អតីតវីរបុរសបាល់ទាត់កម្ពុជាលោក ប៉ែន ផាត ដែលកំពុងបង្វឹកក្រុមយុវជនជាមួយក្លិបមួយនៅប្រទេសថៃ ចង់ឃើញវិស័យកីឡាបាល់ទាត់កម្ពុជាមានភាពរីកចម្រើន។ បុរសវ័យ៧២ឆ្នាំរូបនេះ អះអាងថា លោកចង់ប្រើជីវិតចុងក្រោយរបស់ខ្លួនដើម្បីរួមចំណែកអភិវឌ្ឍន៍វិស័យកីឡាបាល់ទាត់នៅកម្ពុជា។ ការអះអាងបែបនេះរបស់ លោក ធ្វើឡើងក្រោយមានពាក្យាចចាមអារ៉ាមថា លោកនឹងមកចូលរួមជាមួយក្លិបមួយនៅកម្ពុជាចុងឆ្នាំនេះ។
លោក ប៉ែន ផាត អតីតកីឡាករជើងខ្លាំងនាទសវត្សរ៍ឆ្នាំ១៩៦០ និងឆ្នាំ១៩៧០ ចង់ប្រើប្រាស់ជីវិតចុងក្រោយជាមួយបាល់ទាត់នៅកម្ពុជា។ លោក ចង់យកបទពិសោធបង្វឹករបស់ខ្លួនមកចែករំលែកដល់យុវជនជំនាន់ក្រោយឲ្យពួកគេបានយល់ បានដឹងពីវិធីសាស្ត្រក្នុងការអភិវឌ្ឍន៍សមត្ថភាព ពោលគឺ លោក ចង់ក្លាយជាចំណែកមួយក្នុងការជួយអភិវឌ្ឍន៍កីឡាបាល់ទាត់នៅកម្ពុជា។
បុរសវ័យ៧២ឆ្នាំរូបនេះអះអាងថា ការចង់ប្រើប្រាស់ជីវិតចុងក្រោយជាមួយបាល់ទាត់នៅកម្ពុជានេះដោយសារលោកចង់ធ្វើសាងស្នាដៃមួយ ដើម្បីទុកជាអនុស្សាវរីយ៍ និងការចងចាំមួយដ៏ល្អសម្រាប់ប្រជាពលរដ្ឋកម្ពុជា។ តាំងពីបញ្ចប់អាជីពជាកីឡាករ លោក ប៉ែន ផាត មិនទាន់បានសាងអ្វីស្នាដៃអ្វីមួយជាដុំកំភួនសម្រាប់វិស័យកីឡាបាល់ទាត់នៅកម្ពុជានោះទេ។
«ខ្ញុំចង់ធ្វើអ្វីមួយដើម្បីកូនខ្មែរសម្រាប់ជីវិតចុងក្រោយរបស់ខ្ញុំ ទាន់ខ្ញុំនៅរត់បាន លេងបាន មានកម្លាំងខ្លាំងរត់ទាត់បាល់លេងបាន ដូច្នេះទើបខ្ញុំចង់ធ្វើអ្វីមួយនូវជីវិតចុងក្រោយរបស់ខ្ញុំ ដើម្បីកសាងអ្វីមួយ ដែលជាអនុស្សាវរីយ៍ដ៏ថ្លៃថ្នូររបស់ខ្ញុំ»។ នេះជាការលើកឡើងរបស់លោក ប៉ែន ផាត ក្នុងបទសម្ភាសជាមួយសារព័ត៌មានថ្មីៗតាមសារអេឡិចត្រូនិក។
បុរសដែលកំពុងបង្វឹកក្រុម Academy ជាមួយក្លិប Thai Kids Soccer Academy Chonbori មួយនៅខេត្តឈុនបូរីប្រទេសថៃរូបនេះបានបន្ថែមថា៖«ជាជីវិតចុងក្រោយរបស់ខ្ញុំ នៅពេលនេះខ្ញុំនៅរត់បាន លេងបាន ទាត់បាន ហើយអាចធ្វើអ្វីៗឲ្យក្មេងមើលបាន អ៊ីចឹងខ្ញុំចង់ទៅជួយចែករំលែកអ្វីដែលខ្ញុំមានឲ្យកូនខ្មែរយើងបានយល់ បានដឹង ទាំងអស់គ្នា»។
ការអះអាង និងប្តេជ្ញាចិត្តរបស់អតីតកីឡាកររហស្សនាមពស់កេងកងរូបនេះ ធ្វើឡើងស្របពេលមានពាក្យចចាមអារ៉ាមថា លោកនឹងមកធ្វើជាគ្រូបង្វឹកក្រុមយុវជន(Academy)ជាមួយក្លិបមានមូលដ្ឋាននៅខេត្តសៀមរាបមួយនៅចុងឆ្នាំ២០២០នេះ។ បើសិនការលេចលឺនេះជារឿងពិតមែននោះ លោក ប៉ែន ផាត ទំនងជាអាចសម្រេចគោលបំណងរបស់ខ្លួន ដែលចង់ក្លាយជាចំណែកមួយក្នុងការជួយអភិវឌ្ឍន៍វិស័យកីឡាបាល់ទាត់នៅកម្ពុជា។
បុរសសញ្ជាតិបារាំងរូបនេះ បានផុតកិច្ចសន្យាជាមួយក្លិប TKS Academy តាំងពីអំឡុងខែមេសា ឆ្នាំ២០២០ មកម្ល៉េះ។ ខណៈបច្ចុប្បន្នលោកកំពុងស្នាក់នៅប្រទេសថៃ ដោយសារប្រទេសថៃបានបិទប្រទេសមិនឲ្យមានការកោះហើរ ដោយសារការរីករាលដាលនៃជំងឺកូវីដ-១៩។
លោក ប៉ែន ផាត ជាអតីតកីឡាករល្បីល្បាយមួយរូបក្នុងទសវត្សរ៍ឆ្នាំ១៩៦០និងឆ្នាំ១៩៧០។ លោកបានទៅរស់នៅប្រទេសថៃនៅអំឡុងឆ្នាំ១៩៧២ ក្នុងអំឡុងពេលកម្ពុជាមានសង្គ្រាម។ លោកជាកីឡាករកម្ពុជាតែម្នាក់គត់ដែលបានលេងបាល់ជាមួយស្តេចបាល់ទាត់របស់ប្រេស៊ីល Pele ក្នុងអំឡុងពេលលោកលេងឲ្យក្លិបមួយរបស់ថៃ៕