COVID-19
អន្តរជាតិ
នយោបាយអន្តរជាតិ
ធនាគារពិភពលោកផ្តល់កម្ចីឲ្យឥណ្ឌូណេស៊ីជាង២០០លានដុល្លារដើម្បីឆ្លើយតបវីរុស Covid-19 រដ្ឋមន្ត្រីហិរញ្ញវត្ថុឥណ្ឌូណេស៊ីលោកស្រី Mulyani Indrawati (រូបភាព៖ AFP)
× ធនាគារពិភពលោក នៅថ្ងៃ២៩ ឧសភា បានសម្រេចអនុម័តផ្តល់ការគាំទ្រហិរញ្ញវត្ថុលើគម្រោងឆ្លើយតបបន្ទាន់នឹងវីរុស Covid-19 របស់ឥណ្ឌូណេស៊ី ក្នុងទំហំទឹកប្រាក់ ២៥០លានដុល្លារ។ គម្រោងកម្ចីដ៏ធំនេះ នឹងត្រូវយកទៅប្រើប្រាស់ដើម្បីអភិវឌ្ឍន៍សម្ភារសុខាភិបាល និងប្រព័ន្ធតាមដាន ដែលជាផ្នែកមួយនេះ នៃការទប់ស្កាត់វីរុសឆ្លងនានារបស់ឥណ្ឌូណេស៊ី ជាពិសេសលើករណីវីរុស Covid-19 តែម្តង។
តាមការអះអាងរបស់ រដ្ឋមន្ត្រីហិញ្ញវត្ថុឥណ្ឌូណេស៊ី លោកស្រី Mulyani Indrawati ឥណ្ឌូណេស៊ី នឹងប្រើប្រាស់គ្រប់មធ្យោបាយ ដើម្បីការពារ និងទប់ស្កាត់ផលប៉ះពាល់ ដែលបណ្តាលមកពីវីរុស Covid-19។ លោកស្រី បន្តថា តាមរយៈកម្ចីនេះឥណ្ឌូណេស៊ីប្តេជ្ញាពង្រឹងការទប់ស្កាត់, ការតេស្ត, ការព្យាបាល និងប្រព័ន្ធព័ត៌មានវិទ្យា ក៏ដូចជាការពារបុគ្គលិកសុខាភិបាលឲ្យបានល្អ។ នេះបើយោងតាមការចុះផ្សាយរបស់សារព័ត៌មាន Jakarta Globe។
តាមរយៈគម្រោងនេះ លោកស្រីរដ្ឋមន្ត្រី ជឿជាក់ថា មនុស្សចាស់ជរាដែលមានជំងឺប្រចាំកាយ អ្នកជំងឺដែលបានឆ្លងវីរុស Covid-19 ក៏ដូចជាបុគ្គលិកសុខាភិបាល នឹងទទួលបានផលប្រយោជន៍ច្រើន។ មិនត្រឹមតែប៉ុណ្ណោះ គម្រោងនេះ ក៏នឹងជួយឥណ្ឌូណេស៊ីក្នុងការត្រៀមលក្ខណៈទុកជាមុនដើម្បីការពារ និងទប់ស្កាត់ជំងឺរាតត្បាតផ្សេងៗ ដែលអាចកើតមាននាពេលខាងមុខ តាមរយៈប្រព័ន្ធផ្តល់ដំណឹងល្អប្រសើរ។
ជុំវិញការអនុម័តកម្ចីដ៏ធំនេះដែរ នាយកប្រតិបត្តិធនាគារពិភពលោកប្រចាំឥណ្ឌូណេស៊ី Satu Kahkonen បានថ្លែងថា ធនាគារពិភពលោក មានមោទកភាពក្នុងការជួយគាំទ្រឥណ្ឌូណេស៊ីក្នុងការឆ្លើយតបវីរុស Covid-19 ក៏ដូចជាកិច្ចប្រឹងប្រែងនានាដើម្បីកាត់បន្ថយឲ្យនៅអប្បបរមាបំផុតនៃផលប៉ះពាល់នៃវីរុសរាតត្បាតនេះក្នុងប្រទេស។ ហើយនេះ ក៏ជាផ្នែកមួយក្នុងការជួយកាត់បន្ថយភាពក្រីក្រ និងការការពារធនធានមនុស្សផងដែរ។
គួរជម្រាបផងដែរថា គិតត្រឹមថ្ងៃ៣១ ឧសភា ឥណ្ឌូណេស៊ី បានមានករណីឆ្លងវីរុស Covid-19 សរុប ២៥ ៧៧៣ ករណីហើយ ដែលក្នុងនោះ មានអ្នកជំងឺបានជាសះស្បើយវិញ ៧ ០១៥ ករណី និងបានស្លាប់រហូត ១ ៥៧៣ករណីផងដែរ៕
© រក្សាសិទ្ធិដោយ thmeythmey.com