ជាតិ
សេដ្ឋកិច្ច
ក្រុមហ៊ុនកូរ៉េ វិនិយោគជាង២០០លានដុល្លារ លើថាមពលវារីអគ្គិសនីនៅស្ទឹងពោធិ៍សាត់ ស្ទឹងពោធិ៍សាត់។ ប្រភពរូបភាព៖ រដ្ឋបាលខេត្តពោធិ៍សាត់
× ភ្នំពេញ៖ ក្រុមហ៊ុនកូរ៉េ ឈ្មោះ SPHP(CAMBODIA)CO.,LTD ត្រូវបានក្រុមប្រឹក្សាអភិវឌ្ឍន៍កម្ពុជា(CDC) អនុម័តឱ្យអភិវឌ្ឍន៍វារីអគ្គិសនីនៅស្ទឹងពោធិ៍សាត់ ក្នុងថាមពល៨០មេហ្គាវ៉ាត់ ដែលស្ថិតនៅឃុំប្រមោយ ក្នុងស្រុកវាលវែង ខេត្តពោធិ៍សាត់។ បើតាមការចុះផ្សាយរបស់CDC កាលពីថ្ងៃ២៦ឧសភា ក្រុមហ៊ុនបានវិនិយោគលើការផលិតថាមពលអគ្គិសនីនេះ ចំនួន២៣១,១លានដុល្លារ ដែលអាចបង្កើតការងារបានជិត១០០កន្លែង។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពល និងជាអ្នកនាំពាក្យក្រសួងរ៉ែ និងថាមពល បានប្រាប់សារព័ត៌មានThmeyThmey តាមទូរសព្ទ នៅថ្ងៃទី២៨ឧសភា ថា ក្រុមហ៊ុនSPHP(CAMBODIA)CO.,LTDនេះ កំពុងរៀបចំសាងសង់វារីអគ្គិសនីជាបណ្តើរៗហើយ ដែលគ្រោងនឹងដំណើរនៅចុងឆ្នាំ២០២៣ ឬ ដើមឆ្នាំ២០២៤។ លោកបាននិយាយដូច្នេះ៖«ក្រុមហ៊ុននេះ ជាក្រុមហ៊ុនរបស់ប្រទេសកូរ៉េខាងត្បូងដំបូងគេ ដែលក្រសួង យើងអនុម័តឱ្យវិនិយោគ លើគម្រោងផលិតថាមពលវារិអគ្គិសនីនៅកម្ពុជា»។
អគ្គនាយកថាមពលកម្ពុជារូបនេះ អះអាងថា គម្រោងអភិវឌ្ឍន៍វារីអគ្គិសនីស្ទឹងពោធិ៍សាត់១ ក្នុងថាមពល៨០មេហ្គាវ៉ាត់របស់ក្រុមហ៊ុននេះ មិនត្រឹមផ្គត់ផ្គង់អគ្គិសនី ឱ្យខេត្តពោធិ៍សាត់នោះទេ គឺចូលរួមផ្គត់ផ្គង់អគ្គិសនីនៅកម្ពុជាទាំងមូល តាមរយៈការតភ្ជាប់បណ្តាញអគ្គិសនីជាតិ។
ក្រៅពីគម្រោងអគ្គិសនីនេះ កម្ពុជាមានគម្រោងផលិតថាមពលកំពុងដំណើរការសាងសង់ចំនួន៩ ដែលមានថាមពលអគ្គិសនីប្រហែល១,៥០០មេហ្គាវ៉ាត់ ស្មើ៤៥ភាគរយ នៃថាមពលសរុបដែលកម្ពុជាត្រូវការបច្ចុប្បន្ន។ គម្រោងទាំង៩នេះ កំពុងសាងសង់ ក្នុងខេត្តចំនួន៦ ដែលរួមមាន ខេត្តកំពង់ឆ្នាំង ពោធិ៍សាពោធិ៍សាត់ បាត់ដំបង បន្ទាយមានជ័យ និងស្វាយរៀង។ នេះបើយោងតាមរបាយការណ៍ របស់ក្រសួងរ៉ែ និងថាមពល ដែលទទួលបានក្នុងសន្នីសីទសារព័ត៌មាន នៅទីស្តីគណៈរដ្ឋមន្ត្រី កាលពីថ្ងៃទី២១ មេសា ឆ្នាំ២០២០។
ក្នុងរបាយការណ៍ដដែលនេះ បានបញ្ជាក់ថា ថាមពលផ្គត់ផ្គង់អគ្គិសនីនៅកម្ពុជា មាន៥ប្រភព។ ក្នុងនោះមានប្រភពពីវារិអគ្គិសនីប្រមាណ៣៣ភាគរយ, ប្រភពពីស្ថានីយដុតធ្យូងថ្មប្រហែល៣៣ភាគរយ, ប្រភពពី ការប្រើប្រាស់ប្រេងខ្មៅ និងម៉ាស៊ូត៧ភាគរយ, ប្រភពថាមពលកកើតឡើងវិញ១,៣ភាគរយ និងប្រភពថាមពលនាំចូលពីប្រទេសជិតខាង ប្រមាណ២៥ភាគរយ៕
Tag:
អគ្គិសនី
CDC
ពោធិ៍សាត់
© រក្សាសិទ្ធិដោយ thmeythmey.com