ជាតិ
ពីនេះ ពីនោះ
ត្រីក្រពតមានផ្ទុកសារធាតុពុលខ្ពស់៥ប្រភេទ ក្នុងចំណោម១០ប្រភេទនៅកម្ពុជា
×![]()
យោងតាមការស្រាវជ្រាវរបស់វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប របស់រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានរកឃើញថា នៅប្រទេសកម្ពុជា មានត្រីក្រពតចំនួន ១០ប្រភេទខុសៗគ្នា។ ក្នុងនោះ ត្រីក្រពតចំនួនប្រាំប្រភេទ មានផ្ទុកសារធាតុពុលខ្ពស់។ 
ត្រីក្រពតដែលមានផ្ទុកសារធាតុពុលទាំងនោះ មានដូចជា «ទី១ ត្រីក្រពតកូសាំងស៊ីន ទី២ត្រីក្រពតភ្នែកក្រហម ទី៣ ក្រពតអុចបៃតង ទី៤ ក្រពតអុចធំ និងទី៥ ក្រពតខ្មៅ។ សារធាតុពុលនៅក្នុងខ្លួនត្រីក្រពត គឺប្រែប្រួលទៅតាមរដូវកាល។ ចំពោះកម្រិតសារធាតុពុលខ្ពស់បំផុត គឺ
នៅរដូវកូនបន្តពូជ ក្នុងខែកុម្ភៈ ដល់ខែមីនា និងនៅក្នុងចន្លោះខែកក្កដា ដល់ខែកញ្ញា។ ចំពោះមេជីវិត និងពងរបស់វា គឺមានផ្ទុកសារធាតុពុលខ្ពស់ជាងគេ បន្ទាប់មកថ្លើម ពោះវៀន ស្បែក និងសាច់។ ជនរងគ្រោះ បន្ទាប់ពីបរិភោគត្រីក្រពតទាំងនេះបានរយៈពេល ២០នាទី ទៅ ២ម៉ោង នឹងមានបង្ហាញរោគសញ្ញាដូចជា៖ «រមាស់ចាក់ៗ នៅបបូរមាត់ និងមាត់ ឈឺក្បាល វិលមុខ រមាស់ចាក់ៗ នៅចុងអវយវៈ ពិបាកនិយាយ បាត់លំនឹងដងខ្លួន ខ្សោយសាច់ដុំ ខ្វិន ស្ពឹកចុងដៃចុងជើង ក្អួត រាក ល្ហិតល្ហៃ រឹងថ្គាម បើស្ថិតក្នុងស្ថានភាពពុលខ្លាំង គឺធ្វើឱ្យថប់ដង្ហើមស្លាប់តែម្តង»។ សារធាតុពុលក្នុងត្រីក្រពតទាំងនោះ មិនអាចកម្ចាត់ចោលតាមរយៈការចម្អិន ឬដាក់ឱ្យកកឡើយ។
បើយោងតាមក្រសួងសុខាភិបាលបាននិយាយថា ការធ្វើឲ្យជនរងគ្រោះក្អួត គឺអាចជួយបញ្ចេញសារធាតុពុលបានមួយចំណែកពីក្នុងខ្លួនជនរងគ្រោះដែរ។ បន្ទាប់មក ត្រូវប្រញាប់ប្រញ៉ាល់បញ្ជូនជនរងគ្រោះទៅរកការជួយសង្គ្រោះជាបន្ទាន់ នៅមណ្ឌលសុខភាព ឬមន្ទីរពេទ្យដែលនៅជិតបំផុត។ ខាងក្រោមនេះ គឺជារូបភាព និងលក្ខណៈសម្គាល់នៃត្រីក្រពតពុលទាំងប្រាំប្រភេទនោះ៖
Tag:
USAID Wonders of the Mekong
© រក្សាសិទ្ធិដោយ thmeythmey.com
