ជាតិ
សង្គមជាតិ
រោងចក្រ និងសហគ្រាសទេសចរណ៍ ៤២៥ទីតាំងព្យួរការងារ និងប៉ះពាល់កម្មករជាង១៤ម៉ឺននាក់
កម្មកររោងចក្រកំពុងធ្វើដំណើរត្រឡប់ទៅផ្ទះ
×![]()
ដោយ: ឡាយ សុភាវតី
ភ្នំពេញ៖ គិតត្រឹមថ្ងៃទី២៩ ឧសភា ឆ្នាំ២០២០ រោងចក្រកាត់ដេរ និងសហគ្រាសក្នុងវិស័យទេសចរណ៍៤២៥ទីតាំង បានព្យួរការងារ ដែលប៉ះពាល់កម្មករជាង១៤ម៉ឺននាក់។ នេះបើតាមការថ្លែងរបស់សម្ដេច ហ៊ុន សែន ក្នុងពិធីសំណេះសំណាលជាមួយមន្រី្ត និងក្រុមការងារបច្ចេកទេស ស្ថាបនាហេដ្ឋាររតនាសម្ព័ន្ធផ្លូវនៅខេត្តព្រះសីហនុថ្ងៃទី១ មិថុនានេះ។ 
សម្ដេច ហ៊ុន សែន អះអាងថា ការព្យួរការងារនេះ ដោយសារគ្មានអ្នកបញ្ជាទិញ ខណៈដែលបណ្ដាប្រទេស បញ្ជាទិញទាំងនោះ កំពុងរងការរីករាលដាលនៃជំងឺកូវីដ-១៩ ធ្ងន់ធ្ងរ។ សម្ដេច បានថ្លែងបន្ថែមថា៖ «រដ្ឋចេញ៤០ដុល្លារ វិស័យឯកជនចេញ៣០ដុល្លារ អ៊ីចឹងក្នុងមួយខែកម្មករដែលបាត់បង់ការងារធ្វើនេះ បានចំនួន៧០ដុល្លារ»។
រោងចក្រកាត់ដេរ ដែលបានព្យួរការងារ មានចំនួន២៥៦ទីតាំង ដែលប៉ះពាល់ដល់កម្លាំងកម្មករជាង១៣ម៉ឺននាក់។ រីឯសហគ្រាសក្នុងវិស័យទេសចរណ៍ ១៦៩កន្លែង ក៏បានព្យួរការងារ និងប៉ះពាលដល់កម្មករ១៦,៨៩៦នាក់ដែរ។ នេះបើតាមប្រមុខរដ្ឋាភិបាល។
លោក អាត ធន់ ប្រធានសហភាពការងារកម្ពុជា បានបញ្ជាក់ថា កម្មករក្នុងវិស័យកាត់ដេរ និងទេសចរណ៍ជាង១៤ម៉ឺននាក់ ភាគច្រើនមិនទាន់មានឈ្មោះក្នុងបញ្ជីឧបត្ថម្ភរបស់ក្រសួងការងារឡើយ។ លោក អាត ធន់ ស្នើឱ្យរដ្ឋាភិបាលពន្លឿនការដោះស្រាយលើបញ្ហាប្រាក់ឧបត្ថម្ភនេះ ខណៈកម្មករកំពុងជួបការលំបាក ។
«យើងមានការព្រួយបារម្ភ ព្រោះកម្មករជាង១៣ម៉ឺននាក់ មកដល់ពេលនេះ ទើបតែទទួលបានប្រមាណជាង១០០ក្រុមហ៊ុន ហើយកម្មករប្រមាណ៣ម៉ឺននាក់ប៉ុណ្ណោះ ដែលបានទទួល(ប្រាក់ឧបត្ថម្ភ)។ ចំនួននេះ តិចពេក ហើយអ្វីដែលយើងបារម្ភ គឺខ្លាចអ្នកព្យួរផ្សេងៗទៀត មិនបានបើកលុយ ហើយអំឡុងពេលនេះ ពួកគាត់កំពុងពិបាកត្រូវការលុយ អ៊ីចឹងហើយពួកគាត់នឹងរងការពិបាកក្នុងជីវភាពរស់នៅ»។ នេះបើតាមប្រធានសហភាពការងារកម្ពុជា ដោយបញ្ជាក់ថា លោក បានឲ្យកម្មករដែលគ្មានឈ្មោះក្នុងបញ្ជី ទៅផ្ទៀងផ្ទាត់ជាមួយ ក្រុមហ៊ុនរបស់ខ្លួន។ ជាពិសេសប្រមូលឈ្មោះ ដើម្បីដាក់ពាក្យបណ្ដឹងទៅក្រសួង ។
បើតាមលោក អាត ធន់ រដ្ឋាភិបាលគួរពិនិត្យនិងផ្ដល់ប្រាក់ឧបត្ដមឲ្យកម្មករក្នុងវិស័យផ្សេងទៀត ក្រៅពីវិស័យកាត់ដេរនិងទេសចរណ៍៕
Tag:
រោងចក្រ
សហគ្រាស
ទេសចរណ៍
© រក្សាសិទ្ធិដោយ thmeythmey.com
