COVID-19
អន្តរជាតិ
រដ្ឋមន្ត្រីសុខាភិបាលបារាំង៖ គ្មានសញ្ញាកើនឡើង COVID-19 ជាថ្មីឡើយ បន្ទាប់ពីបន្ធូរការរឹតត្បិត រដ្ឋមន្រ្តីសុខាភិបាលបារាំង លោក Oliver Veran។ រូបភាព៖ Reuters
× គ្មានសញ្ញាណាមួយ បញ្ជាក់នៅឡើយថា ការបន្ធូរបន្ថយការការរឹតត្បិតនៅក្នុងប្រទេស នឹងបង្កឲ្យមានករណីឆ្លង ជំងឺរលាកសួត ដែលបង្កដោយកូរ៉ូណាវីរុស (COVID-19) ជាងមុន នៅក្នុងប្រទេសបារាំង។ រដ្ឋមន្ត្រីសុខាភិបាលបារាំងOliver Veran បានលើកឡើងបែបនេះ នៅថ្ងៃទី២០ ខែឧសភា ប៉ុន្តែក៏ទទួលស្គាល់ថា នេះក៏ជាការវាយតម្លៃលឿនពេកផងដែរ។
បារាំង បានបន្ធូរបន្ថយការរឹតត្បិតតាំងពីថ្ងៃទី១១ ខែឧសភាមកម្លេះ ដើម្បីជួយសង្គ្រោះសេដ្ឋកិច្ចរបស់ខ្លួន ដែលបានរងការគំរាមកំហែងដោយសារការបិទប្រទេសក្នុងរយៈពេលជិត ២ខែកន្លងមក។ យ៉ាងណាក៏ដោយ ការបើកប្រទេសនេះ បារាំងធ្វើឡើងតែមួយផ្នែកប៉ុណ្ណោះ ដើម្បីបង្ការ និងទប់ស្កាត់ការកើនឡើងករណីឆ្លង COVID-19 ជាថ្មី ក៏ដូចជារលកឆ្លងទី២ នៃកូរ៉ូណាវីរុស។
ពាក់ព័ន្ធនឹងកាបើកប្រទេសឡើងវិញ លោករដ្ឋមន្ត្រីសុខាភិបាលបារាំង Oliver Veran បានបញ្ជាក់ថា បន្ទាប់ពីបន្ធូរបន្ថយការបិទប្រទេសប៉ុន្មានថ្ងៃចុងក្រោយនេះ បារាំង មិនបានបង្ហាញសញ្ញានៃការកើនឡើងករណីឆ្លង COVID-19 ជាថ្មីឡើយ ប៉ុន្តែវាមិនមែនមានន័យថា បារាំងនឹងមិនកើនឡើងករណីឆ្លងនាពេលខាងមុខនោះទេ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
យ៉ាងណាក៏ដោយ ការវាយតម្លៃនេះ ក៏លឿនពេកដែរ ព្រោះបារាំងទើបតែបើកប្រទេសដោយផ្នែកឡើងវិញក្នុងរយៈពេលតែប៉ុន្មានថ្ងៃប៉ុណ្ណោះ ពោលគឺ ត្រូវការពេលយ៉ាងហោចណាស់ពី ១០ថ្ងៃ ទៅ១៥ថ្ងៃ ដើម្បីដឹងពីផលប៉ះពាល់ ឬការកើនឡើងករណីឆ្លងនៃ COVID-19។ លោករដ្ឋមន្ត្រីសុខាភិបាលបារាំងវ័យ៤០ឆ្នាំ បានបញ្ជាក់បែបនេះ ដោយបន្តថា តួលេខអ្នកជំងឺព្យាបាលនៅមន្ទីរពេទ្យ និងអ្នកជំងឺក្នុងបន្ទប់សង្គ្រោះបន្ទាន់ គឺមានការធ្លាក់ចុះជាលំដាប់។
ចំណែកប្រធានាធិបតីបារាំង លោក អេម៉ានុយអ៊ែល ម៉ាក្រុង នៅក្នុងថ្ងៃដដែលនេះ ក៏បានអំពាវនាវឲ្យប្រជាជនបារាំងបន្តប្រុងប្រយ័ត្នចំពោះ COVID-19 ផងដែរ ខណៈពេលប្រជាជនបារាំង ត្រៀមប្រារព្ធពិធីបុណ្យព្រះយេស៊ូមានជីវិតឡើងវិញ (Ascension Day) នៅក្នុងប្រទេស នាថ្ងៃទី២១ ខែឧសភា។
គិតមកត្រឹមពេលនេះ បារាំងមានករណីCOVID-19 សរុបចំនួន ១៨១១៣២ករណី អ្នកស្លាប់ចំនួន ២៨១៣២នាក់ និងអ្នកជាសះស្បើយមានចំនួន ៦៣៣៥៤នាក់៕
© រក្សាសិទ្ធិដោយ thmeythmey.com