ជាតិ
សេដ្ឋកិច្ច
ស្ថាប័នក្រៅរដ្ឋាភិបាល សុំអឺរ៉ុប «១ឆ្នាំទៀត ចាំដក EBA ២០ភាគរយ» ពីកម្ពុជា
រូបពីសម្ព័ន្ធសហជីពចលនាកម្មករ
×![]()
ដោយ: ឡាយ សុភាវតី
សមាគមរោងចក្រកាត់ដេរនៅកម្ពុជា (GMAC) សមាគមស្បែកជើងកម្ពុជា (CFA) និង សភាពាណិជ្ជកម្មអឺរ៉ុបនៅកម្ពុជា (EuroCham) រួមគ្នាស្នើឲ្យគណៈកម្មការអឺរ៉ុប ពន្យារពេល១២ខែ លើការដក២០ភាគរយ នៃប្រព័ន្ធអនុគ្រោះពន្ធសព្វមុខទំនិញ (EBA) ពីកម្ពុជា។ ស្ថាប័នទាំង៣នេះ ប្រាប់ផលលំបាកទៅគណៈកម្មការអឺរ៉ុបថា កម្ពុជា កំពុងរងការប៉ះពាល់ខ្លាំង ក្នុងវិស័យកាត់ដេរ ដោយសារអ្នកបញ្ជាទិញលុបការបញ្ជាទិញជាបន្តបន្ទាប់ ហើយការលុបការបញ្ជាទិញនេះ គឺដោយសាររងការប៉ះពាល់ពីការរាលដាលជំងឺកូវី១៩។ 
តាមរយៈសេចក្តីថ្លែងការណ៍រួម ធ្វើឡើងនៅថ្ងៃទី២ ខែមិថុនា ឆ្នាំ២០២០ ស្ថាប័នទាំង៣ លើកឡើងថា កន្លងមក គណៈកម្មការអឺរ៉ុប តែងបង្ហាញពីការបន្តគាំទ្រដល់ការអភិវឌ្ឍសេដ្ឋកិច្ចកម្ពុជានិងការធ្វើពិពិធកម្មនៃការនាំចេញ ប៉ុន្តែអ្វីដែល គួរឲ្យបារម្ភគឺ គណៈកម្មការអឺរ៉ុប មិនទទួលស្គាល់ផលប៉ះពាល់របស់កម្ពុជា ពីការដកផ្នែកខ្លះនៃ EBA នាពេលខាងមុខនេះ រួមទាំងផលប៉ះពាល់ពីការរីករាលដាលកូវីដ១៩ ដែលនឹងនាំឲ្យមានការប៉ះពាល់កាន់ធ្ងន់ដល់វិស័យកាត់ដេរនៅកម្ពុជា។
សេចក្តីថ្លែងការណ៍ សរសេរដូច្នេះថា«[យើង] ស្នើឲ្យគណៈកម្មការអឺរ៉ុប ពន្យារពេលដក EBA យ៉ាងហោចណាស់១២ខែទៀត រហូតដល់ខែសីហា ឆ្នាំ២០២១ ដើម្បីឲ្យវិស័យនេះងើបឡើងវិញពីការខូចខាតដែលបណ្ដាលមកពីជំងឺរាតត្បាតកូវីដ១៩»។
សូមរម្លឹកថា គណៈកម្មការអឺរ៉ុប បានសម្រេចដក EBA ២០ភាគរយ ពីកម្ពុជា កាលពីដើមខែកុម្ភៈ ឆ្នាំ២០២០។ បើគ្មានការប្រែប្រួលនោះទេ សល់តែជាង២ខែទៀតប៉ុណ្ណោះ គឺនៅខែសីហា ឆ្នាំ២០២០ សេចក្តីសម្រេចនេះ នឹងចូលជាធរមាន។ វា មានន័យថា ចាប់ពីខែសីហា ឆ្នាំ២០២០ទៅ កម្ពុជា ត្រូវបង់ពន្ធ លើមុខទំនិញ២០ភាគរយ ពេលនាំចូលទៅទីផ្សារអឺរ៉ុប។
យ៉ាងណាក៏ដោយចុះ រដ្ឋាភិបាលកម្ពុជា ប្រកាសរួចហើយថា មិនដាក់ខ្លួនអង្វរករភាគីអឺរ៉ុប ឲ្យផ្តល់ EBA ២០ភាគរយនោះ មកវិញទេ។ រដ្ឋាភិបាលកម្ពុជា បង្ហាញជំហររឹងប៉ឹងថា ទោះបាត់ EBA ២០ភាគរយ ក៏កម្ពុជា អាចរស់បានដែរ។
ការផ្តាច់ EBA ដោយផ្នែកខ្លះ ឬចំនួន២០ភាគរយនេះ នឹងធ្វើឲ្យកម្ពុជា ប៉ះពាល់លើវិស័យកាត់ដេរសម្លៀកបំពាក់ និង ស្បែកជើង រួមទាំងប៉ះពាល់ដល់ការនាំចេញផលិតផលធ្វើដំណើរ (ដូចជាវ៉ាលី និង កាបូប ជាដើម) ព្រមទាំងស្ករសផងដែរ។
បច្ចុប្បន្ន នៅកម្ពុជា មានរោងចក្រជាង២៥០ហើយ ដែលបានព្យួរការងារ ហើយបណ្ដាលឲ្យកម្មករជាង១៣ម៉ឺននាក់ បានបាត់បងការងារ។ ប៉ុន្តែ រដ្ឋាភិបាល អះអាងថា មូលហេតុចម្បងដែលធ្វើឲ្យរោងចក្រទាំងនេះ ព្យួរការងារ គឺដោយសារតែឥទ្ធិពលនៃជំងឺកូវីដ១៩។
តាមការប៉ាន់ស្មានរបស់ស្ថាប័នក្រៅរដ្ឋាភិបាលទាំង៣ខាងលើ ការលក់ផលិតផលនៃវិស័យកាត់ដេរនៅត្រីមាសទី២និងត្រីមាសទី៣ របស់កម្ពុជា ក្នុងឆ្នាំ២០២០ នឹងធ្លាក់ចុះ៥០ទៅ៦០ភាគរយ បើធៀបនឹងឆ្នាំ២០១៩៕
Tag:
សេដ្ឋកិច្ច
EBA
© រក្សាសិទ្ធិដោយ thmeythmey.com
