ជាតិ
ថេរសភាខេត្តសៀមរាប ប្រកាសផ្សឹកព្រះអង្គ លួន សុវ៉ាត
× ភ្នំពេញ៖ ព្រះប្រធានថេរសភាខេត្តសៀមរាប ព្រះអង្គ ជុំ គឹមឡេង បានចេញសង្ឃសម្រេចផ្សឹកភិក្ខុ លួន សុវ៉ាត ដែលគង់មិនអចិន្ត្រៃយ៍នៅវត្តស្លែង ក្នុងភូមិព្រីង ឃុំជីក្រែង ស្រុកជីក្រែង ខេត្តសៀមរាប ចេញពីភេទជាបព្វជិត កាលពីថ្ងៃទី៣ មិថុនា។ ការប្រកាសផ្សឹកព្រះសង្ឃ លួន សុវ៉ាត ក្រោមសេចក្តីសន្មតថា ព្រះអង្គ បានសេពមេថុនធម្ម (មាតុគ្រាម) ខុសធម៌វិន័យ។
ព្រះប្រធានថេរសភាខេត្តសៀមរាប បានមានថេរដីការថា អង្គប្រជុំថេរសភា បានស្ដាប់វីដេអូសារជាសំឡេងសន្ទនារៀបរាប់រវាង ភិក្ខុ លួន សុវ៉ាត ជាស្ត្រីជាម្ដាយ និងកូនស្រី នៅក្នុងវីដេអូបែកធ្លាយមួយ រួមទាំងកំណត់ហេតុពីភាគីខាងស្រី ទើបឈានដល់ការសន្មតថា ព្រះអង្គសេពមេថុនធម្ម (មាតុគ្រាម) ជាមួយស្ត្រីភេទពិតប្រាកដមែន។
ព្រះអង្គ ជុំ គឹមឡេង ប្រធានថេរសភាខេត្តសៀមរាប មានថេរដីការក្នុងលិខិតដូច្នេះថា៖«តាមព្រះវិន័យចែងក្នុងសិក្ខាបទ ត្រង់អាបត្តិបរាជិក (សេពមេថុនធម្ម) ភិក្ខុអង្គណាបានប្រព្រឹត្តធ្វើឱ្យកន្លង ត្រូវតែចាកចេញពីភិក្ខុភាវៈ»។
តាមរយៈសេចក្តីប្រកាសនេះ ប្រធានថេរសភាខេត្តសៀមរាប មានថេរដីការសង្កត់ធ្ងន់ថា ព្រះអង្គ លួន សុវ៉ាត លែងជាបុព្វជិតទៀតហើយ។ «ក្រោយថ្ងៃចេញសង្ឃសម្រេចនេះ បើឈ្មោះ លួន សុវ៉ាត នៅតែបន្តគ្រងសង្ឃចីវរជាបុព្វជិតដូចអ្នកបួសក្នុងព្រះពុទ្ធសាសនា ចាត់ទុកជាបុគ្គលនេះប្រព្រឹត្តក្លែងភេទ សូមព្រះមេគណរាជធានី ខេត្ត និងសមត្ថកិច្ចពាក់ព័ន្ធចាត់វិធានការតាមច្បាប់ជាធរមាន»។ នេះបើតាមព្រះប្រធានថេរសភាខេត្តសៀមរាប ។
សារព័ត៌មានថ្មីៗ មិនទាន់អាចទាក់ទងព្រះអង្គ លួន សុវ៉ាត ដើម្បីសុំថេរដីការតប នឹងការសម្រេចផ្សឹកព្រះអង្គ បាននៅឡើយទេ៕
© រក្សាសិទ្ធិដោយ thmeythmey.com