លោក ត្រាំ ដកសិទ្ធិពិសេសមួយចំនួនពីហុងកុង និងហាមនិស្សិតចិនមានទំនាក់ទំនងជាមួយយោធា ចូលអាមេរិក

COVID-19

អន្តរជាតិ

នយោបាយអន្តរជាតិ

លោក ត្រាំ ដកសិទ្ធិពិសេសមួយចំនួនពីហុងកុង និងហាមនិស្សិតចិនមានទំនាក់ទំនងជាមួយយោធា ចូលអាមេរិក

30, May 2020 , 8:59 pm

រូបភាព

ដោយ: តន ចាន់រិទ្ធារ៉ា

សហរដ្ឋអាមេរិក បានចាត់វិធានការតបនឹងការសម្រេចចិត្តរបស់ចិនដែលចងបង្កើតច្បាប់សន្តិសុខជាតិមួយសម្រាប់អនុវត្តនៅទីក្រុងហុងកុង។ នៅថ្ងៃទី២៩ ខែឧសភា ប្រធានាធិបតីអាមេរិក ដូណាល់ ត្រាំ ប្រកាសថា ទីក្រុងហុងកុង នឹងមិនអាចទទួលបានសិទ្ធិអនុគ្រោះពិសេសមួយចំនួនក្នុងការរកស៊ីជាមួយអាមេរិកដូចមុនទៀតឡើយ។ លើសពីនោះ លោក ត្រាំ បញ្ជាឲ្យហាមឃាត់និស្សិតដែលអាចបង្កការគំរាមកំហែង ចូលអាមេរិកផងដែរ។

ពីសន្និសីទសារព័ត៌មាមនៅសេតវិមាននៅថ្ងៃទី២៩ ខែឧសភា ប្រធានាធិបតីអាមេរិក ដូណាល់ ត្រាំ បានរិះគន់ទីក្រុងប៉េកាំងចំៗចំពោះគម្រោងបង្កើតច្បាប់សន្តិសុខជាតិនៅហុងកុង។ សម្រាប់លោក ត្រាំ សេចក្ដីស្នើច្បាប់នេះ បានបំបាក់មុខមាត់ទីក្រុងហុងកុង និងឋានៈពិសេសដែលគួរឲ្យមានមោទកភាព។ យ៉ាងណាមិញ លោក ត្រាំ មិនបានរិះគន់ដោយចំពោះលើប្រធានាធិបតី ស៊ី ជិនភីង ដែលលោកចាត់ទុកជាមិត្តឡើយ។

ជាការឆ្លើយតបនឹងគម្រោងរបស់ចិន លោក ត្រាំ បានបញ្ជាឲ្យរដ្ឋបាលរបស់លោកចាប់ផ្ដើមដំណើរការលុបចោលគោលនយោបាយដែលផ្ដល់ឲ្យហុងកុងសិទ្ធិ និងឋានៈពិសេស ដែលអាមេរិកមិនមានជាមួយចិនឡើយ។ ប៉ុន្តែ ការអនុគ្រោះខ្លះនឹងត្រូវបានលើកលែង។ កាលពីសប្ដាហហ៍មុន រដ្ឋមន្ត្រីការបរទេស ម៉ៃ ប៉ុមប៉េអូ ប្រាប់សភាអាមេរិក ហុងកុងប្រែប្រួលហើយ ហើយស្ថានភាពបច្ចុប្បន្ន មិនសមស្របនឹងការបន្តផ្ដល់ឲ្យសិទ្ធិពិសេសទៀតឡើយ។

«វានឹងប៉ះពាល់ដល់កិច្ចព្រមព្រៀងជាច្រើនចាប់តាំងពីសន្ធិសញ្ញាបត្យាប័នរហូតដល់សនិ្ធសញ្ញាគ្រប់គ្រងការនាំចេញបច្ចេកវិទ្យាប្រើពីរគោលដៅ និងកិច្ចព្រមព្រៀងច្រើនទៀត ដោយមានការលើកលែងតិចតួច។» នេះជាការបញ្ជាក់របស់លោក ត្រាំ ។

មិនមែនតែហុងកុង លោក ត្រាំ ក៏ប្រកាសវិធានការច្រើនទៀតសំដៅសិស្សចិនផងដែរ។ ជាចំណាត់ការដែលនឹងបង្កផលប៉ះពាល់ធ្ងន់ធ្ងរ លោកបានបញ្ជាឲ្យហាមឃាត់និស្សិតដែលចង់បន្តការសិក្សា ចូលទឹកដីអាមេរិក។ មិនមែនសិស្សចិនទាំងអស់ត្រូវហាមឡើយ គឺរាប់បញ្ចូលតែនិស្សិតថ្នាក់បញ្ចប់ការសិក្សាដែលមានទំនាក់ទំនងជាមួយយោធាចិនប៉ុណ្ណោះ។ អាមេរិកបារម្ភថា និស្សិតទាំងនោះ អាចក្លាយជាឧបករណ៍ប្រមូលព័ត៌មានសម្ងាត់ឲ្យកងទ័ព។

បើតាមលោក ត្រាំ រដ្ឋាភិបាលចិនបានចំណាយពេលច្រើនឆ្នាំហើយក្នុងការលួចព័ត៌មានពីអាមេរិក ពិសេសការសម្ងាត់ទាក់ទងវិស័ហឧស្សាហកម្ម តាមមរយៈជនជាតិខ្លួន។ យ៉ាងណាមិញ បណ្ដាសាកលវិទ្យាល័យអាមេរិក នឹងមិនគាំទ្រវិធានការនេះឡើយ ព្រោះធ្វើឲ្យបាត់ប្រភពចំណូលដ៏ធំ ចំពេលជំងឺ COVID-19 រាលដាលផងនោះ។ មួយទសវត្សរ៍ចុងក្រោយ សិស្សចិន១០ម៉ឺននាក់ រៀននៅអាមេរិក៕