COVID-19
កីឡាអន្តរជាតិ
អន្តរជាតិ
COVID-19៖ ក្លិបកំពូលនៅអឺរ៉ុបនឹងបាត់ចំណូល៤ពាន់លានដុល្លារ ទោះវិលចូលប្រកួតវិញក៏ដោយ
× ក្លិបកីឡាបាល់ទាត់កំពូលៗនៅអឺរ៉ុប នឹងបាត់ចំណូលលើសពី ៣,៥ ពាន់លានផោន (៤,២៤ពាន់លានដុល្លារអាមេរិក) ដោយសារវិបត្តិ COVID-19 ទោះបីលីគក្នុងស្រុក និងការប្រកួតធំៗ ឈានទៅរកការប្រកួតវិញក៏ដោយ។ តួលេខនេះ ត្រូវបានប៉ាន់ស្មានសម្រាប់រយៈពេល ពីរដូវកាលនេះ រហូតដល់រដូវកាលក្រោយ ដែលត្រូវបានបង្ហាញ ក្នុងកិច្ចប្រជុំរវាងភាគីពាក់ព័ន្ធសប្តាហ៍មុន។
លីគកីឡាបាល់ទាត់កំពូលៗនៅអឺរ៉ុប បានចាប់ផ្តើមចូលហ្វឹកហាត់វិញហើយ ដូចជា Premier League, Serie A និង La Liga ជាដើម ក្រោយផ្អាកជាងពីរខែ ខណៈ Bundesliga របស់អាល្លឺម៉ង់ បានត្រឡប់ទៅកាន់ការប្រកួតលីគរបស់ពួកគេវិញ នៅចុងសប្តាហ៍មុន។ យ៉ាងណាក៏ដោយ គេឃើញមានការប៉ាន់ស្មានថា ប្រសិនបើការវិលទៅរកការប្រកួត សម្រាប់ពេលដែលនៅសេសសល់ មិនបានជោគជ័យនោះ ការខាតបង់អាចកើនឡើងដល់ជាង ៦,២ ពាន់លានផោន (៧,៥៦ពាន់លានដុល្លារអាមេរិក)។
សហព័ន្ធកីឡាបាល់ទាត់អឺរ៉ុប (UEFA) គ្រប់គ្រងលីគទាំងអស់មកពីប្រទេសសមាជិក៥៥ ប៉ុន្តែក្លិបដែលប្រឈមនឹងការបាត់ចំណូលខ្ពស់ មានចំនួន២៨ប៉ុណ្ណោះ ដែលមកពី១២ប្រទេស ជាពិសេសក្លិបមានកៅអីលេងនៅក្របខណ្ឌ Champions League និង Europa League។ គេកត់សម្គាល់ថា ទឹកប្រាក់ដែលក្លិបជាច្រើនត្រូវទទួលបាន បែរជាត្រូវដកចេញវិញ បើទោះការប្រកួត ឈានដល់ជាងពាក់កណ្តាលរដូវកាលទៅហើយក្តី។
គណៈកម្មការ និងក្រុមការងារជាច្រើន ដែលបានបង្កើតឡើងដោយ UEFA មើលឃើញបញ្ហាដែលបណ្តាលមកពីផលប៉ះពាល់ នៃជំងឺ Covid-19 នឹងមានរយៈពេលយូរ រហូតដល់រដូវកាលក្រោយៗទៀត។
បើទោះបីលីគចាប់ផ្តើមឡើងវិញក៏ដោយ ប៉ុន្តែការប្រកួតគ្មានអ្នកទស្សនា បានធ្វើឲ្យក្រុម Borussia Dortmund ត្រូវបានប៉ាន់ស្មានថា ត្រូវចំណាយអស់ប្រាក់ ២,៦ លានផោន (៣,១៧លានដុល្លារអាមេរិក) ក្នុងមួយប្រកួត។
ដោយឡែក អ្នកវិភាគអាជីវកម្មលោក Vysyble ប៉ាន់ស្មានថា ក្លិបនៅ Premier League នឹងបាត់បង់ប្រាក់ជាង១ពាន់លានដុល្លារ ប្រសិនបើការប្រកួតត្រូវបិទទ្វារ រហូតដល់ចប់រដូវកាលក្រោយ ២០២០-២១។ ក្លិបធំៗ ដែលនឹងទទួលរងការខាតបង់ច្រើនជាងគេ មាន Manchester United នឹងបាត់បង់ប្រាក់ ១៤០ លានផោន (១៧០លានដុល្លារ) ហើយ Arsenal ១២២ លានផោន (១៤៩លានដុល្លារ)៕
Tag:
COVID-19
បាត់ចំណូល
Premier League
© រក្សាសិទ្ធិដោយ thmeythmey.com