ជាតិ
សង្គមជាតិ
មូសុងនិរតីនឹងបង្កឲ្យមានរន្ទះ ខ្យល់កន្ត្រាក់នៅតំបន់វាលទំនាប ជួរភ្នំដងរែក និងខ្ពង់រាបឦសាន
×![]()
ដោយ: ថ្មីៗ
ភ្នំពេញ៖ ចាប់ពីថ្ងៃទី៣-៩ ខែមិថុនា កម្ពុជាទទួលរងនូវខ្យល់មូសុងនីរតី ដែលបណ្តាលឲ្យតំបន់វាលទំនាប តំបន់ជួរភ្នំដងរែក និងខ្ពង់ឦសាន គ្របដណ្តប់ដោយទឹកភ្លៀង និងបង្កឲ្យមានបាតុភូតផ្គរ រន្ទះ និងខ្យល់កន្ត្រាក់។ នេះបើតាមសេចក្តីជូនដំណឹងរបស់ក្រសួងធនធានទឹក និងឧតុនិយម ជាមួយនឹងការអំពាវនាវឲ្យពលរដ្ឋនៅតំបន់ទាំងនោះប្រុងប្រយ័ត្នឲ្យមែនទែន។
ក្រសួងធនធានទឹក បានបញ្ជាក់ថា ខេត្តដែលនៅតំបន់វាលទំនាបកណ្តាល មានសីតុណ្ហភាពអប្បបរមាពី២៥ទៅ២៧អង្សា និងសីតុណ្ហភាពអតិបរមានពី៣៤-៣៦អង្សា និងមានភ្លៀងធ្លាក់រាយប៉ាយពីមធ្យមទៅបង្គួរ។ ចំណែកនៅផ្នែកខ្លះ ក្នុងទំនាបភាគពាយ័ព្យ និងភាគកណ្តាល ក៏មានភ្លៀងធ្លាក់ដែរ។
សម្រាប់បណ្តាខេត្តដែលនៅតំបន់ជួរភ្នំដួងរែក និងតំបន់ខ្ពង់រាបឦសាន មានសីតុណ្ហភាពអប្បបរមាចាប់ពី២៤ទៅ២៦អង្សា និងសីតុណ្ហភាពអតិបរមាពី ៣៣ទៅ៣៥អង្សា និងមានភ្លៀងធ្លាក់ពីខ្សោយទៅមធ្យម។ ដោយឡែកខេត្តជាប់ឆ្នេរសមុទ្រ នឹងមានសីតុណ្ហភាពអប្បបរមាពី ២៥ ដល់២៧អង្សា និងសីតុណ្ហភាពអតិបរមាពី៣២ដល់៣៤អង្សា ព្រមទាំងមានភ្លៀងធ្លាក់ពីតិច ទៅបង្គួរ។
ក្រសួងធនធាន បានអំពាវនាវឲ្យពលរដ្ឋប្រុងប្រយ័ត្នខ្ពស់ ចំពោះបាតុភូតផ្គរ រន្ទះ និងខ្យល់កន្ត្រាក់ ពិសេសនៅតំបន់វាលទំនាប ជួរភ្នំដងរែក និងខ្ពង់រាបឦសាន៕
Tag:
អាកាសធាតុ
រន្ទះ
ខ្យល់កន្ត្រាក់
© រក្សាសិទ្ធិដោយ thmeythmey.com
