ជាតិ
សេដ្ឋកិច្ច
CDC ព្រមឱ្យក្រុមហ៊ុន២បង្កើតកសិដ្ឋានដាំដូងប្រេង កៅស៊ូ ល្ហុង និងរោងចក្រកែច្នៃផ្លែឈើ ដើម្បីនាំចេញ
× ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា(CDC) បានអនុម័តឱ្យក្រុមហ៊ុនថ្មីចំនួនពីរ ដែលមានទុនវិយោគសរុប ២៧,២លានដុល្លារ បង្កើតកសិដ្ឋានដាំដំណាំឧស្សាហកម្ម និងបង្កើតរោងចក្រកែច្នៃផ្លែឈើគ្រប់ប្រភេទ ដើម្បីនាំចេញទៅបរទេស។ CDC បានអះអាងថា ក្រុមហ៊ុនទាំងពីរនេះដែលធ្វើការងារលើវិស័យកសិកម្ម នឹងផ្តល់ឱកាសការងារដល់ពលរដ្ឋកម្ពុជាបានរហូតជាង៣,២០០កន្លែង។
បើតាមការចុះផ្សាយរបស់CDCលើទំព័រហ្វេសប៊ុក ក្រុមហ៊ុនទាំងពីរនោះ ឈ្មោះ VIRTUS GREEN PLANTATIONS (CAMBODIA) PTE., LTD ដែលគ្រោងបង្កើតកសិដ្ឋានដាំដំណាំកសិ-ឧស្សាហកម្ម (ដូងប្រេង កៅស៊ូ និងល្ហុងប្រេង) ក្នុងទំហំវិនិយោគ ២១, ៧លានដុល្លារអាមេរិក។ CDC បានបញ្ជាក់ថា គម្រោងវិនិយោគដាំដំណាំឧស្សាហកម្មរបស់ក្រុមហ៊ុននេះ គឺស្ថិតនៅតំបន់ប្រើប្រាស់ដីដោយចីរភាពនៃឧទ្យានជាតិព្រះមុនីវង្ស«បូកគោ» ក្នុងស្រុកជុំគីរី និងស្រុកទឹកឈូ ខេត្តកំពត។
រីឯ ក្រុមហ៊ុនមួយទៀតដែលវិនិយោគប្រមាណ៥,៥លានដុល្លារ លើការបង្កើតរោងចក្រកែច្នៃផ្លែឈើគ្រប់ប្រភេទនោះ ឈ្មោះ CAM M J AGRICULTURAL CO., LTD។ គម្រោងវិនិយោគនេះមានទីតាំងនៅភូមិអង្គ្រង ឃុំអង្គពពេល ស្រុកគងពិសី ខេត្តកំពង់ស្ពឺ។
កាលឆ្នាំ២០១៩ កម្ពុជានាំចេញជ័រកៅស៊ូបានជិត៣០ម៉ឺនតោន។ ដោយឡែកក្នុងរយៈពេល៤ខែនៃដើមឆ្នាំ២០២០នេះ កម្ពុជានាំចេញជ័រកៅស៊ូ បានជាង៧ម៉ឺនតោន។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។ បច្ចុប្បន្ន កម្ពុជាមានផ្ទៃដីកៅស៊ូសរុប៤០៥,៩១៦ហិកតា ក្នុងនោះផ្ទៃដីចៀរជ័រមានចំនួន២៥០,៤៣៤ហិកតា ស្មើនឹង៦២ភាគរយ៕
Tag:
កសិកម្ម
រោងចក្រ
កំពង់ស្ពឺ
កំពត
© រក្សាសិទ្ធិដោយ thmeythmey.com