អន្តរជាតិ
ឃ្លាំងធញ្ញជាតិSvalbard ៖ការពារសុវត្ថិភាពអាហារមនុស្សពីមហន្តរាយ
× នៅក្នុងជម្រៅនៃភ្នំគ្របដណ្តប់ដោយទឹកកកនាតំបន់រង្វង់អាកទិច ចន្លោះប្រទេសណ័រវ៉េ និងតំបន់ប៉ូលខាងជើង គឺជាឃ្លាំងដែលផ្ទុកធនធានយ៉ាងសំខាន់មួយសម្រាប់ការរស់រានមានជីវិតរបស់មនុស្សជាតិ។ វាមិនមែនជារ៉ែធ្យូងថ្ម ឬលោហធាតុកំរនោះទេ។ វាគឺជាគ្រាប់ធញ្ញជាតិសម្រាប់វិស័យកសិកម្ម។ គ្រាប់ធញ្ញជាតិរាប់លានគ្រាប់ដែលមានប្រភពមកពីរុក្ខជាតិប្រមាណជា៩៣០ពាន់ប្រភេទ ត្រូវបានគេស្តុកទុកនៅក្នុងឃ្លាំងពិសេសមួយដែលមានឈ្មោះថា«Global Seed Vault»នៅតំបន់ Spitsbergen នៃប្រជុំកោះ Svalbard របស់ប្រទេសណ័រវ៉េ។ ឃ្លាំងមួយនេះគឺជាទីតាំងផ្ទុកគ្រាប់ធញ្ញជាតិធំជាងគេនៅក្នុងពិភពលោកសព្វថ្ងៃ ដែលគ្រាប់ធញ្ញជាតិនិមួយៗគឺជាប្រវត្តិនៃកសិកម្មរបស់មនុស្សតាំងពីរយៈពេល១៣ពាន់ឆ្នាំមុនម្លេះ។
គេហទំព័រ time.com បានបញ្ជាក់ថា Svalbard ជាប្រជុំកោះមួយដែលមានលក្ខណៈដាច់ស្រយាលនៅក្នុងអឌ្ឍគោលខាងជើងនៃភពផែនដី និងជាកន្លែងពោរពេញទៅដោយទឹកកក។ Global Seed Vault ត្រូវបានគេបង្កើតឡើងក្នុងការផ្ទុកគ្រាប់ធញ្ញជាតិជាច្រើនប្រភេទ នៅក្នុងកាលៈទេសៈមហន្តរាយដ៏មហិមាណាមួយដែលអាចកើតឡើងនៅក្នុងពិភពលោក ដែលជារួមនឹងអាចបំផ្លិចបំផ្លាញវិស័យកសិកម្មជាច្រើនកន្លែង។
ប្រទេសជាច្រើនក្នុងនោះមានដូចជា ឥណ្ឌា ប៉ាគីស្ថាន ម៉ិចស៊ិក និងស៊ីរី បានបរិច្ចាគគ្រាប់ធញ្ញជាតិដែលខ្លួនមានមកកាន់ឃ្លាំងផ្ទុកគ្រាប់ធញ្ញជាតិនេះដែរ នៅក្នុងខណៈពេលដែលប្រទេសទាំងនោះកំពុងជួបផលវិបាកទៅកាន់វិស័យកសិកម្មរបស់ពួក។ នៅផ្លូវចូលនៃឃ្លាំងផ្ទុកគ្រាប់ធញ្ញជាតិ ដែលលយចេញមកពីជើងភ្នំទឹកកក គឺជាទ្វារធំមួយមានរាងជាចតុកោណកែង លេចចេញមកយ៉ាងច្បាស់ពីតំបន់នៅជុំវិញវា។
អ្នកស្រី Bente Naeverdal ដែលជាអ្នកគ្រប់គ្រងហេដ្ឋារចនាសម្ព័ន្ធនៅទីនោះបានលើកឡើងថា៖«ទីតាំងនេះត្រូវបានគេជ្រើសរើសឡើងគឺដោយសារតែវានៅឆ្ងាយពីតំបន់ដែលមានសង្គ្រាម ឬតំបន់អសន្តិសុខនានា»។
ឃ្លាំងនេះមានជម្រៅប្រមាណជា១៥០ម៉ែត្រចូលទៅក្នុងភ្នំ បំពាក់ដោយប្រព័ន្ធម៉ាស៊ីនត្រជាក់ក្នុងការការពារគុណភាពនៃគ្រាប់ពូជ។ សព្វថ្ងៃ សាលចំនួន១ក្នុងចំណោមសាលទាំង៣នៅក្នុងឃ្លាំងនោះត្រូវបានគេប្រើប្រាស់។
ការផ្ទុកគ្រាប់ធញ្ញជាតិច្រើនដូច្នេះគឺដើម្បីធានាសុវត្តិភាពអាហាររបស់មនុស្សនៅក្នុងថ្ងៃអនាគត នៅក្នុងពេលវេលាមួយដែលបរិស្ថាន សីតុណ្ហភាព សង្គ្រាម ការប្រែប្រួលអាកាសធាតុ មានការផ្លាស់ប្តូរយ៉ាងឆាប់រហ័ស។ ក៏ដូចគ្នាជាមួយនឹងការបង្កាត់ពូជពិសេសៗដែលអាចទប់ទល់ជាមួយនឹងបរិស្ថានលំបាកៗនានានៃភពផែនដី។ សព្វថ្ងៃ ឃ្លាំងផ្ទុកគ្រាប់ធញ្ញជាតិប្រមាណជា១៧០០កន្លែងនៅជុំវិញពិភពលោកត្រូវបានគេដាក់ឲ្យដំណើរការ ក្រោយពីការចុះហត្ថលេខានៃ«កិច្ចព្រមព្រាងគ្រាប់ធញ្ញជាតិពិភពលោក»ដោយអង្គការសហប្រជាជាតិកាលពីឆ្នាំ២០០១។ Svalbard Seed Vault ត្រូវបានគេប្រើប្រាស់ជាផ្លូវការដំបូងក្នុងខែកុម្ភៈ ឆ្នាំ២០០៨៕
© រក្សាសិទ្ធិដោយ thmeythmey.com