ជាតិ
បំណែកព្រះពុទ្ធរូប ត្រូវបានយកចេញពីរណ្តៅកំណាយនៅមុខថែវព្រះរយព្រះពាន់ ដើម្បីសិក្សា និងជួសជុល
ព្រះពុទ្ធបដិមា១អង្គ ក្នុងចំណោមបដិមាជាច្រើន ដែលត្រូវបានរកឃើញនៅពេលធ្វើកំណាយ នៅមុខថែវព្រះរយព្រះពាន់ នៅប្រាសាទអង្គរវត្ត។ រូបភាព៖ទំព័រហ្វេសប៊ុកអាជ្ញាធរជាតិអប្សរា
×![]()
ដោយ: ថ្មីៗ
អាជ្ញាធរជាតិអប្សរា នៅថ្ងៃទី១៩ ឧសភា នេះ បានរៀបចំពិធីយោងបំណែកព្រះពុទ្ធបដិមាដែលបានរកឃើញនៅក្នុងរណ្តៅកំណាយមុខថែវព្រះរយព្រះពាន់នៅប្រាសាទអង្គរវត្ត ដើម្បីសិក្សាផ្គុំរូបរាង និងជួសជុលឡើងវិញ និងដើម្បីសម្រួលដល់ការបញ្ចប់ការងារការងារកំណាយនៅទីនោះ។ តាមការផ្សាយនៅទំព័រហ្វេសប៊ុករបស់ អាជ្ញាធរជាតិអប្សរា បំណែកព្រះពុទ្ធបដិមាដែលបានរកឃើញមានចំនួន១០៥ ក្នុងនោះពុទ្ធបដិមាមានរូបមិនពេញលេញមាន៣៥អង្គ និង១អង្គ មានរូបរាងពេញលេញជាងគេ សន្លឹកសីមា១ រួមនឹងបំណែកតូចៗចំនួន១៨០។
ហង់ ពៅ អគ្គនាយកអាជ្ញាធរជាតិអប្សរា ក៏បានបញ្ជាក់នៅក្នុងសំណេរលើទំព័រហ្វេសប៊ុកដដែលនេះថា បដិមា១ អង្គដែលមានរូបរាងពេញលេញជាងគេ ដែលទំនងមានកាលបរិច្ឆេទក្នុងសម័យកណ្តាល នឹងត្រូវជួសជុលសម្អាត ហើយស្នើសុំគណៈកម្មការអាយស៊ីស៊ី-អង្គរ ដើម្បីយកទៅដាក់នៅទីតាំងដើមវិញ គឺនៅថែវព្រះរយព្រះពាន់៕
© រក្សាសិទ្ធិដោយ thmeythmey.com
