COVID-19
ជាតិ
សង្គមជាតិ
ធនាគារពិភពលោក៖ កូវីដ១៩ អាចធ្វើឲ្យភាពក្រីក្រនៅកម្ពុជា កើនឡើងពី៣ទៅ១១ភាគរយទៀត
×![]()
ដោយ: សារព័ត៌មានថ្មីៗ
តាមរយៈសេចក្តីប្រកាសព័ត៌មាន នៅថ្ងៃទី២៩ ខែឧសភា ឆ្នាំ២០២០ ធនាគារពិភពលោក ព្យាករថា ឥទ្ធិពលនៃការរាតត្បាតជំងឺកូវីដ១៩ អាចនឹងធ្វើឲ្យភាពក្រីក្រនៅកម្ពុជា ក្នុងឆ្នាំ២០២០ កើនឡើងពី ៣ ទៅ ១១ភាគរយបន្ថែមទៀត ជាពិសេសក្នុងចំណោមគ្រួសារ ដែលធ្វើការក្នុងវិស័យសំខាន់ៗ ដូចជា ទេសចរណ៍ សំណង់ ពាណិជ្ជកម្ម និង ឧស្សាហកម្មកាត់ដេរ ជាដើម បើពួកគេ បាត់បង់ចំណូល៥០ភាគរយ សម្រាប់រយៈពេល៦ខែជាប់គ្នា។ 
លោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និង យុវនីតិសម្បទា មិនហ៊ានអះអាងឡើយថា ការព្យាកររបស់ធនាគារពិភពលោក ត្រឹមត្រូវឬមិនត្រឹមត្រូវ ដ្បិតលោក មិនបានដឹងថា ធនាគារពិភពលោក ពឹងផ្អែកលើវិធីសាស្ត្រអ្វី ក្នុងការវាយតម្លៃឬការព្យាករនេះ។ យ៉ាងណា លោក និយាយថា លោក ពិបាកនឹងជឿ ដែលថា ភាពក្រីក្រនៅកម្ពុជា អាចកើនឡើងដល់១១ភាគរយបន្ថែមទៀត បើទោះបីកម្ពុជា រងផលប៉ះពាល់ដោយសារជំងឺកូវីដ១៩ក្តី។
ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ អ្នកនាំពាក្យក្រសួងសង្គមកិច្ច ថ្លែងថា ក្រុមការងាររបស់លោក និងអ្នកពាក់ព័ន្ធផ្សេងៗ កំពុងសិក្សានិងចុះស្រង់ស្ថិតិប្រជាជនក្រីក្រនិងខ្វះខាត ដើម្បីឧបត្ថម្ភថវិកា ក្នុងអំឡុងវិបត្តិជំងឺកូវីដ១៩។ លោក ប្រាប់ថា បច្ចុប្បន្ន អត្រាក្រីក្រនៅកម្ពុជា មានប្រមាណ១០ភាគរយ បើគិតជាគ្រួសារ មានជាង៥៤ម៉ឺនគ្រួសារ ហើយបើគិតជាចំនួនមនុស្ស មានជាង២,៤លាននាក់។
ក្នុងសេចក្តីប្រកាសព័ត៌មាន ធនាគារពិភពលោក លើកឡើងថា ការរាតត្បាតនៃជំងឺកូវីដ១៩ កំពុងបង្កការប៉ះទង្គិចយ៉ាងដំណំទៅលើវិស័យសំខាន់ៗ សម្រាប់ជំរុញកំណើនសេដ្ឋកិច្ចកម្ពុជា ដូចជា វិស័យទេសចរណ៍ វិស័យឧស្សាហកម្មនាំចេញ និង និង វិស័យសំណង់ ជាដើម ដែលតំណាងឲ្យជាង៧០ភាគរយនៃកំណើនសេដ្ឋកិច្ច និងផ្តល់ការងារប្រមាណ៤០ភាគរយ នៃការងារសរុប ក្នុងប្រទេសកម្ពុជា។
ដោយសារមូលហេតុនេះ ក្នុងឆ្នាំ២០២០ កំណើនសេដ្ឋកិច្ចកម្ពុជា ត្រូវបានរំពឹងទុកថា «នឹងមានល្បឿនយឺតបំផុតមិនដែលធ្លាប់ជួបប្រទះតាំងពីឆ្នាំ១៩៩៤មក» ដោយវានឹងថមថយមកដល់រវាង -១ភាគយ និង -២,៩ ភាគរយ។ នេះជាការទាញសេចក្តីសន្និដ្ឋានរបស់ធនាគារពិភពលោក។
ធនាគារពិភពលោក បន្តថា ការប៉ះពាល់វិស័យទាំងនេះ បានប៉ះទង្គិចយ៉ាងខ្លាំងដល់កំណើនសេដ្ឋកិច្ចកម្ពុជា និងធ្វើឲ្យការងាររបស់មនុស្សយ៉ាងហោចណាស់ «ជាង១,៧លាននាក់» ស្ថិតក្នុងហានិភ័យ។
រដ្ឋាភិបាលកម្ពុជា បានដាក់ចេញវិធានការជាច្រើន ជាមួយនឹងការត្រៀមថវិកាពី៨រយលានដុល្លារ ទៅ២ពាន់លានដុល្លារ ដើម្បីដោះស្រាយវិបត្តិសេដ្ឋកិច្ច និងបញ្ហានានា ដែលកើតឡើងដោយសារជំងឺកូវីដ១៩។
នៅកម្ពុជា ស្ថានភាពជំងឺកូវីដ១៩ ត្រូវគេវាយតម្លៃថា បានធូរស្រាលវិញ ក្រោយអ្នកជំងឺកូវីដ១៩ ១២២នាក់ បានជាសះស្បើយ ខណៈនៅសល់តែ២នាក់ទៀត កំពុងសម្រាកព្យាបាល៕
Tag:
COVID-19
WB
ភាពក្រីក្រ
© រក្សាសិទ្ធិដោយ thmeythmey.com
