ភ្នំពេញ៖ សិស្សសាលាប្រឈមនឹងការឆ្លងជំងឺកូវីដ-១៩(COVID-19) និងជំងឺផ្សេងៗទៀត ដោយសារតែការជក់បារីអេឡិចត្រូនិក (Vape)។ នេះជាការលើកឡើងរបស់លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា ដែលបានអះអាងថា សិស្សសាលាដែលប្រឈមនឹងការឆ្លងកូវីដ-១៩នេះ ព្រោះសិស្សទាំងនោះប្រើប្រាស់ឧបករណ៍ជក់បារីអេឡិចត្រូនិករួមគ្នា។
ថ្វីដ្បិតបារីអេឡិចត្រូនិក និង Sisha ត្រូវបានអាជ្ញាធរជាតិប្រយុទ្ធប្រឆាំងគ្រឿងញៀនហាមលក់ និងប្រើប្រាស់ក៏ដោយ ប៉ុន្តែបច្ចុប្បន្នឧបករណ៍ជក់បារីអេឡិចត្រូនិកនេះ នៅតែចរាចរណ៍ខ្លាំងនៅលើទីផ្សារកម្ពុជាតាមរយៈបណ្តាញទំនាក់ទំនងហ្វេសប៊ុកគួរឱ្យកត់សម្គាល់ផងដែរ។ ឧបករណ៍ជក់បារីអេឡិចត្រូនិកនេះ គឺមានតម្លៃថ្លៃ ចន្លោះពី២៥ដុល្លារ ទៅ១០០ដុល្លារ ឬលើសពីនេះដែលអាស្រ័យប្រភេទនីមួយៗ។
បើតាមលោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា សិស្សសាលាដែលប្រើប្រាស់ឧបករណ៍ជក់បារីអេឡិចត្រូនិករួមគ្នានេះ ងាយប្រឈមនឹងការឆ្លងកូវីដ-១៩។
លោក មុំ គង់ បាននិយាយដូច្នេះ៖«ឧបករណ៍ជក់បារីអេឡិចត្រូនិកនេះមានតម្លៃថ្លៃ សម្រាប់សិស្សសាលា ដែលមិនអាចលទ្ធភាពទិញបាន។ ដូច្នេះពួកគាត់រៃលុយគ្នាដើម្បីទិញឧបករណ៍នេះប្រើប្រាស់រួមគ្នា។ ការប្រើប្រាស់ជក់បារីអេឡិចត្រូនិករួមគ្នាហ្នឹង តាមរយៈមាត់, ដៃដែលកាន់ឧបករណ៍រួមគ្នាហ្នឹង គឺវាប្រឈមនឹងហានិភ័យខ្ពស់ក្នុងការឆ្លងជំងឺកូវីដ-១៩»។
បើតាមសេចក្តីប្រកាសព័ត៌មានរបស់អង្គការចលនាដើម្បីសុខភាពកម្ពុជា កាលពីថ្ងៃទី២៥ឧសភា ឆ្នាំ២០២០ ការប្រើប្រាស់ឧបករណ៍ជក់បារីអេឡិចត្រូនិករួមគ្នា ក្រៅពីប្រឈមខ្លាំងនឹងការឆ្លងកូវីដ១៩ ពីមនុស្សម្នាក់ទៅម្នាក់ទៀតហើយនោះ គឺថែមទាំងមានងាយមានជំងឺហើមសួត, ជំងឺមហារីកសួត, ជំងឺរលាកសួតរ៉ាំរ៉ៃ, ជំងឺដាច់សរសៃឈាមក្នុងខួរក្បាល និងជំងឺបេះដូងជាដើម ដូចនឹងការជក់បារីធម្មតាដែរ។ លើសពីនេះ ការប្រើប្រាស់ឧបករណ៍ជក់បារីអេឡិចត្រូនិករួមគ្នានេះ ក៏ងាយជំរុញឱ្យពួកគេឈានទៅប្រើគ្រឿងញៀនផ្សេងៗទៀត។
ក្នុងសេចក្តីប្រកាសដដែល បានអះអាងថា បារីអេឡិចត្រូនិក គឺមិនមែនជាឧបករណ៍ផ្តាច់បារីនោះទេ តែវា ឧបករណ៍សម្រាប់ទាក់ទាញយុវជនវ័យក្មេងឱ្យប្រើប្រាស់ទៅវិញ ព្រោះឧបករណ៍អេឡិចត្រូនិចនេះត្រូវបានឧស្សាហកម្មថ្នាំជក់ផលិតរសជាតិច្រើនជម្រើស និងងាយស្រួលក្នុងការប្រើប្រាស់។
ឧបករណ៍ប្រើប្រាស់បារីអេឡិចត្រូនិចនេះ បានអូសទាញអ្នកដែលមានបំណងចង់ផ្ដាច់បារីចំនួន៦០ភាគរយនៃអ្នកជក់បារីប្រមាណ ១,១ពាន់លាននាក់ទូទាំងពិភពលោក ដែលនាំឱ្យអ្នកទាំងនោះប្រើប្រាស់ផលិតផលថ្នាំជក់ច្រើនមុខបញ្ចូលគ្នា ឈានទៅរកការប៉ះពាល់សុខភាពរឹតតែធ្ងន់ធ្ងរ។ នេះបើយោងតាមមជ្ឈមណ្ឌលប្រយុទ្ធប្រឆាំងជំងឺរបស់សហរដ្ឋអាមេរិក (U.S CDC) ដែលបញ្ជាក់ថា អ្នកដែលជក់បារីអេឡិចត្រូនិចនឹងក្លាយជាអ្នកញៀនបារីធម្មតា២ដង ច្រើនជាងអ្នកដែលមិនប្រើប្រាស់ឧបករណ៍នេះ។
ប្រភពU.S.CDCដដែលបានបង្ហាញថា គិតត្រឹមពាក់កណ្ដាលកុម្ភៈ ឆ្នាំ២០២០ អាមេរិកមានអ្នកកើតជំងឺសួតដែលទាក់ទងនឹងការប្រើបារីអេឡិចត្រូនិក ចំនួន២៨០០ករណី។ ក្នុងនោះអ្នកស្លាប់៦៨ករណី៕