ជាតិ
សង្គមជាតិ
និយ័តករទូរគមនាគមន៍កម្ពុជា គ្រោងដំណើរការលេខកូដ«១២០០»នៅខែមិថុនា ដើម្បីផ្តាច់សេវាកាត់លុយមិនដឹងខ្លួន លោក អ៊ឹម វុត្ថា អ្នកនាំពាក្យនិយ័តករទូរគមនាគមន៍កម្ពុជា
× ភ្នំពេញ៖ក្រោយពលរដ្ឋត្អូញត្អែរអំពីបញ្ហាកាត់លុយតាមទូរសព្ទ ដោយពុំដឹងមូលហេតុ ឬការភ្ជាប់សេវាកម្មផ្សេងៗដោយមិនដឹងខ្លួន និយ័តករទូរគមនាគមន៍កម្ពុជា បានសហការជាមួយនឹងបណ្តាក្រុមហ៊ុនទូរសព្ទចល័ត ប្រើប្រាស់លេខកូដរួមមួយគឺ«១២០០» ដើម្បីផ្តាច់ប្រព័ន្ធកាត់លុយផ្សេងៗ។ លេខកូដនេះ គ្រោងនឹងដាក់ដំណើរការ នៅពាក់កណ្តាលខែមិថុនាខាងមុខនេះ។
លោក អ៊ឹម វុត្ថា អ្នកនាំពាក្យនិយ័តករទូរគមនាគមន៍កម្ពុជា បានប្រាប់សារព័ត៌មានថ្មីៗតាមទូរសព្ទថា និយ័តករទូរគមនាគមន៍កម្ពុជា បានពិភាក្សា និងសហការជាមួយនឹងបណ្តាប្រតិបត្តិករទូរសព្ទចល័តទាំងអស់ ក្នុងការពន្លឿនអនុវត្តលេខកូដ១២០០រួចរាល់ហើយ ដែលអាចនឹងដាក់ដំណើរនៅពាក់កណ្តាលខែមិថុនា ដើម្បីកាត់ផ្តាច់ប្រព័ន្ធផ្សេងៗដែលពលរដ្ឋមិនពេញចិត្ត។
លោក អ៊ឹម វុត្ថា បានស្នើសុំឲ្យពលរដ្ឋ មុននឹងភ្ជាប់ប្រព័ន្ធសេវាផ្សេងៗ ត្រូវពិនិត្យឲ្យបានដិតដល់ និងត្រូវយល់អំពីទំហំកញ្ចប់សេវាដែលខ្លួនទទួល និងសុពលភាព លើការប្រើប្រាស់សេវាកម្ម និងសេវាបន្ថែមរបស់បណ្ដាក្រុមហ៊ុននីមួយៗ ឱ្យបានច្បាស់លាស់ នៅពេលមានការភ្ជាប់គម្រោងផ្សេងៗ ដូចជាការផ្លាស់ប្តូរគម្រោង ការប្តូរលុយ សេវា Calltune សេវាឆ្នោត (Lottery) សេវាហោរាសាស្ដ្រ សេវាស្ដាប់ ចម្រៀង (Music) លទ្ធផលព័ត៌មានកីឡា (Sport) សេវាខ្ចីប្រាក់មុនពីក្រុមហ៊ុន (Loan) និងសេវាហៅចេញដោយ មិនបញ្ចេញលេខ (Private Number)ជាដើម។
បើតាមលោក អ៊ឹម វុត្ថា និយ័តករទូរគមនាគមន៍កម្ពុជានឹងបញ្ជាក់ពីបច្ចេកទេសដើម្បីចុចផ្តាច់សេវាផ្សេងៗនៅពេលដែលក្រសួងដាក់ដំណើរការជាផ្លូវការ។ លោក វុត្ថា បានរៀបរាប់ដូច្នេះថា៖«ពេលដាក់ឲ្យដំណើរការ គេនឹងណែនាំឲ្យប្រើរបៀបម៉េច។ បច្ចេកទេសយើងនឹងមិនធ្វើឲ្យស្មុគស្មាញទេ គឺគ្រាន់តែចុច១២០០ គឺផ្តាច់តែម្តង។ បច្ចេកទេសនៃការចុចរបៀបម៉េចៗ គឺគេរៀបចំនៅក្នុងបណ្តាញរបស់គេរួចហើយ»៕
Tag:
លេខកូដ
បច្ចេកវិទ្យា
© រក្សាសិទ្ធិដោយ thmeythmey.com