COVID-19
ជាតិ
សង្គមជាតិ
ចិនផ្តល់បរិក្ខារពេទ្យចំនួន១២មុខដល់កម្ពុជាដើម្បីប្រយុទ្ធប្រឆាំង កូវីដ-១៩ រូបភាពពីលោក ណឹម សុវត្ថិ អគ្គនាយកនៃអគ្គនាយកដ្ឋាននយោបាយនិងកិច្ចការបរទេសនៃក្រសួងការពារជាតិកម្ពុជា
× ភ្នំពេញ៖ ក្រសួងការពារជាតិចិនបានចំណាយថវិកា៤លានយ័ន (ប្រមាណ៥៦ម៉ឺនដុល្លារ) ទិញបរិក្ខារពេទ្យចំនួន១២មុខ ដែលមានទម្ងន់២តោនកន្លះឲ្យកម្ពុជា។ បរិក្ខារពេទ្យទាំងនោះ បានប្រគល់ឲ្យក្រសួងការពារកម្ពុជា កាលពីថ្ងៃទី២ ខែមិថុនា ដើម្បីយកទៅប្រើប្រាស់នៅក្នុងមន្ទីរពិសោធន៍ និងលើកកម្ពស់សមត្ថភាពដល់ក្រុមគ្រូពេទ្យយោធាកម្ពុជា ក្នុងការពិនិត្យ និងស្វែងរករោគឆ្លងផ្សេងៗទៀត។
លោក លី ជីងហ្វឹង អនុព័ន្ធយោធាចិនប្រចាំកម្ពុជា ដែលតំណាងឲ្យក្រសួងការពារប្រទេសចិន បានលើកឡើងថា ក្រសួងការពារចិន នឹងបន្តបេ្តជ្ញាចិត្តជាមួយនឹងរដ្ឋាភិបាលកម្ពុជា ដើម្បីប្រឆាំងនឹងជំងឺកូវីដ-១៩ តាមរយៈការផ្តល់សម្ភារ សម្រាប់ប្រយុទ្ធប្រឆាំងនឹងជំងឺកូវីដ-១៩។ លោក លី ជីងហ្វឹង អះអាងថា ជំនួយរបស់ចិននេះ គឺឆ្លុះបញ្ចាំងឲ្យឃើញពីសា្មរតីរបស់ចិនដែលជួយកម្ពុជា ប្រឆាំងនឹងជំងឺក៏កាចសាហាវនេះ។
ក្រសួងព័ត៌មាន បានស្រង់សំដីរបស់លោក លី ជីងហ្វឹង ដូច្នេះថា៖«ប្រជាជនចិន និងកងយោធពលខេរភូមិន្ទ នៅតែបន្តកាន់ដៃគ្នា ប្រកៀកស្មាគ្នា ក្នុងការប្រយុទ្ធប្រឆាំងនឹងជំងឺកូវីដ-១៩ លុះត្រាតែជំងឺនេះ បាត់បង់ពីផែនដី។ ភាគីចិន នៅតែបន្តគាំទ្រភាគីកម្ពុជា ទាំងស្មារតី និងសម្ភារក្នុងការប្រយុទ្ធប្រឆាំងនឹងជំងឺកូវីដ-១៩នេះ»។
រូបភាពពីលោក ណឹម សុវត្ថិ អគ្គនាយកនៃអគ្គនាយកដ្ឋាននយោបាយនិងកិច្ចការបរទេសនៃក្រសួងការពារជាតិកម្ពុជា
លោក ណឹម សុវត្ថិ អគ្គនាយកនៃអគ្គនាយកដ្ឋាននយោបាយ និងកិច្ចការបរទេស នៃក្រសួងការពារជាតិកម្ពុជា បានបញ្ជាក់ថា ក្រោយកម្ពុជាទទួលបានជំនួយនេះពីចិនហើយ កម្ពុជា នឹងបន្តប្រតិបត្តិការជាមួយចិនបន្ថែមទៀត ក្នុងការត្រួតពិនិត្យលើរោគឆ្លងផ្សេងៗទៀត។ លោក ណឹម សុវត្ថិ បន្តថា កិច្ចសហប្រតិបត្តិការនេះ ជាកិច្ចសហប្រតិបត្តិការដ៏រឹងមាំ រវាងកងទ័ពកម្ពុជា-ចិន។
នេះជាលើកទី៤ហើយ ដែលចិនបានផ្តល់ជំនួយជាសម្ភារពេទ្យមកកម្ពុជា ដោយកន្លងមក ចិនក៏បានបញ្ជូនក្រុមគ្រួពេទ្យចំនួន៧រូប ដែលមានបទពិសោធក្នុងការព្យាបាលជំងឺកូវីដ-១៩ សម្រាប់បង្ហាត់បង្រៀនជំនាញព្យាបាលជំងឺកូវីដ-១៩ ដល់ក្រុមគ្រូពេទ្យបង្គោល នៃកងយោធពលខេរមភូមិន្ទរយៈពេល២ខែផងដែរ។
រូបភាពពីលោក ណឹម សុវត្ថិ អគ្គនាយកនៃអគ្គនាយកដ្ឋាននយោបាយនិងកិច្ចការបរទេសនៃក្រសួងការពារជាតិកម្ពុជា
គិតត្រឹមថ្ងៃទី៣ ខែមិថុនានេះ កម្ពុជាមានករណីកូវីដ-១៩ ចំនួន១២៥នាក់ អ្នកជាសះស្បើយមាន១២៣នាក់ និងនៅសល់២នាក់ កំពុងបន្តការព្យាបាល ខណៈដែលចិនមានអ្នកឆ្លងដល់ទៅ៨៣,០២១នាក់ អ្នកសា្លប់ចំនួន៤,៦៣៤នាក់ និងអ្នកជាសះស្បើយមាន៧៨,៣១៤នាក់៕
Tag:
ចិន
បរិក្ខារពេទ្យ
ជំងឺ
កូវីដ-១៩
© រក្សាសិទ្ធិដោយ thmeythmey.com