ជាតិ
នយោបាយជាតិ
រូបពីទំព័រហ្វេសប៊ុករបស់សម្តេចនាយករដ្ឋមន្រ្តី
×![]()
ដោយ: សារព័ត៌មានថ្មីៗ
អគារថ្មីជាទីស្នាក់ការកណ្តាលរបស់គណបក្សប្រជាជនកម្ពុជា (គ៨៥) សាងសង់បាន៩៥ភាគរយហើយ។ សម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា បានចុះទៅពិនិត្យមើលអគារនេះ នៅព្រឹកថ្ងៃទី៥ ខែមិថុនា ឆ្នាំ២០២០។ 
អគារថ្មីនេះ សាងសង់ឡើងនៅលើផ្ទៃដីនៃទីតាំងអគារទីស្នាក់កណ្តាលចាស់ដដែល ដែលមានទំហំដីប្រមាណ ១,៦ហិកតា ស្ថិតតាមបណ្តោយវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ អគារថ្មីនេះ មាន៥ជាន់ បណ្ដោយ១៥០ម៉ែត្រ ទទឹង៧៤ ម៉ែត្រ កម្ពស់៤៨ម៉ែត្រ និង ទំហំប្រមាណ៥ម៉ឺនម៉ែត្រការ៉េ។
នៅជាន់ផ្ទាល់ដី មានចំណតរថយន្តជាង៥០០ចំណត និងទីធ្លាមុខអគារ អាចចតរថយន្តបាន៣០០គ្រឿងទៀត។ នៅជាន់លើ មានសាលសម្រាប់ប្រជុំជាលក្ខណៈមហាជន អាចដាក់មនុស្សដល់ទៅប្រមាណ១ម៉ឺននាក់។
ក្នុងអគារនេះ ក៏មានសាលបដិសណ្ឋារកិច្ច អាចដាក់មនុស្សជាង៥ពាន់នាក់ និង មានអាហារដ្ឋាននៅផ្នែកខាងត្បូងអគារ អាចដាក់មនុស្ស១២០នាក់។ នៅបន្ទប់ផ្សេងៗទៀត រួមមាន បន្ទប់សោតទស្សន៍ បន្ទប់រដ្ឋបាល បន្ទប់សម្រាប់ជនពិការ បន្ទប់សម្រាប់កងការពារ បន្ទប់ប្រជុំគណៈប្រចាំការ និង បន្ទប់ប្រជុំអន្តរជាតិ ការិយាល័យសម្រាប់សម្រាក និង ការិយាល័យសម្រាប់សម្ដេចប្រធានកិត្តិយស ការិយាល័យសម្រាប់ប្រឹក្សាគណៈអចិន្ត្រៃយ៍គណបក្ស ការិយាល័យ ដែលជាសាលសមាជិកអចិន្ត្រៃយ៍គណបក្ស និង ឃ្លាំង (សម្រាប់ដាក់របស់របរ )។ «សូម្បីតែបន្ទប់កាត់សក់ ក៏មានដែរ»។
លើសពីនេះ មានសាលលៀងសាយភោជន៍ អាចដាក់មនុស្សបាន១៥០នាក់។ នៅជាន់ទី៥នៃអគារ មានសាលប្រជុំធំ ដែលមានកៅអីសម្រាប់មនុស្សអង្គុយជាង៣,៤ពាន់នាក់ និង មានទីសម្រាកនៅសងខាង ដែលអាចដាក់មនុស្សជាង៣,៤ពាន់នាក់ផងដែរ។
អគារនេះ ធ្វើឡើងតាមរចនាប័ទ្មអង្គរវត្ត រចនាប័ទ្មបន្ទាយស្រី និង រចនាប័ទ្មកណ្តាល ។ រចនាប័ទ្មទាំង៣ ដែលត្រូវបានរួមបញ្ចូលគ្នា ហៅថា «រចនាប័ទ្មរួមសម័យ» ។
ទំព័រហ្វេសប៊ុរបស់សម្តេចនាយករដ្ឋមន្ត្រី សរសេរដូច្នេះថា៖«អគារដ៏ធំស្កឹមស្កៃនេះ ត្រូវបានសាងសង់ឡើងរំលេចដោយក្បូរក្បាច់រចនាប័ទ្មខ្មែរដ៏ល្អវិចិត្រ និងមានសោភ័ណភាពល្អប្រណិតទាក់ទាញចំណាប់អារម្មណ៍យ៉ាងខ្លាំងពីសាធារណជន»។
ប្រភពដដែល សរសេរទៀតថា៖«វត្តមានអគារដ៏ធំស្កឹមស្កៃនេះ គឺបង្ហាញឲ្យឃើញពីភាពរឹងមាំ និងជានិមិត្តរូបនៃការរួបរួម សាមគ្គីភាព និង ភាពរុងរឿងដ៏អស្ចារ្យរបស់គណបក្សប្រជាជនកម្ពុជា ដែលជាបង្អែកមិនអាចខ្វះបានសម្រាប់ជាតិ និងប្រជាជនកម្ពុជាតាំងពីអតីតកាល បច្ចុប្បន្ន និង ទៅអនាគតកាល»។
អគារថ្មីនេះ ចាប់ផ្តើមកសាងតាំងពីចុងឆ្នាំ២០១៨មក។ មិនទាន់មានព័ត៌មានផ្លូវការឬជាក់លាក់ឡើយ អំពីទំហំថវិកា ដែលចំណាយលើការសាងសង់អគារដ៏ធំស្កឹមស្កៃនេះ។
លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា ក៏មិនទាន់ដឹងដែរ អំពីទំហំថវិកា ហើយអគារនេះ នឹងរួចទាល់ទាំងស្រុង នៅថ្ងៃណាឬខែណានោះ លោក ក៏មិនទាន់ហ៊ានសន្និដ្ឋាន។ ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ លោក គ្រាន់តែអាចប្រាប់បានថា ថវិកា ដែលចំណាយលើការសាងសង់អគារថ្មីនេះ គឺជាថវិការបស់គណបក្សផ្ទាល់។
យ៉ាងណា លោក សុខ ឥសាន អ្នកនាំពាក្យគណបក្សកាន់អំណាចម្នាក់ដែរនោះ ធ្លាប់ប្រាប់សារព័ត៌មានថ្មីៗ កាលពីចុងឆ្នាំ២០១៩ ថា តាមការប្រកាសរបស់សម្តេចនាយករដ្ឋមន្ត្រី ទឹកប្រាក់ ដែលចំណាយលើការសាងសង់អគារថ្មីនេះ គឺប្រមាណជា៣០លានដុល្លារ។
ក្នុងពិធីសម្ពោធអគារឥន្ទ្រទេវីនៃរាជបណ្ឌិត្យសភាកម្ពុជា កាលពីចុងឆ្នាំ២០១៩ សម្តេចនាយករដ្ឋមន្ត្រី លើកឡើងថា អគារថ្មីជាទីស្នាក់ការកណ្តាលរបស់គណបក្សប្រជាជនកម្ពុជា នឹងសាងសង់រួចរាល់ ហើយគ្រោងសម្ពោធដាក់ឲ្យប្រើប្រាស់ នៅឆ្នាំ២០២០នេះ។ ប្រធានគណបក្សកាន់អំណាច អះអាងនៅពេលនោះថា អគារថ្មីនេះ មានទំហំប្រហាក់ប្រហែលនឹងអគារវិមានសន្តិភាព៕
Tag:
ហ៊ុន សែន
CPP
អគារទីស្នាក់ថ្មី
© រក្សាសិទ្ធិដោយ thmeythmey.com
