លោក កឹម សុខា៖ «ខ្ញុំអរគុណពលរដ្ឋ ឥស្សរជន និងអង្គទូត ដែលស្គាល់គុណតម្លៃរបស់ខ្ញុំ»

ជាតិ

សង្គមជាតិ

នយោបាយជាតិ

លោក កឹម សុខា៖ «ខ្ញុំអរគុណពលរដ្ឋ ឥស្សរជន និងអង្គទូត ដែលស្គាល់គុណតម្លៃរបស់ខ្ញុំ»

26, May 2020 , 10:02 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ មេដឹកនាំអតីតគណបក្សសង្គ្រោះជាតិ លោក កឹម សុខា បានជួបបណ្ដាអង្គទូតប្រចាំកម្ពុជាចំនួន៧រូបហើយ បើគិតពីថ្ងៃទី១១ ខែឧសភា ឆ្នាំ២០២០មក។ តាមរយៈជំនួបនេះ ធ្វើឱ្យលោក កឹម សុខា យល់ឃើញថា ខ្លួននៅតែមាន«គុណតម្លៃ» បើទោះបីជាលោក កំពុងស្ថិតនៅក្នុងដំណើការជំនុំជម្រះរឿងក្តីក្នុងតុលាការ ពាក់ព័ន្ធនឹងបទ«គប់គិតជាមួយបរទេស»ក៏ដោយ។

«តម្លៃដែលគ្មានគុណតម្លៃ មិនមែនជាតម្លៃពិតឡើយ»។ នេះជាការលើកឡើងរបស់លោក កឹម សុខា ដែលចង់សំដៅថា លោកនៅតែទទួលបានការឱ្យតម្លៃខ្ពស់ពីបរទេស។

មេដឹកនាំអតីតគណបក្សសង្គ្រោះជាតិរូបនេះ បានសរសេរលើហ្វេសប៊ុក ដោយអមជាមួយវីដេអូសកម្មភាពជួបបណ្ដាអង្គទូតនានានៅកម្ពុជាកន្លងមក ដូច្នេះ៖«ខ្ញុំសូមថ្លែងអំណរគុណយ៉ាងជ្រាលជ្រៅចំពោះប្រជាពលរដ្ឋខ្មែរ និងឥស្សរជន ក៏ដូចជាអង្គទូតតំណាងប្រទេសប្រជាធិបតេយ្យជឿនលឿននានា ដែលបានទទួលស្គាល់នូវ ”គុណតម្លៃ” របស់ខ្ញុំ ដោយផ្តល់ឱកាសឲ្យខ្ញុំ ទទួលស្វាគមន៍ជួបសួរសុខទុក្ខ សន្ទនាគ្នា ប្រកបដោយកិត្តិយស ទោះបីខ្ញុំកំពុងស្ថិតនៅក្នុងស្ថានភាពណាក៏ដោយ»។

បើតាមលោក កឹម សុខា «គុណតម្លៃ»មនុស្សម្នាក់ មិនមែនស្ថិតនៅលើមុខតំណែងឬតួនាទីឡើយ។«ជាទូទៅប្រទេស ឬអ្នកទាំងឡាយណា ដែលស្គាល់នូវតម្លៃពិតរបស់មនុស្ស គេធ្វើការវាយតម្លៃដោយផ្អែកលើ ”គុណតម្លៃ” ដែលមិនអាស្រ័យទៅលើតែមុខដំណែង គោរម្យងារ ឬទ្រព្យសម្បត្តិ ដែលជាសម្បកក្រៅនោះទេ»។ នេះជាការលើកឡើងរបស់លោក កឹម សុខា។

ថ្លែងបែបនេះហើយ មេដឹកនាំអតីតគណបក្សសង្គ្រោះជាតិ ក៏ស្នើឱ្យប្រទេសជាមិត្តកម្ពុជា បន្តជួយកម្ពុជាលើវិស័យនានា ជាពិសេសបញ្ហាដែលប៉ះពាល់ដល់ជីវភាពរស់នៅរបស់ប្រជាពលរដ្ឋខ្មែរ ក្នុងពេលដែលជំងឺកូវីដ-១៩ កំពុងរាលដាលក្នុងពិភពលោក រួមទាំងផលវិបាកលើវិស័យសេដ្ឋកិច្ច និងសង្គមនៅពេលអនាគត ។«ខ្ញុំសូមអរគុណដល់ប្រទេសជាមិត្ត ដែលបានជួយដល់ប្រទេសកម្ពុជាដោយសុទ្ធចិត្តកន្លងមកនិងបច្ចុប្បន្ន ស្របតាមគុណតម្លៃនៃមនុស្សជាតិ»។ នេះជាការបន្ថែមរបស់លោក កឹម សុខា។

គិតចាប់ពីថ្ងៃទី១១ ឧសភាមក លោក កឹម សុខា មេដឹកនាំអតីតគណបក្សសង្គ្រោះជាតិ បានជួបបណ្ដាអង្គទូតប្រចាំកម្ពុជា ចំនួន៧រូប រួមមានជប៉ុន អាមេរិក ស៊ុយអែត អូស្ត្រាលី បារាំង អាល្លឺម៉ង់ និងសហភាពអឺរ៉ុប។ ក្នុងជំនួបនោះបណ្ដាអង្គទូតសុទ្ធតែមានក្តីរំពឹងថា ស្ថានភាពនយោបាយនៅកម្ពុជា នឹងមានភាពប្រសើរឡើង ក្រោយពីលោក កឹម សុខា បានជួបជជែក និងរំលែកទុក្ខសម្ដេចនាយករដ្ឋមន្ត្រី ហ៊ុន សែន នៅក្នុងពិធីបុណ្យសពម្ដាយក្មេកសម្ដេច កាលពីថ្ងៃទី៥ ឧសភាកន្លងមក។

បច្ចុប្បន្នលោក កឹម សុខា កំពុងស្ថិតនៅក្នុងដំណើរការជំនុំជម្រះក្តីនៅតុលាការ ជុំវិញបទចោទ«សុទិដ្ឋិនិយមជាមួយបរទេស» ដែលត្រូវប្រើពេលវេលាកាត់ក្តីរយៈពេល៣ខែ។ ប៉ុន្តែដោយសារស្ថានភាពជំងឺកូវីដ១៩រាតត្បាតនោះ មេធាវីលោក កឹម សុខា បានស្នើសុំឱ្យតុលាការពន្យាពេលកាត់ក្តីសំណុំរឿងនេះ។ បើគិតមកដល់ពេលនេះ សំណុំរឿងលោក កឹម សុខា បានអូសបន្លាយពេលជិត៣ឆ្នាំហើយ បើរាប់ចាប់ពីថ្ងៃទី៣ កញ្ញា ឆ្នាំ២០១៧មក៕