COVID-19
អន្តរជាតិ
ប្រមុខ UN គាំទ្រឲ្យវ៉ាក់សាំង COVID-19 ជាសម្បត្តិសាធារណសកលសម្រាប់មនុស្សទាំងអស់
លោកអាន់តូនីញ៉ូ ហ្គូតេរ៉េស ប្រមុខអង្គការសហប្រជាជាតិ។ រូបភាព AFP
×![]()
លោក អាន់តូនីញ៉ូ ហ្គូតេរ៉េស ប្រមុខអង្គការសហប្រជាជាតិ កាលពីថ្ងៃទី៤ ខែមិថុនា បានលើកឡើងថា វ៉ាក់សាំងសម្រាប់បង្ការជំងឺ COVID-19 ត្រូវតែអាចយកទៅប្រើប្រាស់បានសម្រាប់មនុស្សទាំងអស់។ លោក ហ្គូតេរ៉េស លើកបែបនេះនៅក្នុងកិច្ចប្រជុំអន្តរជាតិដែលធ្វើឡើងដើម្បីប្រមែប្រមូលថវិកាសម្រាប់ការអភិវឌ្ឍវ៉ាក់សាំង។
កិច្ចប្រជុំដែលស្តីពីការអភិវឌ្ឍវ៉ាក់សាំងប្រឆាំងជំងឺ COVID-19 រៀបចំឡើងដោយអង់គ្លេស មានការចូលរួមពីប្រទេសចំនួន៥០ និងបុគ្គលសំខាន់មួយចំនួនដូចមហាសេដ្ឋី Bill Gates ជាដើម។ កិច្ចប្រជុំនេះមានបំណងស្វែងរកថវិកា៧,៤ពាន់លានដុល្លារសម្រាប់កម្មវិធីភាពស៊ាំដែលត្រូវបានផ្អាកដោយសារជំងឺ COVID-19 និងការគាំទ្រការស្រាវជ្រាវវ៉ាក់សាំង COVID-19 ។ នេះយោងតាមទីភ្នាក់ងារសារព័ត៌មាន AFP។
តាមរយៈវីដេអូ ក្នុងកិច្ចប្រជុំនោះ ប្រមុខUN លោក អាន់តូនីញ៉ូ ហ្គូតេរ៉េស បាននិយាយថា វ៉ាក់សាំងត្រូវតែជាសម្បត្តិសាធារណសកល ជាវ៉ាក់សាំងរបស់មនុស្សគ្រប់រូប ហើយដែលថ្នាក់ដឹកនាំប្រទេសជាច្រើនកំពុងអំពាវនាវផងដែរ។ លោកបានសង្កត់ធ្ងន់ថា៖ «គេចាំបាច់ត្រូវមានសាមគ្គីភាពសកល ដើម្បីធានាថាមនុស្សគ្រប់រូប នៅគ្រប់ទីកន្លែង អាចទទួលបាន(វ៉ាក់សាំង)»។
នាយករដ្ឋមន្ត្រីអង់គ្លេស លោក បូរីស ចនសុន ដែលមានវត្តមានក្នុងកិច្ចប្រជុំនេះដែរ បានអំពាវនាវឲ្យមានកិច្ចសហប្រតិបត្តិការសុខាភិបាលសកលក្នុងសម័យថ្មី និងការរួបរួមមនុស្សជាតិដើម្បីប្រយុទ្ធទៅនឹងជំងឺឆ្លងគ្រប់ប្រភេទ និងជាពិសេសសម្រាប់ប្រទេសក្រីក្របំផុត។
តាំងតែពីជំងឺ COVID-19 បានផ្ទុះឡើងមក ការផ្តោតសំខាន់របស់អាជ្ញាធរសុខាភិបាលរបស់ប្រទេសនីមួយៗគឺការបង្ការជំងឺCOVID-19 ដែលជាហេតុបណ្តាលឲ្យកម្មវិធីចាក់ថ្នាំបង្ការសម្រាប់ជំងឺឆ្លងផ្សេងៗត្រូវបានផ្អាកឬរំខាន។ អង្គការអន្តរជាតិធំៗដូចជា WHO, UNICEF និងសម្ព័ន្ធវ៉ាក់សាំង Gavi បានព្រមានកាលពីខែមុនថា ការផ្តល់វ៉ាក់សាំងសម្រាប់ជំងឺឆ្លង ត្រូវបានផ្អាកក្នុងបណ្តារប្រទេសជាង៧០ និងប៉ះពាល់ដល់កុមារអាយុក្រោម១ឆ្នាំ ជាង៨០លាននាក់។
យោងតាម UNICEF យុទ្ធនាការបំបាត់ជំងឺគ្រុនស្វិតដៃជើងត្រូវផ្អាកក្នុងប្រទេសជាច្រើន ចំណែកឯយុទ្ធនាការចាក់វ៉ាក់សាំងការពារជំងឺកញ្ជ្រឹលត្រូវផ្អាកក្នុងប្រទេសចំនួន២៧។ ចំណែកឯលោក Seth Berkley ប្រធានប្រតិបត្តិសម្ព័ន្ធវ៉ាក់សាំង Gavi បានលើកឡើងថា បើទោះបីជាកុមារនៅទូទាំងពិភពលោកទទួលបានការបង្ការជំងឺច្រើនជាងមុន ប៉ុន្តែការប៉ះពាល់ក្នុងការផ្គត់ផ្គង់វ៉ាក់សាំង និងបណ្តាលឲ្យមានការផ្ទុះឡើងវិញជំងឺស្វិតដៃជើង ជំងឺកញ្ជ្រឹល និងជំងឺខាន់លឿង។
មើលឃើញបញ្ហាខាងលើនេះ លោក ហ្គូតេរ៉េស ក៏បានអំពាវនាវឲ្យកិច្ចប្រជុំ ស្វែងរកវីធីសាស្ត្រដែលមានសុវត្ថិភាពក្នុងការចែកចែកវ៉ាក់សាំង បើទោះបីជាជំងឺ COVID-19 នៅបន្តរាតត្បាត និងធានាថា វ៉ាក់សាំងសម្រាប់ជំងឺ COVID-19 នឹងមានដល់មនុស្សគ្រប់រូប៕
Tag:
UN
COVID-19
© រក្សាសិទ្ធិដោយ thmeythmey.com
