ក្លិប២០បោះឆ្នោតគាំទ្រឲ្យត្រឡប់ទៅការប្រកួតវិញ ស្របពេល EPL រកឃើញអ្នកឆ្លង COVID-19 ៤នាក់ទៀត

COVID-19

កីឡាអន្តរជាតិ

អន្តរជាតិ

ក្លិប២០បោះឆ្នោតគាំទ្រឲ្យត្រឡប់ទៅការប្រកួតវិញ ស្របពេល EPL រកឃើញអ្នកឆ្លង COVID-19 ៤នាក់ទៀត

28, May 2020 , 10:50 am

រូបភាព

ដោយ: ទេព ពិទូរ្យ

ក្លិបនៅ Premier League បានបោះឆ្នោតសម្រេច ឲ្យមានការវិលត្រឡប់ទៅកាន់ការប្រកួតលីគឡើងវិញ ខណៈមានមនុស្ស៤នាក់ទៀត មកពី៣ក្រុមផ្សេងគ្នា បានធ្វើតេស្តរកឃើញថា ឆ្លងជំងឺ COVID-19។

ក្លិបក្នុងក្របខណ្ឌលីគកំពូលអង់គ្លេសទាំង២០ បានវិលត្រឡប់ចូលហ្វឹកហាត់វិញកាលពីសប្តាហ៍មុន ជាមួយនឹងការគោរពតាមគោលការតឹងរ៉ឹង ដោយមិនឲ្យមានទំនាក់ទំនងខាងក្រៅ។ ក្រោយមក ក្លិបទាំងអស់បានជួបប្រជុំគ្នា និងបង្កើតឲ្យមានការបោះឆ្នោតមួយលើការបន្ត ឬក៏អត់នៃការប្រកួតលីគកំពូលអង់គ្លេសនេះ។

នៅថ្ងៃទី២៧ ខែឧសភា ក្លិបទាំងអស់បានបោះឆ្នោតសម្រេចជាឯកច្ឆន្ច ក្នុងការបន្តលីគរដូវកាលនេះឡើងវិញ ក្រោយផ្អាកអស់រយៈពេលជិត៣ខែមក ដោយសារវិបត្តិ COVID-19។ យ៉ាងណាក៏ដោយ ការអនុញ្ញាតឲ្យមានការបើករដូវកាលវិញ ត្រូវមានការសម្រេចពីរដ្ឋាភិបាលអង់គ្លេស ដោយផ្អែកលើអាទិភាពសុខភាព និងសុខុមាលភាពរបស់កីឡាករ បុគ្គលិក និងអ្នកចូលរួមទាំងអស់។

ស្របពេលការប្រកាសលទ្ធផលបោះឆ្នោតនេះ Premier League ក៏បញ្ចេញព័ត៌មានថា អ្នកឆ្លងជំងឺរលាកសួតបង្កដោយកូរ៉ូណាវីរុសប្រភេទថ្មី ចំនួន៤នាក់ទៀត ត្រូវបានរកឃើញ។ ជាសរុបមកទល់ពេលនេះ មានសមាជិកក្រុមចំនួន១២នាក់ហើយ ដែលបានធ្វើតេស្តចេញលទ្ធផលវិជ្ជមាន COVID-19 បន្ទាប់ពីការធ្វើតេស្តជុំទី៣ លើមនុស្សចំនួន ១ ០០៨នាក់ អំឡុងពេលត្រឡប់ចូលហ្វឹកហាត់។

កីឡាករ និងបុគ្គលិកនៅ Premier League នឹងនៅតែបន្តធ្វើតេស្តពីរដងក្នុងមួយសប្តាហ៍ ខណៈមានការអះអាងថា នឹងកើនចំនួនអ្នកឆ្លងថ្មីពី៥០ ទៅ ៦០ករណីទៀត ក្រោយការធ្វើតេស្តជុំទី៤។

បើទោះជានៅតែបន្តរកឃើញអ្នកឆ្លងថ្មី យ៉ាងនេះក្តី ប៉ុន្តលោក Richard Masters នាយកប្រតិបត្តិក្របខណ្ឌ Premier League បានប្រាប់ BBC Sport ថា លីគកំពូលអង់គ្លេស នៅតែមានភាពជឿជាក់ ក្នុងការត្រឡប់ទៅកាន់ការប្រកួតវិញ៕