កីឡាជាតិ
ជាតិ
លោក ហុក ឈាងគីម បង្ហាញកត្តាដែលក្មេងបច្ចុប្បន្នហាត់ល្បុក្កតោឆាប់រីកចម្រើនជាងក្មេងជំនាន់មុន
លោកព្រឹទ្ធាចារ្យ ហុក ឈាងគីម អនុប្រធានសហព័ន្ធកីឡាគុនល្បុក្កតោកម្ពុជា
×![]()
ព្រឹទ្ធាចារ្យ ហុក ឈាងគីម អនុប្រធានសហព័ន្ធកីឡាគុនល្បុក្កតោកម្ពុជា សង្កេតឃើញថា អ្នកហាត់គុនល្បុក្កតោបច្ចុប្បន្នមានសមត្ថភាពខ្លាំងជាងអ្នកហាត់គុនជំនាន់មុន។ ការហ្វឹកហាត់ទៀតសោត ក្មេងបច្ចុប្បន្នឆាប់ចាប់បាន និងរីកចម្រើនជាងក្មេងជំនាន់មុន។ តើភាពខុសគ្នានេះបណ្តាលមកពីមូលហេតុអ្វី? 
ព្រឹទ្ធាចារ្យ ហុក ឈាងគីម បានបង្ហាញពីហេតុផលមួយចំនួន ដែលជួយជំរុញឲ្យក្មេងៗបច្ចុប្បន្នហ្វឹកហាត់គុនល្បុក្កតោឆាប់រីកចម្រើនជាងក្មេងៗជំនាន់មុន។ តាមរយៈការសង្កេតរបស់អនុប្រធានសហព័ន្ធកីឡាគុនល្បុក្កតោរូបនេះ ក្មេងៗបច្ចុប្បន្នមានទីកន្លែង និងសម្ភារហ្វឹកហាត់គ្រប់គ្រាន់ ហើយគ្រូបង្វឹកមានវិជ្ជាជីវៈក្នុងការហ្វឹកហាត់។ បញ្ហាចំណេះដឹង ក៏ជាកត្តារួមចំណែកមួយផងដែរ។
ខុសពីក្មេងជំនាន់មុនការហ្វឹកហាត់ស្ថិតក្រោមការរឹតដ្បិត គ្មានទីកន្លែងហ្វឹកហាត់ត្រឹមត្រូវ និងខ្វះសម្ភារក្នុងការហ្វឹកហាត់ ហើយគ្រូបង្វឹកគ្មានវិជ្ជាជីវៈ និងក្បួនខ្នាតត្រឹមត្រូវក្នុងការហ្វឹកហាត់។ នេះជាការលើកឡើងរបស់លោកព្រឹទ្ធាចារ្យ ហុក ឈាងគីម ដែលសង្កេតឃើញថា អ្នកហាត់គុនជំនាន់មុនមានការគោរពវិន័យបានល្អជាងអ្នកហាត់គុនបច្ចុប្បន្ន ដែលបញ្ហានេះ អាចណ្តាលមកពីគ្រូបង្វឹកជំនាន់មុនកាចជាងគ្រូបង្វឹកបច្ចុប្បន្ន។
«ពីមុនការហ្វឹកហាត់លើតែការនិយាយស្តី និងបង្រៀនជាទ្រឹស្តីទេ ឯសម័យឥឡូវនេះ គឺទ្រឹស្តី វាទៅជាមួយសម្ភារ។ បច្ចុប្បន្នមានសម្ភារគ្រប់សព្វ ដែលអាចធ្វើឲ្យក្មេងៗឆាប់ធ្វើបាន ដូចជាដំបងវែង ដំបងខ្លីអី យើងសម្បូរសម្ភារ តែបើក្មេងពីដើមគ្មានទេ រកតែកន្លែងហាត់ ក៏យ៉ាប់ដែរ»។ លោក ហុក ឈាងគីម លើកឡើងបែបនេះក្នុងបទសម្ភាសជាមួយសារព័ត៌មានថ្មីៗកាលពីពេលកន្លងទៅ។
ព្រឹទ្ធាចារ្យរូបនេះបានបន្ថែមថា៖«ក្មេងៗបច្ចុប្បន្នហាត់ឆាប់រីកចម្រើនជាងក្មេងៗពីដើម ហើយការយល់ដឹងរបស់គេ គឺអាស្រ័យលើគ្រូ បើគ្រូយល់ដឹងពីចិត្តសាស្ត្រក្មេង ចិត្តសាស្ត្រនៃការអប់រំ ការបង្រៀន និងគរុកោសល្យក្នុងការបង្វឹក វានឹងទៅលឿន(ហ្វឹកហាត់ឆាប់ចេះ)។ បើយើងប្រៀបធៀបទៅគ្រូៗពីដើម ការយល់ដឹងនៅមានកម្រិត ចិត្តសាស្ត្រ និងគរុកោសល្យរបស់គាត់មិនទាន់ល្អត្រឹមត្រូវទេ អ៊ីចឹងការផ្ទេរទៅឲ្យក្មេងៗ យឺតជាងគ្រូបង្វឹកសម័យឥឡូវ»។
មិនខុសគ្នាពីលោក ហុក ឈាងគីម នោះទេ ព្រឹទ្ធាចារ្យក្រមាមាស សាន គីមស៊ាន ប្រធានរាជបណ្ឌិតសភាល្បុក្កតោកម្ពុជាសង្កេតឃើញថា ក្មេងៗហាត់គុនល្បុក្កតោបច្ចុប្បន្ន មានសមត្ថភាពខ្លាំងជាងក្មេងៗជំនាន់មុន និងរៀមច្បងក្រោមការបង្វឹករបស់លោកកន្លងទៅ។ លោកមានការភ្ញាក់ផ្អើល និងរំភើបយ៉ាងខ្លាំងនៅពេលឃើញក្មេងៗបច្ចុប្បន្នបង្ហាញឆន្ទៈក្នុងការរួមចំណែកអភិរក្ស និងអភិវឌ្ឍន៍គុនល្បុក្កតោ ដែលជាកេរដំណែលរបស់បុព្វបុរសខ្មែរ។
លោកព្រឹទ្ធាចារ្យក្រមាមាស សាន គីមស៊ាន ប្រធានរាជបណ្ឌិតសភាល្បុក្កតោកម្ពុជា
លោកបានលើកឡើងកន្លងមកយ៉ាងដូច្នេះថា៖«ខ្ញុំខានមើលខានឃើញចៅៗ ចៅទួតល្បុក្កតោតែមួយរយៈពេលខ្លី ស្រាប់តែមកមើលលើកនេះ ភ្ញាក់ផ្អើលមែនទែន! ល្អណាស់ជោគជ័យល្បុក្កតោ! ក្មួយៗចៅៗ បង្ហាញស្នៀតទ្វារមេគុនព្រលឹងល្បុក្កតោល្អជាងគ្រូៗផង។ សំខាន់ក្មួយៗធ្វើចេញពីព្រលឹងជាតិដែលមានក្នុងបេះដូងយើងទាំងអស់គ្នា។ ខ្ញុំឃើញក្មួយៗចៅទាំងអស់ធ្វើចេញពីកម្លាំងចិត្ត កម្លាំងកាយចេញពីបេះដូង ខ្ញុំរន្ធត់មែនទែន! ខ្ញុំស្ទើរតែមិនជឿថា ព្រលឹងជាតិនេះ ខ្លាំងខ្លាមិននឹកស្មានដល់»។
ទីប្រឹក្សាក្រសួងវប្បធម៌ និងវិចិត្រសិល្បរូបនេះបន្ថែមថា៖«ពេលខ្ញុំបង្ហាត់រៀមច្បង និងគ្រូពួកយើងពីមុនៗមក ខ្ញុំគិតថា ដូចជាមិនសូវល្អប៉ុន្មាននោះទេ មិនមែនបង្អាប់ទេ។ ប៉ុន្តែពេលមកឃើញការប្រកួត និងសម្តែងរបស់ចៅៗ ចៅទួតបច្ចុប្បន្ន គឺអស្ចារ្យមែនទែន! ខ្ញុំយល់ឃើញថា អ្វីដែលខ្ញុំបានខិតខំបង្ហាត់បង្រៀនដំណៗតាំងពីឆ្នាំ២០០៤ដល់ឆ្នាំ២០១៩ មិននឹកស្មានថា អ្វីដែលខ្ញុំបានបង្កើត និងខំប្រឹងកន្លងមក លទ្ធផលនៅឆ្នាំនេះ ជាលទ្ធផលជោគជ័យដ៏អស្ចារ្យចំពោះខ្ញុំ»។
គុនល្បុក្កតោជាកីឡាមួយប្រភេទ ស្ថិតចំណោមកីឡា១៧ប្រភេទ ដែលត្រូវបានកម្ពុជាដាក់ឲ្យប្រកួតប្រជែងក្នុងព្រឹត្តិការណ៍កីឡាស៊ីហ្គេមលើកទី៣២ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ កីឡាទាំង១៧ប្រភេទ ដែលកម្ពុជាជ្រើសរើសដំណាក់កាលដំបូងរួមមានអត្តពលកម្ម, ហែលទឹក, ប៉េតង, ជឺជិតស៊ូ, តេក្វាន់ដូ WTF, ម៉ូតូទឹក, វ៉ូវីណាម, ប្រដាល់គុនខ្មែរ, ល្បុក្កតោ, អុកចត្រង្គ, ចំបាប់, តេក្វាន់ដូ ITF, សូហ្វតិន្នីស, ប្រដាល់សកល, វាយកូនបាល់, បាល់ទាត់ និងសីដក់(ឈិនឡូន)៕
Tag:
ល្បុក្កតោ
ហុក ឈាងគីម
© រក្សាសិទ្ធិដោយ thmeythmey.com
