ជាតិ
សេដ្ឋកិច្ច
គ្រប់ស្ថាប័នហិរញ្ញវត្ថុមានពេល៣ខែ យកក្រដាស ១$ ២$ និង ៥$ ឱ្យធនាគារជាតិ ដើម្បីបញ្ជូនចេញពីកម្ពុជា
× ភ្នំពេញ៖ គ្រប់ធនាគារ និងគ្រឹះស្ថានហិរញ្ញវត្ថុ មានពេល៣ខែ ពោលពីថ្ងៃទី១មិថុនា ដល់ថ្ងៃទី៣១សីហា ឆ្នាំ២០២០ យកក្រដាសប្រាក់ ១ដុល្លារ ២ដុល្លារ និង៥ដុល្លារ ឱ្យធនាគារជាតិនៃកម្ពុជា(NBC) ដើម្បីដឹកជញ្ជូនចេញពីកម្ពុជា។ បើយោងតាមសេចក្តីប្រកាសព័ត៌មានរបស់NBC នៅថ្ងៃទី២៨ឧសភានេះ ការប្រមូលប្រាក់ដុល្លារតូចៗទាំងនេះចេញពីកម្ពុជានេះ គឺដើម្បីលើកកម្ពស់ និងជំរុញការប្រើប្រាស់«ប្រាក់រៀល»ឱ្យកាន់តែទូលាយ។
ដើម្បីជំរុញតម្រូវការប្រើប្រាស់ប្រាក់រៀល ក្នុងចរន្តសេដ្ឋកិច្ច ជាពិសេសសម្រាប់ប្រតិបត្តិការនានាដែលមានទំហំតូច ពីការប្រើប្រាស់ក្រដាសប្រាក់១ដុល្លារ ២ដុល្លារ និង៥ដុល្លារនេះ ជំនួសដោយប្រាក់រៀលវិញនោះ ធនាគារជាតិ បានទុកពេលក្នុងរយៈពេល៣ខែខាងលើ ក៏ដូចជាការលើកទឹកចិត្តដល់គ្រឹះធនាគារនិងហិរញ្ញវត្ថុទាំងអស់ ក្នុងការប្រមូលប្រាក់ដុល្លារតូចៗទាំងនេះ មកធនាគារជាតិវិញ ដើម្បីដឹកជញ្ជូនទៅក្រៅប្រទេស គឺឥតគិតកម្រៃសេវាឡើយ។
បន្ទាប់ពីថ្ងៃទី៣១សីហា ឆ្នាំ២០២០ តទៅ គ្រឹះស្ថានធនាគារនិងហិរញ្ញវត្ថុទាំងអស់ នឹងក្លាយជាអ្នករ៉ាប់រងលើថ្លៃដឹកជញ្ជូនក្រដាសប្រាក់ ១ដុល្លារ ២ដុល្លារ និង ៥ដុល្លារ ចេញពីកម្ពុជាវិញ ដោយធនាគារជាតិ នឹងផ្ទេរការចំណាយដឹកប្រាក់នេះទៅស្ថាប័នហិរញ្ញវត្ថុនីមួយៗ។
ធនាគារជាតិបានបញ្ជាក់ថា៖« ការប្រមូលប្រាក់ដុល្លារតូចទាំងនេះចេញពីកម្ពុជា គឺដើម្បីពង្រឹងឯករាជ្យនៃគោលនយោបាយរូបិយវត្ថុ និងជំរុញកំណើនសេដ្ឋកិច្ចឱ្យមានប្រសិទ្ធភាពនោះ តាមរយៈការប្រើប្រាស់ប្រាក់រៀលឱ្យបានទូលំទូលាយជាងមុន ដោយគួរចាប់ផ្ដើមពីការចាយវាយលើប្រតិបត្តិការទំហំតូចទៅ។ ដូច្នេះការទុកឱ្យចរាចរក្រដាសប្រាក់ដុល្លារអាមេរិកប្រភេទតូចៗនេះ គឺជាឧបសគ្គមួយក្នុងការជំរុញការប្រើប្រាស់ប្រាក់រៀល»។
បើតាមធនាគារជាតិនៃកម្ពុជា ក្នុងរយៈពេល៦ខែចុងក្រោយនេះ ប្រាក់រៀលក៏ដូចជារូបិយប័ណ្ណក្នុងតំបន់បានធ្លាក់ថ្លៃគួរឱ្យកត់សម្គាល់ធៀបនឹងប្រាក់ដុល្លារអាមេរិក។ ធនាគារជាតិ អះអាងថា ចំពោះប្រទេសក្នុងតំបន់តម្លៃរូបបិយប័ណ្ណរបស់គេធ្លាក់ថ្លៃ ដោយសារការធ្លាក់ចុះនៃការនាំចេញនិងលំហូរចេញមូលធន។ ចំណែកឯកម្ពុជាវិញ ការធ្លាក់ចុះនៃថ្លៃប្រាក់រៀលគឺដោយសារតម្រូវការប្រាក់រៀលធ្លាក់ចុះ (ដែលជាចម្បងបណ្ដាលមកពីថមថយសកម្មភាពសេដ្ឋកិច្ចក្នុងស្រុក និងការធ្លាក់ចុះតម្រូវការប្រាក់រៀលសម្រាប់បង់ពន្ធ)។
ធនាគារជាតិ បន្តថា ការធ្លាក់ថ្លៃប្រាក់រៀលធៀបនឹងដុល្លារអាមេរិកនេះ មានឥទ្ធិពលអវិជ្ជមានទៅលើប្រជាកសិករដែលមានចំណូលជាប្រាក់រៀល។ ដូច្នេះដើម្បីជំរុញតម្រូវការប្រើប្រាស់ប្រាក់រៀលនៅក្នុងចរន្តសេដ្ឋកិច្ចជាពិសេសសម្រាប់ប្រតិបត្តិការដែលមានទំហំតូច ការប្រើប្រាស់ក្រដាសប្រាក់ដុល្លារអាមេរិកប្រភេទតូចៗ ត្រូវជំនួសដោយប្រាក់រៀលវិញ។
បើតាមសេចក្តីប្រកាសព័ត៌មានដដែលខាងលើ ធនាគារជាតិនៃកម្ពុជា នឹងបន្តពិភាក្សាជាមួយគ្រឹះស្ថានធនាគារនិងហិរញ្ញវត្ថុ ដើម្បីឈានទៅកំណត់ពេលវេលាណាមួយសមស្រប ដើម្បីផ្អាកការទទួលក្រដាសប្រាក់ដុល្លារអាមេរិក ប្រភេទតូចទាំងស្រុងពីគ្រឹះស្ថានធនាគារ និងហិរញ្ញវត្ថុ៕
© រក្សាសិទ្ធិដោយ thmeythmey.com