កីឡាជាតិ
ជាតិ
ក្រសួងអប់រំបង្កើតសាលតម្កល់មេដាយ និងស្នាដៃកីឡានានា ដើម្បីទុកជាសម្បត្តិមនុស្សជាតិ លោក ប៉ុន សុខ ប្រធានមជ្ឈមណ្ឌលហ្វឹកហ្វឺនកីឡាកម្ពុជា, រូបភាពពីអគ្គនាយកដ្ឋានកីឡា
× ក្រសួងអប់រំ យុវជន និងកីឡា បានបង្កើតសាលតម្កល់ឯកសារកីឡា ដើម្បីថែរក្សាមេដាយ ពាន និងស្នាដៃលើឆាកអន្តរជាតិនានារបស់កីឡាករកីឡាការិនី។ យុទ្ធនាការប្រមូលស្នាដៃតាមសហព័ន្ធកីឡាជាតិមកតម្កល់ទុកនេះ គឺដើម្បីរក្សាទុកជាសម្បត្តិមនុស្សជាតិ និងកេរមរតកជូនកីឡាករ ដែលបានសាងស្នាដៃជូនជាតិមាតុភូមិ។
លោក ប៉ុន សុខ ប្រធានមជ្ឈមណ្ឌលហ្វឹកហ្វឺនកីឡានៃក្រសួងអប់រំ យុវជន និងកីឡាបានបញ្ជាក់ថា ក្រសួងបានជ្រើសរើសយកជាន់ទី៥នៃមជ្ឈមណ្ឌលហ្វឹកហ្វឹនកីឡា បង្កើតជាសាលតម្កល់ឯកសារកីឡាកម្ពុជា។ គោលបំណង នៃការបង្កើតសាលតម្កល់ឯកសារនេះ គឹដើម្បីប្រមូលមេដាយ ពាន និងស្នាដៃនានារបស់កីឡាករ ឬអតីតកីឡាករ ដែលដណ្តើមបានលើឆាកអន្តរជាតិមករក្សាទុក។
ម្យ៉ាងទៀត ការបង្កើតកន្លែងតម្កល់ស្នាដៃកីឡានេះ ក៏ដើម្បីបង្ការការបាត់បង់ និងលើកតម្កើងស្នាដៃ និងកិត្តិយសកីឡាករ ដែលបានសាងស្នាដៃជូនជាតិកម្លងមកផងដែរ។ ជាពិសេស សម្រាប់រក្សាទុកជាសម្បត្តិមនុស្សជាតិ និងកេរមរតកដល់ក្មេងៗជំនាន់ក្រោយបានទស្សនា និងសិក្សាស្រាវជ្រាវចងក្រងទុកជាឯកសារជាដើម។
«យើងបង្កើតសាលតម្កល់ឯកសារកីឡាមួយនៅជាន់ទី៥នៃមជ្ឈមណ្ឌលហ្វឹកហ្វឺនកីឡា ព្រោះពាក់ព័ន្ធបញ្ហានឹងកន្លងមក គឺយើងអត់ដែលមានការរៀបចំបែបនឹងទេ មេដាយ ដែលកីឡាករកីឡាការិនីដណ្តើមបាន គាត់យកទៅផ្ទះ អ៊ីចឹងយូរៗទៅវាអាចបាត់បង់។ ហេតុនេះហើយទើបយើងចង់ថែរក្សា ដើម្បីជាសម្បត្តិមនុស្សជាតិ ក៏ដូចជាសម្បត្តិកេរមរតកក្នុងការដណ្តើមមេដាយជូនជាតិយកមករក្សាទុកជូនគាត់»។ នេះជាការបញ្ជាក់របស់លោក ប៉ុន សុខ។
ជាក់ស្តែងសហព័ន្ធកីឡាប្រដាល់គុនខ្មែរ កាលពីថ្ងៃទី២ ខែមិថុនា ឆ្នាំ២០២០ បានប្រមូលមេដាយកីឡាករ ដែលដណ្តើមបានពីការប្រកួតកីឡាស៊ីហ្គេមឆ្នាំ២០១៧ នៅម៉ាឡេស៊ី និងស៊ីហ្គេមឆ្នាំ២០១៩ នៅហ្វីលីពីន ដើម្បីដាក់តម្កល់ក្នុងសាលឯកសារកីឡាកម្ពុជា៕
Tag:
ប៉ុន សុខ
ក្រសួងអប់រំ យុវជន និងកីឡា
© រក្សាសិទ្ធិដោយ thmeythmey.com