ជាតិ
ក្រសួងប្រៃសណីយ៍ ដាក់កំហិតឲ្យក្រុមហ៊ុនទូរសព្ទពង្រឹងគុណភាពសេវា តែសុំពលរដ្ឋសហការរឿងសង់អង់តែន
× ក្រសួងប្រៃសណីយ៍ និងទូរគមនាគមន៍ បានចេញសេចក្តីជូនដំណឹងមួយ នៅថ្ងៃទី២៦ ឧសភានេះ ដោយបានដាក់កំហិតឲ្យប្រតិបត្តិករទូសព្ទចល័តទាំងអស់ ពង្រឹងគុណភាពសេវារបស់ខ្លួន តាមរយៈការបំពាក់ឧបករណ៍ និងការសាងសង់បង្គោលអង់តែនបន្ថែម។ ការដាក់កំហិតនេះ ធ្វើឡើងនៅពេលដែលពលរដ្ឋមានតម្រូវការសេវាទូរសព្ទ និងអ៊ីនធឺណិតខ្លាំង ជាពិសេសពាក់ព័ន្ធនឹងការរៀនអនឡាញ។
នៅក្នុងសេចក្តីជូនដំណឹងដដែល ក្រសួងប្រៃសណីយ៍បញ្ជាក់យ៉ាងម៉ឹងម៉ាត់ដូច្នេះ៖«ក្រសួងសូមបញ្ជាក់យ៉ាងម៉ឹងម៉ាត់ថា ប្រតិបត្តិករទូរគមនាគមន៍ ត្រូវធានាសេវាទូរសព្ទចល័តជូនអ្នកប្រើប្រាស់ ស្របតាមលក្ខខណ្ឌនៃអាជ្ញាបណ្ណរបស់ខ្លួន។ រាល់ការផ្តល់សេវាដែលមិនមានគុណភាព គឺជាអំពើមិនសុចរឹត ដែលមានចែងនៅក្នុងច្បាប់ស្តីពីកិច្ចការពារអ្នកប្រើប្រាស់»។
ទោះជាយ៉ាងនេះក្តី ក៏កន្លងការសាងបង្គោលអង់តែនទូរសព្ទថ្មីបន្ថែម បានក្លាយជាកង្វល់របស់ពលរដ្ឋ ហើយវាបានក្លាយជាឧបសគ្គសម្រាប់ប្រតិបត្តិករទូសព្ទដែរ។ តាមការសង្កេតរបស់ក្រសួងប្រៃសណីយ៍ ពលរដ្ឋថាអាចមានផលប៉ះពាល់ផ្សេងៗដូចជា រន្ទះ ការបាក់រលំ ជាពិសេសបារម្ភលើការប៉ះពាល់សុខភាព ពីការសាយភាយរលកអាកាសវិទ្យុ ដោយយល់ច្រឡំថា ជាប្រភេទរលកវិទ្យសកម្មទៅវិញជាដើម។
ដើម្បីស្វែងរកដំណោះស្រាយ ក្រសួងបានចាត់ឲ្យក្រុមការងារឲ្យសិក្សាស្រាវជ្រាវ ហើយលទ្ធផលបង្ហាញថា គ្រប់ក្រុមហ៊ុនផ្តល់សេវាទូរសព្ទទាំងអស់ បានប្រើប្រាស់ឧបករណ៍ស្របតាមស្តង់ដារ របស់សហភាពទូរគមនាគមន៍អន្តរជាតិ មិនមានរកឃើញការប៉ះពាល់ជាក់លាក់ណាមួយ ដល់សុខភាពដែលបណ្តាលមកពីស្ថានីយ៍អង់តែនទូរសព្ទចល័តនោះទេ។ ក្រសួងប្រៃណីយ៍ពន្យល់បន្ថែម៖«រលកអាកាសវិទ្យុដែលប្រើប្រាស់ក្នុងប្រព័ន្ធទូរសព្ទចល័ត មិនមែនជារលកវិទ្យុសកម្មទេ។ បន្ថែមពីនេះទៀត នៅលើបង្គោលនីមួយៗ មានបំពាក់ឧបករណ៍ការពាររន្ទះផងដែ»។
ដូច្នេះ ក្រសួងប្រៃនីយ៍ និងទូរគមនាគមន៍ បានស្នើឲ្យប្រជាពលរដ្ឋសហការ ក្នុងការសាងសង់បង្គោលអង់តែន នៅក្នុងតំបន់ដែលខ្លួនរស់នៅ។ ជាមួយគ្នានេះ ក្រសួងក៏នឹងជំរុញឲ្យនិយ័តករទូរគមនាគមន៍កម្ពុជា ត្រួតពិនិត្យដោយយកចិត្តទុកដាក់ និងការទទួលខុសត្រូវខ្ពស់ដើម្បីធានាថាសេវាទូរសព្ទមានគុណភាព និងឧបករណ៍ទាំងអស់ស្របតាមស្តង់ដារអន្តរជាតិ៕
© រក្សាសិទ្ធិដោយ thmeythmey.com