កីឡាជាតិ
ជាតិ
លោក វ៉ាត់ ចំរើន អគ្គលេខាធិការនៃ CAMSOC ថ្លែងក្នុងកិច្ចប្រជុំគណៈកម្មការអចិន្ត្រៃយ៍ CAMSOC នៅថ្ងៃទី២៦ ឧសភា
×![]()
គណៈកម្មការអចិន្ត្រៃយ៍ នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍កម្ពុជា (CAMSOC) បានឯកភាពគ្នាក្នុងការជ្រើសរើសរូប Mascot និងបាវចនាស៊ីហ្គេមឆ្នាំ២០២៣។ ប៉ុន្តែគណៈកម្មការនេះ ពុំទាន់ឯកភាពគ្នា លើការជ្រើសរើសនិមិត្តរូប(Logo)ស៊ីហ្គេមនៅឡើយទេ។ ដ្បិត Logo ត្រូវមានអត្ថន័យឆ្លើយតបនឹងគោលនយោបាយកីឡា និងគោលនយោបាយកម្ពុជា។ 
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍កម្ពុជាបានអះអាងថា ក្រោយឆ្លងកាត់ការពិភាក្សាយ៉ាងយកចិត្តទុកដាក់ចំនួន៣លើកកន្លងមក គណៈកម្មការអចិន្ត្រៃយ៍នៃ CAMSOC បានឯកភាពគ្នាទាំងស្រុងលើការជ្រើសរើសរូប Mascot និងបាវចនារបស់ស៊ីហ្គេមឆ្នាំ២០២៣។ តែការឯកភាពនេះ ធ្វើឡើងត្រឹមតែគណៈកម្មការអចិន្ត្រៃយ៍តែប៉ុណ្ណោះ។
បើតាមលោក វ៉ាត់ ចំរើន គណៈកម្មការអចិន្ត្រៃយ៍នៃ CAMSOC នឹងយករូប Mascot និងបាវចនាស៊ីហ្គេមឆ្នាំ២០២៣ នេះ ដាក់ជូនសម្តេច ទៀ បាញ់ ប្រធាន CAMSOC ដើម្បីពិនិត្យ និងចុះហត្ថលេខាឯកភាព មុនដាក់ជូនសម្តេចនាយករដ្ឋមន្ត្រី ហ៊ុន សែន ពិនិត្យ និងអនុម័តដាក់ឲ្យប្រើប្រាស់ជាផ្លូវការ។
លោកបានលើកឡើងថា៖«យើងដឹងហើយថា ការជ្រើសរើស Logo, Mascot និង Motto គឺវាមានភាពស្មុគស្មាញច្រើន ដែលយើងត្រូវសម្អិតសម្អាង និងមានភាពប្រាកដនិយមច្បាស់លាស់ណាស់ មុននឹងសម្រេច ព្រោះវាជានិមិត្តរូបនៃស៊ីហ្គេមទាំងមូល។ ដូច្នេះទើបគណៈកម្មការ និងគណៈកម្មការអចិន្ត្រៃយ៍យល់ថា ត្រូវតែមានការកែសម្រួល និងលម្អ ក៏ដូចជាធ្វើយ៉ាងណាឲ្យវាចេញមកមានភាពទាក់ទាញ វាត្រូវនឹងគោលនយោបាយកីឡា និងគោលនយោបាយកម្ពុជា ព្រោះស៊ីហ្គេមដើម្បីយើងទាំងអស់គ្នា»។
អគ្គលេខាធិការ CAMSOC រូបនេះបានបន្ថែមថា គណៈកម្មការអចិន្ត្រៃយ៍ពុំទាន់ឯកភាពគ្នាក្នុងការជ្រើសរើសរូប ដែលជានិមិត្តសញ្ញាស៊ីហ្គេមនៅឡើយទេ។ ដ្បិតបច្ចុប្បន្នបញ្ហាជ្រើសរើសរូប Logo នេះ កំពុងស្ថិតក្នុងដំណាក់កាលពិភាក្សាគ្នាពីមន្ត្រីជំនាញបច្ចេកទេសនៅឡើយ។ លោកបន្តថា មានរូប Logo ពី៤ទៅ៥ ដែលស្ថិតក្នុងការពិចារណារបស់គណៈកម្មការបច្ចេកទេស។
ពាក់ព័ន្ធបញ្ហាជ្រើសរើសរូប Logo នេះដែរ លោក វ៉ាត់ ចំរើន បានបញ្ជាក់យ៉ាងដូច្នេះថា៖«នៅមានការកែសម្រួលនៅឡើយទេ អត់ទាន់សម្រេចជាផ្លូវការនោះទេ ទាំងគណៈកម្មការបញ្ចេកទេស និងគណៈកម្មការអចិន្ត្រៃយ៍មិនទាន់សម្រេចនោះទេ។ យើងមានរូប៤ទៅ៥ ដើម្បីពិចារណា»។
គណៈកម្មការអចិន្ត្រៃយ៍នៃ CAMSOC នៅថ្ងៃទី២៦ ឧសភា ឆ្នាំ២០២០ បានរៀបចំកិច្ចប្រជុំប្រចាំសប្តាហ៍ ដើម្បីត្រួតពិនិត្យវឌ្ឍន៍ភាពការងាររបស់គណៈកម្មការព័ត៌មាន និងផ្សព្វផ្សាយ និងគណៈកម្មការវប្បធម៌ បរិស្ថាន និងអប់រំកីឡា និងដាក់ចេញនូវផែនការមួយចំនួន ដើម្បីអនុវត្តបន្ត។ បើតាមការវាយតម្លៃរបស់លោក វ៉ាត់ ចំរើន គណៈកម្មការទាំងពីរបានរៀបចំផែនការរបស់ខ្លួនបានទៅ៥០ទៅ៦០ភាគរយហើយ។ នៅបន្ទាប់គណៈកម្មការអចិន្ត្រៃយ៍នឹងរៀបចំកិច្ចប្រជុំ ដើម្បីត្រួតពិនិត្យការងាររបស់គណៈកម្មការទទួលបន្ទុកបើក និងបិទព្រឹត្តិការណ៍កីឡាស៊ីហ្គេមឆ្នាំ២០២៣៕
Tag:
វ៉ាត់ ចំរើន
Mascot
Motto
SEA Games 2023
© រក្សាសិទ្ធិដោយ thmeythmey.com
