ជាតិ
សេដ្ឋកិច្ច
ជប៉ុន ផ្តល់ជំនួយជាង៤០លានដុល្លារឲ្យកម្ពុជាអភិវឌ្ឍធនធានមនុស្ស សុខាភិបាល និងសេដ្ឋកិច្ច
× ភ្នំពេញ៖ ជប៉ុន នឹងផ្តល់ជំនួយឥតសំណងចំនួន ៤១. ៤លានដុល្លារដល់កម្ពុជា ដើម្បីអនុវត្តលើគម្រោងចំនួន៣ ដែលនឹងជួយឲ្យធនធានមនុស្សកម្ពុជា, សុខាភិបាល និងការអភិវឌ្ឍន៍សង្គម មានភាពកាន់តែប្រសើរ។ ជំនួយឥតសំណងនេះ នឹងត្រូវចុះហត្ថលេខានៅថ្ងៃទី៥ មិថុនា។
កម្ពុជា-ជប៉ុន នឹងហត្ថលេខាលើលិខិតប្តូរសារ ស្តីពីការផ្តល់ហិរញ្ញប្បទានឥតសំណងរបស់ជប៉ុន ដែលមានទឹកប្រាក់ចំនួន ៤ ៥០១ លានយ៉េន ឬប្រហែលនឹង ៤១.៤លានដុល្លារ នៅថ្ងៃទី ៥ ខែមិថុនានេះ នៅទីស្តីការក្រសួងការបរទេសកម្ពុជា។ តាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ពិធីនេះ នឹងប្រព្រឹត្តទៅក្រោមវត្តមាន លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងលោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា។
ជំនួយឥតសំណងនេះ គឺសម្រាប់អនុវត្តលើគម្រោងចំនួនបីនៅក្នុងវិស័យអប់រំ សុខាភិបាល និងការអភិវឌ្ឍន៍សង្គម។ នេះបើតាមប្រកាសព័ត៌មានរបស់ក្រសួងការបទេសកម្ពុជា ដែលបានបញ្ជាក់ថា គម្រោងទី១គឺអាហារូបករណ៍អភិវឌ្ឍន៍ធនធានមនុស្ស ចំនួន ៣៤៨លានយ៉េន ឬស្មើនឹង៣.២លានដុល្លារ។ គម្រោងទី២ គឺការធ្វើឲ្យប្រសើរឡើង នៃមន្ទីរពេទ្យបង្អែកខេត្តសៀមរាប ចំនួន ២ ១៥៣លានយ៉េន ឬប្រមាណជា ២៩.៨លានដុល្លារ និងគម្រោងទី៣ គឺកម្មវិធីអភិវឌ្ឍន៍សេដ្ឋកិច្ច និងសង្គម តាមរយៈការផ្តល់សម្ភារវេជ្ជសាស្ត្រសម្រាប់ការពារ និងឆ្លើយតបការរីករាលដាលនៃជំងឺកូវីដ-១៩ ចំនួន ២០០០លានយ៉េន ឬប្រមាណ ១៨.៤លានដុល្លារ។
ក្រសួងការបរទេសកម្ពុជាបានបញ្ជាក់ថា ហិរញ្ញប្បទានឥតសំណងរបស់ជប៉ុននេះ នឹងរួមចំណែកយ៉ាងសំខាន់ដល់ការលើកកម្ពស់កិច្ចអភិវឌ្ឍសេដ្ឋកិច្ច និងសង្គមកម្ពុជា ព្រមទាំងពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសទាំង២៕
Tag:
ជំនួយឥតសំណង
សុខភាព
អប់រំ
សៀមរាប
© រក្សាសិទ្ធិដោយ thmeythmey.com