​យន្តហោះ​គឺជា​យានជំនិះ​មួយ​ប្រភេទ​ដែលមាន​លក្ខណៈ​ទំនើប និង​ស្មុគស្មាញ​ក្នុងការ​ប្រើប្រាស់ ផលិត ថែរក្សា និង​រៀន​ពី​វា​។ វា​ទាមទារ​ការមើល​ថែ​ខ្លាំង​ពី​សំណាក់​អ្នកប្រើប្រាស់ និង​ភាព​យកចិត្តទុកដាក់​ខ្ពស់​នៅពេល​បើកបរ​។ ការបើកបរ​ហួស​ល្បឿន​កំណត់​មិនមែនជា​រឿង​មួយ​ដែល​ឧស្សាហ៍​កើតឡើង​ញឹកញាប់​នោះទេ ដោយសារតែ​វិន័យ​ក្នុង​ការបើកបរ​យន្តហោះ​របស់​ក្រុមហ៊ុន​អាកាសចរណ៍​នីមួយៗ​មាន​លក្ខណៈ​តឹងរឹង​។ ចុះបើ​ក្នុងករណី​ចៃដន្យ​ណាមួយ​ដែល​បង្ក​ឲ្យ​យន្តហោះ​បើក​ហួស​ល្បឿន​កំណត់ តើ​មាន​បញ្ហា​អ្វីខ្លះ​ដែល​អាច​កើតមាន​លើ​តួរ​របស់​យន្តហោះ​? 

 

​បើតាម​ការពន្យល់​រប​ស់​ពី​លុត​ជនជាតិ​ស៊ុយអែត​លោក Petter Hörnfeldt ចេញពី​វី​ឌី​អូ​នៅក្នុង​ប្រព័ន្ធ​បណ្តាញ​សង្គម YouTube ក្រោម​ប្រធានបទ​ថា «What Happens If an Aircraft Flies Too Fast?» យន្តហោះ​នីមួយៗ​មាន​ល្បឿន​កំណត់​ម្យ៉ាង​ដែល​ត្រូវបាន​គេ​ហៅថា VD ឬ «Design Velocity» ។ ល្បឿន VD នេះ​ត្រូវបាន​គេ​កំណត់ឡើង​ជាមួយនឹង​ការសិក្សា​ដ៏​លម្អិត​ជាច្រើន​ដោយ​ក្រុមហ៊ុន​ផលិត​យន្តហោះ​ទៅលើ​ទំហំ ទម្ងន់ រូបរាង សារធាតុ​ផលិត កម្លាំង ឬ​គោលបំណង​នៃ​មុខងារ​របស់​យន្តហោះ​នោះ​។ 

 

VD គឺជា​ល្បឿន​កំណត់​នៃ​សម្ពាធ​ដែល​គ្រោងឆ្អឹង​របស់​យន្តហោះ​អាច​ទ្រាំទ្រ​បាន​នៅពេល​ហោះហើរ​។ ហេតុដូចនេះ​ហើយ​ទើប​ក្រុមហ៊ុន​ផលិត​យន្តហោះ​បានកំណត់​ល្បឿន​មួយ​ប្រភេទ​ទៀត​ដែល​ទាប​ជាង​ល្បឿន VD និង​ត្រូវបាន​គេ​ឲ្យ​ឈ្មោះថា VMO ឬ «Maximum Operating Velocity» ។ ចំពោះ VMO ពី​ឡុ​ត​នានា​អាច​ហោះហើរ​យន្តហោះ​របស់ខ្លួន​បាន​ដោយ​សុ​វត្តិភាព នៅក្នុង​ករណី​ដឹក​អ្នកដំណើរ​ជាធម្មតា​។ តែ​នៅ​ក្នុងករណី​មួយចំនួន​ក្រុមហ៊ុន​ផលិត​យន្តហោះ​ត្រូវធ្វើ​ការសាកល្បង​ហោះហើរ​យន្តហោះ​របស់ខ្លួន​ហួស​ល្បឿន VMO ដើម្បី​បញ្ជាក់ និង​ធានា​ទៅកាន់​អាជ្ញាធរ​ពាក់ព័ន្ធ​ថា​យន្តហោះ​របស់​ពួកគេ​អាច​ទ្រាំទ្រ​ជាមួយនឹង​ល្បឿន​ដ៏​លឿន​នេះ​បាន​ដោយ​ជោគជ័យ​។ 

 

​នៅពេលដែល​យន្តហោះ​ហោះហើរ​ហួស​ល្បឿន VMO ផ្នែក​មួយចំនួន​នៃ​យន្តហោះ​ចាប់ផ្តើម​ទទួល​ភាព​រំ​ញ័រ​ពី​វត្តមាន​នៃ​ខ្យល់​ខ្លាំង​។ ជាមួយនឹង​ការបើកបរ​ហួស​ល្បឿន VMO នេះ យន្តហោះ​មិនគួរ​ទទួលរង​ការខូចខាត ដូច​ជាការ​ដាច់ចេញ​នៃ​ផ្នែក​យន្តហោះ​ណាមួយ​នោះទេ (​ឧទាហរណ៍​៖​ដូចជា​ផ្នែក​ខ្លះ​នៃ​កន្ទុយ ឬ​ស្លាប​) ។ បើ​គ្មាន​ផ្នែក​ណាមួយ​ទទួលរង​ការ​ខូ​ត​ខាត​ខ្លាំង​នៅពេល​ហោះហើរ​ហួស VMO នោះទេ នោះ​យន្តហោះ​នឹងត្រូវ​បានទទួល​ស្គាល់​ដោយ​អាជ្ញាធរ​ពាក់ព័ន្ធ​ថា​អាច​ហោះហើរ​បាន​ត្រឹមត្រូវ​ទោះបី​ជាមាន​ករណី​ទៅ​ហួស​ល្បឿន VMO ក៏ដោយ​។ 

 

​ចុះបើ​យន្តហោះ​ហោះហើរ​ហួស​ល្បឿន VMO រហូត​ទៅដល់ ឬ​ហួស​ល្បឿន VD នោះ​គ្រោងឆ្អឹង​របស់​យន្តហោះ​នឹង​ទទួលរង​សម្ពាធ​កាន់តែខ្លាំង​។ ដោយសារតែ​លក្ខណៈ​នៃ​រូបវិទ្យា នៅក្នុង​ល្បឿន​គ្រោះថ្នាក់​មួយ​នេះ ផ្នែក​មួយចំនួន​នៃ​យន្តហោះ​នឹងមាន​ចលនា​រំ​ញ័រ​ទៅវិញទៅមក (Oscillation) កាន់តែខ្លាំង​ឡើងៗ​ជាមួយនឹង​ការកើនឡើង​នៃ​ល្បឿន​ខ្យល់​។ រំ​ញ័រ​ទាំងនេះ​អាចធ្វើ​ឲ្យ​ផ្នែក​នៃ​យន្តហោះ​មួយចំនួន​ទ្រុឌទ្រោម ឬ​អាច​ហែក​ចេញពី​គ្នា​នៅលើ​អាកាស​។ ម្យ៉ាងវិញទៀត ចរន្ត​ខ្យល់​នៅលើ​តួរ​ខាងក្រៅ​របស់​យន្តហោះ​មិនមាន​ល្បឿន និង​សម្ពាធ​ដូចៗ​គ្នា​នោះទេ​។ នៅពេល​ខ្លះ ចរន្ត​ខ្យល់​ដែលមាន​វត្តមាន​នៅលើ​ផ្ទៃ​ស្លាបមាន​លក្ខណៈ​លឿន​ជាង​ចរន្ត​ខ្យល់​ដែលមាន​វត្តមាន​នៅលើ​តួរ​កណ្តាល​នៃ​យន្តហោះ​។ 

 

​ហេតុដូចនេះ ផ្ទៃ​ស្លាប​របស់​យន្តហោះ​អាច​ឆាប់​ទទួលរង​សម្ពាធ​ខ្លាំង​ជាង​ផ្នែក​ផ្សេងៗ​ទៀត​។ ក្នុងពេល​ដដែល​នេះ ផ្នែក​នៃ​ស្លាប​យន្តហោះ​អាចធ្វើ​ដំណើរ​ក្បែរ​ល្បឿន​សំឡេង ឬ Supersonic Speed (​ដែល​ជារួម​យន្តហោះ​ដឹក​អ្នកដំណើរ​ធម្មតា​មិនត្រូវ​បាន​គេ​រចនា​មក​បែបនេះ​ទេ​)​។ ការហោះហើរ​ក្បែ​ល្បឿន​សំឡេង​អាច​បង្ក​ឲ្យ​មាន​កម្លាំង​កកិត​ខ្លាំង​លើ​ស្លាប បង្ក​ភាព​ពុកផុយ និង​ធ្វើ​ឲ្យ​យន្តហោះ​ពិបាក​ក្នុងការ​បើកបរ ឬ​ធ្លា​ក់បាន​។ យន្តហោះ​ខុសៗ​គ្នា​តែងមាន​កម្រិត​នៃ​ល្បឿន​ក្នុង​ការហោះហើរ​ខុសៗ​គ្នា​។ ក្នុងនោះ​មានដូចជា​យន្តហោះ​ដឹក​អ្នកដំណើរ Concorde ដែលមាន​សមត្ថភាព​ក្នុងការ​ហោះហើរ​ហួស​ល្បឿន​សំឡេង និង​យន្តហោះ​ចម្បាំង​ដទៃៗ​ទៀត​ដែល​អាច​សម្រេច​ល្បឿន​រហូត​ទៅដល់​២ ឬ​៣​ដង​នៃ​ល្បឿន​សំឡេង​៕