COVID-19
កីឡាអន្តរជាតិ
អន្តរជាតិ
សមាជិកក្លិប Watford និង Burnley ស្ថិតក្នុងចំណោមអ្នកឆ្លង COVID-19 ៦នាក់នៅ Premier League
× កីឡាករម្នាក់ និងបុគ្គលិកពីរនាក់របស់ Watford រួមទាំងជំនួយការអ្នកចាត់ការទូទៅក្រុម Burnley លោក Ian Woan ស្ថិតក្នុងចំណោមអ្នកធ្វើតេស្តចេញលទ្ធផលវិជ្ជមានជំងឺ COVID-19 ទាំង៦នាក់នៅ Premier League។
ដោយឡែក អ្នកឆ្លងជំងឺរលាកសួតបង្កដោយកូរ៉ូណាប្រភេទថ្មីចំនួនពីរនាក់ទៀត ដែលស្ថិតក្នុងក្លិបនៃលីគកំពូលអង់គ្លេសនេះ មិនត្រូវបានបញ្ចេញឲ្យដឹងពីអត្តសញ្ញាណ និងឈ្មោះក្លិបនោះទេ។
កីឡាករ និងបុគ្គលិក ដែលធ្វើតេស្តរកឃើញថាឆ្លង COVID-19 ទាំង៦នាក់ ត្រូវបញ្ជូនទៅដាក់ឲ្យនៅដាច់ដោយឡែកពីគេ រយៈពេល៧ថ្ងៃ ដោយស្ថិតក្រោមការឃ្លាំមើល និងព្យាបាល។
ការរកឃើញអ្នកឆ្លងថ្មី ក្នុងក្រុមកីឡាបាល់ទាត់កំពូលនេះ កើតឡើងចំពេលដែលក្រុមបានចាប់ផ្តើមការហ្វឹកហាត់ឡើងវិញ នៅថ្ងៃទី១៩ ខែឧសភា បន្ទាប់ពី Premier League បង្កើនផែនការ សម្រាប់ការចាប់ផ្តើមការប្រកួតលីគឡើងវិញ។ លីគកំពូលៗនៅអឺរ៉ុប បានផ្អាកការប្រកួតបណ្តោះអាសន្ន តាំងពីថ្ងៃទី១៣ ខែមីនា ដោយសារការរាលដាលដ៏ខ្លាំងក្លា នៃជំងឺរាតត្បាតសកល ដែលបានសម្លាប់មនុស្សរាប់ម៉ឺននាក់ ជុំវិញពិភពលោក។
កីឡាករ បុគ្គលិក និងអ្នកពាក់ព័ន្ធសរុបចំនួន ៧៤៨នាក់ មកពី១៩ក្លិបនៅ Premier League ត្រូវបានធ្វើតេស្តរកជំងឺ COVID-19។ Norwich City ដែលធ្លាប់មានករណីសមាជិកឆ្លងរួចមកហើយនោះ ទើបទទួលការធ្វើតេស្តនៅថ្ងៃទី១៩ ខែឧសភា។
Watford បានបញ្ជាក់ថាកីឡាករម្នាក់ និងបុគ្គលិកពីរនាក់ បានធ្វើតេស្តវិជ្ជមាន COVID-19 ប៉ុន្តែពួកគេមិនបង្ហាញអត្តសញ្ញាណសមាជិករបស់ពួកគេឡើយ ដោយបានស្នើសុំការសម្ងាត់ពីខាងក្រុមគ្រូពេទ្យ។ មុនពេលព័ត៌មាន អំពីការធ្វើតេស្តវិជ្ជមាន របស់ Watford នេះ ប្រធានក្រុម Troy Deeney ធ្លាប់បាននិយាយថា រូបគេនឹងមិនវិលត្រឡប់ទៅហ្វឹកហាត់វិញទេ ព្រោះបារម្ភពីសុខភាពសមាជិកគ្រួសាររបស់គេ។
ចំណែកក្លិប Burnley បានបញ្ជាក់ដែរថា លោក Woan ពិតជាមានផ្ទុកជំងឺ COVID-19 មែន ហើយបច្ចុប្បន្នលោកកំពុងស្នាក់នៅផ្ទះ និងមានសុវត្ថិភាពល្អប្រសើរ៕
Tag:
Premier League
COVID-19
Watford
Burnley
© រក្សាសិទ្ធិដោយ thmeythmey.com