កីឡាអន្តរជាតិ
អន្តរជាតិ
Holyfield ប្រាប់ Mike Tyson ថាបើចង់ឡើងវ៉ៃម្តងទៀតប្រាប់មក
× អតីតម្ចាស់ខ្សែក្រវាត់ទម្ងន់ធ្ងន់ Evander Holyfield នឹងឡើងសង្វៀនប្រដាល់ជាថ្មីទល់នឹង Mike Tyson ប្រសិនបើគូសត្រូវចាស់របស់ខ្លួនរូបនេះចង់ប្រកួតគ្នាម្តងទៀត។ បើពិតជាមានការប៉ះគ្នាជាលើកទី៣មែន អតីតកំពូលអ្នកប្រដាល់អាមេរិកទាំងពីរនឹងប្រកួតគ្នាលើរេញសប្បុរសធម៌មួយ និងជាជំនួបប្រវត្តិសាស្ត្រប្រដាល់ផងដែរ។
Holyfield វ័យ ៥៧ ឆ្នាំដែលបានចូលនិវត្តន៍ពីអាជីពប្រដាល់ក្នុងឆ្នាំ ២០១៤ បានឈ្នះការប្រកួតលើ Tyson ពីរលើកក្នុងទស្សវត្សទី៩០ ក្នុងនោះរួមទាំងរឿងខាំស្លឹកត្រចៀកផង ដោយ Tyson ដែលជាអ្នកបង្កត្រូវបានដកសិទ្ធិពីការប្រកួតនោះ។
ជាង២០ឆ្នាំក្រោយ អ្នកទាំងពីរបានរៀបចំផែនការត្រឡប់ទៅកាន់សង្វៀនប្រដាល់រៀងៗខ្លួនវិញក្នុងកម្មវិធីសប្បុរសធម៌មួយដើម្បីរៃអង្គាសប្រាក់។ ជុំវិញការវិលត្រឡប់នេះ Holyfield បានអះអាងថាការជួបគ្នាលើកទី៣អាចទៅរួចប្រសិនបើ Tyson ដែលសព្វថ្ងៃឈានដល់វ័យ៥៣ឆ្នាំចង់វ៉ៃជាមួយខ្លួនម្តងទៀតនោះ។
Holyfield ដែលមានប្រវត្តិប្រកួត៥៧លើក ឈ្នះ៤៤ ចាញ់១០ និងមិនមានការប្រកាសលទ្ធផល១លើកបន្ថែមថា៖« ប្រសិនបើខ្ញុំសួរគាត់ [Tyson] គឺដូចជាខ្ញុំទៅសម្លុតគាត់ ឬក៏និយាយថាខ្ញុំចង់ទៅបង្ករឿងនឹងនរណាម្នាក់ដែលខ្ញុំបានវាយឈ្នះពីរដងមកហើយនោះ»។ នេះមានន័យថា Holyfield ចង់ឲ្យ Tyson ជាអ្នកបបួលខ្លួនឡើងវៃក្នុងនាមជាអ្នកចង់សងសឹក។
Holyfield ទទួលបានជ័យជំនះចុងក្រោយក្នុងឆ្នាំ ២០១១ នៅពេលរូបគេទទួលបានកំណត់ត្រាឈ្នះលើកទី៤៤ ដោយផ្តួលដៃគូ Brian Nielsen សញ្ជាតិដាណឺម៉ាកឲ្យសន្លប់នាជំនួបនៅក្រុង Copenhagen។
ដោយឡែក Mike Tyson ដែលបានក្លាយជាម្ចាស់ខ្សែក្រវាត់ទម្ងន់ធ្ងន់ពិភពលោកវ័យក្មេងជាងគេបំផុតលើលោកនៅត្រឹមអាយុ២០ឆ្នាំ ក្នុងឆ្នាំ១៩៨៦ បានប្រកួតចុងក្រោយទី៥៨ក្នុងអាជីពនៅឆ្នាំ២០០៥ ដោយចាញ់កីឡាករអៀរឡង់ Kevin McBride ត្រឹមទឹកទី៦៕
Tag:
Evander Holyfield
Mike Tyson
Boxing
© រក្សាសិទ្ធិដោយ thmeythmey.com