្រុមវិញនៅថ្ងៃទី១៩ ខែឧសភា ក្រោយមានកិច្ចប្រជុំធំមួយនៅថ្ងៃទី១៨ ខែឧសភានេះ ប៉ុន្តែត្រូវអនុវត្តតាមគោលការគម្លាតសុវត្តិភាព។ ស្របគ្នានេះ លោក Bruce យល់ឃើញថា ទីតាំងដែលមានហានិភ័យនៃការឆ្លង COVID-19 មាននៅផ្សារទំនើ ឬក៏នៅកន្លែងចាក់សាំងឡាន គឺមានភាគរយច្រើនជាងទីលានការប្រកួតកីឡាបាល់ទាត់ទៅទៀត។

លោក Bruce ក៏ព្រមានដែរថា កូនក្រុមរបស់ខ្លួនអាចនឹងជួបបញ្ហារបួសប្រសិនបើពួកគេមិនទទួលបានពេលវេលាគ្រប់គ្រាន់ក្នុងការវិលត្រឡប់ទៅកាន់ការប្រកួតវិញទេនោះ។

មកទល់ពេលនេះ ក្របខណ្ឌ Bundesliga របស់អាល្លឺម៉ង់បានបើកការប្រកួតលីគរបស់ខ្លួនវិញហើយកាលពីចុងសប្តាហ៍កន្លងទៅ ប៉ុន្តែត្រូវគោរពតាមគោលការជាច្រើនដើម្បីចៀងវាងការឆ្លងជំងឺរាតត្បាតសកល៕